အာဏာသိမ်း စစ်ကောင်စီလက်အောက်ခံ UEC ထံ သွားရောက် အစစ်ဆေးမခံသည့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီ ယာယီရပ်ဆိုင်းနိုင်ချေရှိမည်ဟု UEC က ထုတ်ပြန်ခဲ့ကြောင်း သိရသည်။
စစ်ကောင်စီ လက်အောက်ခံ UEC ထံ သွားရောက်စစ်ဆေးမခံသည့် ပါတီများအနက် အမျိုးသားဒီမိုကရေစီ အဖွဲ့ချုပ် (NLD) နှင့် (SNLD)ကို ယာယီရပ်ဆိုင်းနိုင်ချေရှိသည် ဟု SNLD မှ ပြောရေးဆိုခွင့်ရှိသူ စိုင်းလိတ်က သျှမ်းသံတော်ဆင့်ကို ပြောသည်။
“ကျနော်တို့ နည်းတူပဲ သူတို့နေရာကို သွားပြီးအစစ်ဆေးမခံတဲ့ တခြားပါတီတွေလည်း လေး၊ငါး၊ ခြောက်ခုထက် မနည်း ရှိနေမှာပါ၊ ကျနော်သိသလောက်ဆိုရင်ပေါ့၊ အဲ့ပါတီတွေကိုကျတော့ ပါတီဖျက်သိမ်းခံရနိုင်ဖွယ် ရှိတယ် ဘာညာ ဘာတစ်ခုမှ မထုတ်ပြန်ဘဲနဲ့ ကျနော်တို့ ပါတီနဲ့ NLD ပါတီ နှစ်ခုတည်းကိုပဲ သူတို့က ရည်ညွှန်းပြီး ထုတ်ပြန်တာ” ဟု စိုင်းလိတ်က ပြောသည်။
ပြည်ထောင်စုရွေးကောက်ပွဲ ကော်မရှင် UEC အနေဖြင့် နိုင်ငံရေးပါတီများကို စစ်ဆေးခြင်းသည် လုပ်ထုံးလုပ်နည်းများ ဖြစ်နေသည့်အတွက် SNLD အနေဖြင့် ကော်မရှင်ရုံးကို သွားရောက် စစ်ဆေးမခံနိုင်ကြောင်း၊ ကော်မရှင်အနေဖြင့် SNLD ပါတီရုံးကို လာရောက် မစစ်ခြင်းတာဖြစ်ကြောင်း စိုင်းလိတ်က ပြောဆိုလိုက်သည်။
“လုပ်ငန်းသဘောသဘာဝ အရတော့ UEC နိုင်ငံရေးပါတီကို စစ်ဆေးရမယ်ဆိုတာက လုပ်ထုံးလုပ်နည်း အရ မှန်တယ်။ သူတို့ဆီ သွားအစစ်ဆေးခံပါဆိုတာမျိုးက ပါတီအနေနဲ့ အပြစ် တစုံတရာ ကျူးလွန်ထားတဲ့ အနေအထားဖြစ်နေလို့ ။ ကျနော်တို့က ဘာအပြစ်မှ ကျူးလွန်ထားတာလည်း မရှိတဲ့ အတွက်ကြောင့် စစ်ဆေးစရာရှိတာကို ရုံးချုပ်ရှိရာကို လာရောက်စစ်ဆေးပါ၊ ကျနော်တို့ကသွားပြီး အစစ်မခံနိုင်ဘူး” ဟု စိုင်းလိတ်က ပြောသည်။
လာမည့် ၂ ပတ်အတွင်း ပါတီစာရင်းများကို အစစ်ဆေးခံရန် စစ်ကောင်စီ လက်အောက်ခံ UEC သည် NLD နှင့် SNLD ပါတီ အပါအဝင် နိုင်ငံရေးပါတီ လေးခုကို ယနေ့ (ဖေဖော်ဝါရီ ၂၃) ရက်စွဲဖြင့် သတိပေးစာပေးပို့လိုက်သည်။
ထိုသတိပေးစာထဲတွင် ပါတီစာရင်းများ လာရောက် အစစ်ဆေးမခံပါက မှတ်ပုံတင်ခြင်းဥပဒေ ပုဒ်မ ၂၄ (ဂ)၊ (ဃ)၊ (င) တို့ဖြင့် အရေးယူခံရမည်ဖြစ်ပြီး ပါတီလည်း သုံးနှစ် ယာယီရပ်ဆိုင်းနိုင်ကြောင်း ထည့်သွင်းရေးသားထားသည်။
ယင်းကဲ့သို့ အကြောင်းကြားလာခြင်းနှင့် ပတ်သက်ပြီး SNLD ပါတီ အနေဖြင့် ပါတီ၏ရပ်တည်ချက်အတိုင်းသာ ဆက်လက်ရပ်တည်သွားမည်ဖြစ်ပြီး အကျိုးဆက်များက UEC ပေါ်မှာသာ မူတည်ကြောင်း စိုင်းလိတ်က ပြောသည်။
“ပါတီဖျက်သိမ်းဖို့ ဖြစ်နိုင်လား မဖြစ်နိုင်လားဆိုတာ UEC ပေါ်မှာ မူတည်ပါတယ်၊ ကျနော်တို့က ကျနော်တို့ ရပ်တည်ချက်အတိုင်းပဲ ရပ်တည်သွားမှာပါ” ဟု စိုင်းလိတ်က ပြောသည်။
SNLD ပါတီသည် သျှမ်းပြည်တွင် ဒုတိယ မဲအများဆုံး အနိုင်ရရှိသည့် ပါတီဖြစ်ပြီး အာဏာရှင်ခေတ်တိုင်းတွင် ပါတီခေါင်းဆောင်များ ဖမ်းခံရသည်အထိ ခက်ခဲစွာ ရပ်တည်ရသည့် ပါတီလည်း ဖြစ်သည်။
သျှမ်းပြည်တွင် ဝင်ပြိုင်သည့် ရွေးကောက်ပွဲများတွင် အပြတ်အသတ် အနိုင်ရလေ့ရှိသည့် ပါတီဖြစ်ပြီး မဲမသမာမှုကို အကြောင်းပြပြီး အာဏာသိမ်းယူသည့် ယခုစစ်ကောင်စီ လက်ထက်တွင်လည်း ပထမဆုံး ခြိမ်းခြောက်စာပို့ခြင်းခံရကြောင်း သိရသည်။
