သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ် ပန်လော့ကျေးရွာအတွင်း ဒေသခံနေအိမ် မီးလောင်ရာ မီးထဲတွင် (၂) ဦး သေဆုံးသွားကြောင်း စုံစမ်းသိရှိရသည်။
မတ်လ (၂)ရက် မနက် (၁၂)နာရီကျော်က ကွန်ဖြူကျေးရွာအုပ်စု ပန်လော့ကျေးရွာတွင် ဒေသခံနေအိမ်တစ်အိမ် မီးစတင်လောင်ကျွမ်းသွားပြီး ဖခင်ဖြစ်သူနှင့် (၃)နှစ်အရွယ် သမီးငယ် မီးလောင်ကျွမ်းသွားကြောင်း စုံစမ်းသိရှိရသည်။
“ပေါ့ဆမီးလို့ပြောရမယ်။ (၂)ယောက်တော့ မီးထဲ ပါသွားတယ်။ မီးကူးပြီး လောင်သွားတာက (၂)အိမ်လို့လည်း ပြောတယ်။ (၃)အိမ်လို့လည်းပြောကြတယ်။ ကျနော်တို့လဲ သေချာမသိရဘူး” ဟု မိုင်းယော်ဒေသခံ အမျိုးသမီး တစ်ဦးက ပြောသည်။
အဆိုပါ မီးစတင်လောင်ကျွမ်းသွားသည့်အိမ်သည် မနက်အစောပိုင်း တောင်ယာသွားရန်အတွက် ညသန်းခေါင်ကတည်းက ဟင်းချက်ထားရာမှ မီးလောင်မှုဖြစ်နိုင်ကြောင်း ဒေသခံများက ပြောဆိုကြသည်။
“ကျနော်တို့ မိုင်းယော်တိုက်နယ်ထဲမှာ မီးလောင်ပြီး ဒီလို မီးထဲသေတာ မရှိသေးဘူး။ ဒါက ပထမဆုံးပဲ ဒီနေ့လည်း မီးကို သတိထားဖို့ ကျနော်တို့ ရပ်ရွာထဲ ဆော်ဩထားတာ ကြားရတယ်။ နွေရာသီ ရောက်တော့မယ်။ လေလည်း တိုက်လာပြီဆိုတော့ မီးကို သတိထားသင့်ပြီ” ဟု မိုင်းယော်ဒေသခံ အသက် (၄၀)ဝန်းကျင် အမျိုးသားတစ်ဦးက ပြောသည်။
မီးလောင်သေဆုံးသွားသူမှာ မိုင်းအိုက်လူနှင့် ၃ နှစ်အရွယ် ကလေးငယ်ဖြစ်ကြောင်း၊ မိသားစု (၅)ဦး ရှိရာ လက်ရှိမှာတော့ ကလေး (၂)ဦး နှင့် အမျိုးသမီးသာ ကျန်ရစ်ခဲ့ကြောင်း သိရှိရသည်။
