Thursday, June 20, 2024

လားရှိုး စစ်ကောင်စီ တိုက်လေယာဉ်ဗုံးကြဲမှုကြောင့် အမျိုးသမီး ၂ ဦးသေဆုံး၊ ၁ ဦး ဒဏ်ရာရ

Must read

သျှမ်းပြည် လားရှိုးမြို့နယ် မိုင်းယော်တိုက်နယ်တွင် စစ်ကောင်စီတပ်မှ တိုက်လေယာဉ်ဖြင့် ဗုံးကြဲမှုကြောင့် အမျိုးသမီး ၂ ဦးသေဆုံးသွားခဲ့ပြီး ၁ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။

လားရှိုး မိုင်းယော် တိုက်နယ် လေကြောင်းဗုံးကြဲခံရ အမျိုးသမီး ၂ဦးသေဆုံး

ယမန်နေ့ (နိုဝင်ဘာ ၂ ရက်) ည ၉ နာရီတွင် လားရှိုးမြို့နယ် မိုင်းယော်တိုက်နယ်ရှိ လုံတွေကျေးရွာတွင် စစ်ကောင်စီတပ်မှ တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် အမျိုးသမီး ၂ ဦးသေဆုံးခဲ့ပြီး၊ နေအိမ် ၁၀ လုံးထက်မနည်း ထိခိုက်ပျက်စီးကာ ဒဏ်ရာရရှိသူများလည်း ရှိကြောင်း လားရှိုးမြို့နယ် မိုင်းယော်ဒေသခံများက ပြောသည်။

“အရင်ည (ဒီဇင်ဘာ ၂ ရက်)က လေယာဉ်နဲ့ လုံတွေရွာကို ဗုံးလာကြဲသွားတာ ဟုတ်တယ်။ ည ၉ နာရီလောက် တစ်ခါ၊ ညသန်းခေါင် ၁၂ ခွဲလောက်ကတစ်ခါ လေယာဉ်နှစ်ခါလာတဲ့ အသံကြားလိုက်တယ်။ လုံတွေရွာထဲကို ကျတာက အိမ်တွေအများကြီး ပျက်စီးသွားတယ်။ အမျိုးသမီး ၂ ဦး သေသွားပြီး ဒဏ်ရာရတဲ့လူလဲ ရှိတယ်ပြောတယ်”ဟု လားရှိုးမြို့နယ် မိုင်းယော်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့နယ် လုံတွေကျေးရွာကို စစ်ကောင်စီတပ်မှ တိုက်လေယာဉ်အသုံးပြု၍ ပေါင် ၅၀၀ ဗုံးဖြင့် ၄ လုံး လာရောက်ကြဲချခဲ့ခြင်းကြောင့် ဒေသခံအမျိုးသမီး ၂ ဦး ပွဲချင်းပြီး သေဆုံးကာ (၁)ဦး ထိခိုက်ဒဏ်ရာရရှိခဲ့ပြီး နေအိမ် (၉)လုံး ဗုံးစထိမှန်ပျက်စီးခဲ့ကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနက ဒီဇင်ဘာလ ၃ ရက်တွင် သတင်းထုတ်ပြန်ထားသည်။

အလားတူ ဒီဇင်ဘာ ၂ ရက်နေ့ ည ၆ နာရီအချိန်ခန့်က မူဆယ်မြို့နယ် စယ်လန့်ကျေးရွာကို စစ်ကောင်စီတပ်မှ လေကြောင်းအသုံးပြု၍ ပေါင် ၅၀၀ ဗုံးဖြင့် ဗုံးကြဲတိုက်ခိုက်ခဲ့ခြင်းကြောင့် အမျိုးသမီးနှင့် ကလေးအပါအဝင် ၃ ဦး ထိခိုက်ဒဏ်ရာရရှိခဲ့ပြီး နေအိမ် ၂၀ လုံးခန့် ပျက်စီးခဲ့ကြောင်း မူဆယ်မြို့နယ် စယ်လန့်ဒေသခံများက ပြောသည်။

လေကြောင်းဗုံးကြဲမှုကြောင့် ပျက်စီးသွားသည့်နေအိမ်

ပြီးခဲ့သည့် ဒီဇင်ဘာလ ၁ ရက် ညပိုင်းတွင်လည်း နမ့်ခမ်းမြို့ပေါ်ရပ်ကွက်များကို စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ အမျိုးသား ၁ ဦး သေဆုံးပြီး အရပ်သား ၅ ဦးထက်မနည်း ထိခိုက်ဒဏ်ရာရရှိကာ နေအိမ်များ ပျက်စီးခဲ့ကြောင်း နမ့်ခမ်းဒေသခံများထံမှ သိရသည်။

ညီနောင်မဟာမိတ် ၃ ဖွဲ့က ဖော်ဆောင်နေသည့် “၁၀၂၇ စစ်ဆင်ရေး”အတွင်း စစ်ကောင်စီတပ်မှ အရပ်သားများကို ပစ်မှတ်ထားပြီး လေကြောင်းမှ ပေါင် ၅၀၀ ဗုံးအပြင် ဆင့်ကဲပေါက်ကွဲတတ်သော ဗုံးများဖြင့် ပစ်ခတ်တိုက်ခိုက်မှုများစွာ ပြုလုပ်လာပြီး စစ်ရာဇဝတ်မှုကို ပြောင်ပြောင်တင်းတင်း ကျူးလွန်လျက်ရှိကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာနက သတင်းထုတ်ပြန်ထားသည်။

စစ်ကောင်စီတပ်သည် “၁၀၂၇ စစ်ဆင်ရေး”အတွင်း တပ်စခန်း ၂၀၀ ကျော် လက်လွှတ်ဆုံးရှုံးထားရခြင်းကြောင့် လေကြောင်းအားကိုးဖြင့် ဗုံးကြဲတိုက်ခိုက်မှုများ ပိုမိုလုပ်ဆောင်လာခဲ့ပြီး အရပ်ဘက် အဆောက်အဦများမှနေ၍ ရန်သူမှ ပစ်ခတ်တိုက်ခိုက်လာပါက စစ်ဘက်ဆိုင်ရာ အဆောက်အဦအဖြစ် သတ်မှတ်ပြီး ပြန်လည်တိုက်ခိုက်သွားမည်ဟု စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒီဇင်ဘာလ ၂ ရက်တွင် ပြောကြားထားသည်။

Leave a Comments

- Advertisement -spot_img

Latest article