Thursday, June 20, 2024

မိုင်းယော်တွင် စစ်ကောင်စီလေကြောင်းဗုံးကြဲမှုကြောင့် အမျိုးသမီး ၁ ဦးအပါအဝင် ၄ ဦးသေဆုံး၊ ၁ ဦး ဒဏ်ရာရ

Must read

သျှမ်းပြည် လားရှိုးမြို့နယ်ရှိ မိုင်ယော်တိုက်နယ်တွင် စစ်ကောင်စီတပ်က လေကြောင်းဗုံးကြဲမှုကြောင့် အမျိုးသမီး ၁ ဦး အပါအဝင် ၄ ဦး သေဆုံးပြီး၊ ၁ ဦး ထိခိုက်ဒဏ်ရာရရှိကြောင်း စုံစမ်းသိရသည်။

မိုင်းယော် နေအိမ်ပျက်စီး

ယမန်နေ့ (ဇန်နဝါရီလ ၈ ရက်) ည ၇ နာရီကျော်ခန့်က လားရှိုးမြို့နယ် မိုင်းယော်ကျေးရွာတွင် တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်က လေယာဉ်နှစ်စီးဖြင့် ဗုံးကြဲတိုက်ခိုက်ခဲ့ခြင်းကြောင့် အသက် ၅၀ အရွယ်ခန့်ရှိ အမျိုးသမီးတစ်ဦး အပါအဝင် ၄ ဦး သေဆုံးပြီး ၁ ဦးဒဏ်ရာရရှိခဲ့ကြောင်း လားရှိုးမြို့နယ် မိုင်းယော်ဒေသခံများက ပြောသည်။

“မနေ့ညက ၇ နာရီကျော် မှာ လေယာဉ်နဲ့ လာပစ်တာ။ ဗုံးကျတာ မိုင်းယော်ထဲက ဈေးတန်းရပ်ကွက်မှာ ကျတာ။ သေသွားတာကတော့ ၄ ယောက် ရှိတယ်။”ဟု လားရှိုးမြို့နယ် မိုင်းယော်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတပ်က လေကြောင်းဗုံးကြဲမှုကြောင့် ထိခိုက်ဒဏ်ရာ ရရှိခဲ့သည့် အမျိုးသားတစ်ဦးကို မိုင်းယော်တိုက်နယ်ဆေးရုံသို့ ဆေးကုသရန် ပို့ဆောင်ထားပြီး ပြည်သူနေအိမ် ၂၀လုံး ထက်မနည်း ထိခိုက်ပျက်စီးသွားကြောင်း မိုင်းယော်ဒေသခံများထံမှ သိရသည်။

မိုင်းယော်နေအိမ်ပျက်စီး

“ဈေးတန်းရပ်ကွက်မှာ အိမ်တွေလည်း အများကြီး ပြိုတယ်။ ဗုံးကျတဲ့နေရာနဲ့ အနီးတစ်ဝိုက်က အိမ်တွေတော့ လုံးဝကို ပျက်စီးသွားတယ်။ မနေ့ကတော့ ဘာတိုက်ပွဲမှ မရှိဘဲ လေယာဉ်နဲ့ ဗုံးလာချတာ၊ ၃ ခါ လာပစ်တယ်။ အိမ်ခြေ ၂၀ ထက်မနည်း ထိခိုက်ပျက်စီးတာပေါ့”ဟု မိုင်းယော်ကျေးရွာမှ ၎င်းဒေသခံအမျိုးသမီးက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဒီဇင်ဘာလ ၂ ရက်နေ့ကလည်း လားရှိုးမြို့နယ် မိုင်းယော်တိုက်နယ်ရှိ လုံတွေကျေးရွာကို စစ်ကောင်စီတပ်မှ တိုက်လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် အမျိုးသမီး ၂ ဦးသေဆုံးခဲ့ပြီး နေအိမ် ၁၀ လုံးထက်မနည်း ထိခိုက်ပျက်စီးကာ ဒဏ်ရာရရှိသူများလည်း ရှိခဲ့ကြောင်း လားရှိုးမြို့နယ် မိုင်းယော်ဒေသခံများထံမှ သိရသည်။

“၁၀၂၇ စစ်ဆင်ရေး” နှစ်လခွဲအတွင်း လားရှိုးမြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၁၃ ဦးနှင့် ကလေး ၁ ဦး အပါအဝင် စုစုပေါင်း ၂၂ ဦး သေဆုံးပြီး ၃၀ ဦးထက်မနည်း ထိခိုက်ဒဏ်ရာရရှိခဲ့ကြောင်း လားရှိုးမြို့နယ် ဒေသခံများထံမှ သိရသည်။

Leave a Comments

- Advertisement -spot_img

Latest article