သျှမ်းပြည် အရှေ့ပိုင်း ကျိုင်းတုံမြို့တွင် ယာဉ်တိုက်မှု ဖြစ်ပွားခဲ့ကာ အမျိုးသမီးတစ်ဦးသေဆုံးပြီး တိုက်သည့်ကားမှာ ရပ်တန့်ခြင်းမရှိဘဲ မောင်းနှင်ထွက်ပြေးသွားခဲ့ကြောင်း သတင်းသိရသည်။
ဖြစ်စဉ်မှာ ဖေဖော်ဝါရီ ၂၇ ရက် ညနေ ၅ နာရီဝန်းကျင် ကျိုင်းတုံမြို့ ဆန်ဂိုတောင်ကုန်းအဆင်း လေယာဉ်ကွင်းလမ်း မြို့တွင်းသို့ လာသည့် ကားတစ်စီးသည် အရှိန်ဖြင့် မောင်းနှင်လာကာ ဆိုင်ကယ်နှစ်စီးအား နောက်မှ ဝင်တိုက်မိခဲ့ကာ အမျိုးသမီး တစ်ဦး ပွဲချင်းပြီး သေဆုံးကာ ၃ ဦး ထိခိုက်ဒဏ်ရာရရှိခဲ့ကြောင်း ဒေသခံထံမှ သိရသည်။
“သေဆုံးတာက မိန်းကလေးပါ၊ ပွဲချင်းပြီးသေတာ၊ ကားက ဆိုင်ကယ် ၂ စီးကို တိုက်ပြီး မောင်းပြေးသွားတာ။ ကားက လေယာဉ်ကွင်းလမ်းက လာတာ၊ အဲ့နားနေတဲ့သူတွေ ပြောတာတော့ ကားက အရှိန်အရမ်းပြင်းတယ်၊ နောက်ကနေ ဝင်တိုက်သွားတာ“ ဟု ကျိုင်းတုံ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယာဉ်တိုက်မှုကြောင့် မနှင်းမြလွင် အသက် (၃၄)နှစ်မှာ အခင်းဖြစ်ရာ နေရာတွင် သေဆုံးသွားပြီး အမျိုးသမီး တစ်ဦးနှင့် အမျိုးသား ၂ ဦး ဒဏ်ရာ ရရှိခဲ့ကြောင်း သိရသည်။
ကျိုင်းတုံမြို့နယ်တွင် ယာဉ်စည်းကမ်း လမ်းစည်းကမ်း လိုက်နာမှု အားနည်းနေမှုကြောင့် ယာဉ်တိုက်မှုများ မကြာခဏ ဖြစ်ပွားနေကြောင်း ဒေသခံများက ပြောသည်။
“ကျိုင်းတုံမှာက ယာဉ်စည်းကမ်း လမ်းစည်းကမ်းတွေ လိုက်နာမှု အရမ်းအားနားနေတယ်၊ ကားမောင်းသူရော ဆိုင်ကယ်မောင်းသူတွေရော စည်းကမ်းလိုက်နာမှု မရှိကြဘူး၊ ယာဉ်တိုက်မှုတွေက ခဏခဏကို ဖြစ်နေတာ” ဟု အထက်ပါ အမျိုးသားက ပြောသည်။
မော်တော်ယာဉ်၊ မော်တော်ဆိုင်ကယ် မှောင်းနှင် သူများအနေဖြင့် ယာဉ်စည်းကမ်း လမ်းစည်းကမ်းများကို လိုက်နာသင့်ကြောင်း၊ ထို့အပြင် ဆိုင်ကယ် မောင်းနှင်သူများ အနေဖြင့် ဆိုင်ကယ်စီး ဦးထုပ်လည်း ဆောင်းသင့်ကြောင်း ဒေသခံများက တိုက်တွန်းထားသည်။
Leave a Comments