Saturday, July 20, 2024

ကျင်စန်ကျော့ နယ်စပ်ကုန်သွယ်ရေးဂိတ် ဝန်ထမ်း ကိုဗစ်ဖြစ်၊ နယ်စပ်ဂိတ်ပိတ်

Must read

မြန်မာ – တရုတ်နယ်စပ် မူဆယ်မြို့နယ် ကျင်စန်ကျော့ နယ်စပ် ကုန်သွယ်ရေးဂိတ်မှ ဝန်ထမ်းများ ကိုဗစ်-၁၉ ရောဂါပိုး ကူးစက်ခံရသဖြင့် ဂိတ်ကို ယာယီပိတ်လိုက်ကြောင်း စုံစမ်းသိရသည်။

ကျင်ဆန်ကျော

ယမန်နေ့ (မတ်လ ၂) ရက် မနက်ပိုင်းက စတင်ပြီး ဂိတ်များ တရုတ်ဘက်မှ ပိတ်ထားသဖြင့် တရုတ်ဘက်သို့ ရောက်ရှိသွားသော်လည်း စျေးကွက်ထဲသို့ မရောက်သေးသည့် ဖရဲသီးကားများ၊ သခွားမွှေးကားများ၊ ဖရုံသီးများ စသည့် ကုန်ခြောက်များသည် ကုန်တင်ကား အစီး (၃၀၀)ကျော် ပိတ်မိနေကြောင်း နယ်စပ်ကုန်သွယ်ရေးမှ ကုန်သည်တစ်ဦးက သျှမ်းသံတော်ဆင့်ကို ပြောသည်။

“တရုတ်ဖက် အကောက်ခွန်ဝန်ထမ်းတွေ ကျန်းမာရေးဝန်ထမ်းတွေ ကိုဗစ် – ၁၉ ရောဂါ (၁၀)ဦးကျော် လောက်တွေ့ရလို့ နယ်စပ်ကို ၃ ရက်ကနေ ၅ ရက်လောက် ပိတ်မယ်လို့ ကြားရတယ်” ဟု နယ်စပ်ကုန်သွယ်ရေး မှ ကုန်သည်ကြီးတစ်ဦးက ပြောသည်။

ယခုလို တရုတ်ဘက်သို့ ရောက်ရှိသွားသော်လည်း စျေးကွက်သို့ မရောက်သေးသည့် ကုန်တင်ကားများ အစီး (၃၀၀) ကျော်ရှိပြီး၊ မူဆယ်ဘက်တွင် စောင့်ဆိုင်းနေသည့် ကုန်တင်ကား အစီး (၄၀၀)ကျော် ကျန်ရှိသည့်အတွက် ကုန်စိမ်းသည်များ၊ သစ်သီးတင်ပို့ရောင်းချသူများ၊ တောင်သူများ အရှုံးပေါ်နိုင်ကြောင်း မူဆယ် သစ်သီးဝလံ ကုန်စည်ဒိုင်မှ ကုန်သည်ကြီး တစ်ဦးက ပြောသည်။

“အိုမီခရွှန်က (၁၀)ယောက်လောက်စစ်ရင် (၃)ယောက်လောက်က ပိုးတွေ့တယ်။ သူတို့ဘက်လဲ အဲ့လိုပဲ၊ သူတို့ ရောဂါကို ထိန်းချုပ်တာက တခြားနိုင်ငံနဲ့မတူဘူး။ နည်းနည်းရှိရင်လည်း ဖြစ်လာရင် အကုန်ပိတ်ချလိုက်တာ။ ရောဂါတွေ ထိန်းချုပ်နိုင်ပြီး သေချာ စနစ်တကျဖြစ် အောင်လုပ်တယ်။ သူတို့က တစ်ဆင့်ချင်းသွားတော့ နည်းနည်းတော့ရှုပ်တယ်” ဟု မူဆယ်ကုန်သည်ကြီး တစ်ဦးက ပြောသည်။

ကျင်စန်ကျော့ ဂိတ်သည် ၂၀၂၁ ခုနှစ် နိုဝင်ဘာအတွင်းက တရုတ်ဘက်က ပြန်လည်ဖွင့်လှစ်ခဲ့ပြီး ယခုအခါ မည်သည့်ကာလအထိ ပိတ်ထားမည်ကို အသေးစိတ် မသိရှိရသေးကြောင်း ကုန်သည်များက ဆိုသည်။

Leave a Comments

- Advertisement -spot_img

Latest article