သျှမ်းပြည်တောင်ပိုင်း ကလောမြို့ရှိ နမ့်ပန်တက် ကိုဗစ်စစ်ဆေးရေးဂိတ် ပြန်ဖွင့်ရန် ပြင်ဆင်မှုများ ရှိနေကြောင်း သတင်းသိရသည်။

ကလောမြို့နယ်မှ တောင်ကြီးမြို့နယ်သို့ ဝင်ရောက်လာသည့် ကုန်တင်ယာဥ်မောင်းများနှင့် အခြား ယာဥ်မောင်းများသည် အဆိုပါ စစ်ဆေးရေးဂိတ်တွင် ကိုဗစ် ရှိ၊ မရှိ ဆေးစစ်မှုပြုလုပ်ရမည်ဖြစ်ပြီး စစ်ဆေးခ ကိုလည်း သတ်မှတ်နှုန်းထားအတိုင်း ပေးဆောင်ရမည်ဖြစ်ကြောင်း သတင်းသိရသည်။

“ကာကွယ်ဆေးထိုးထားလည်း စစ်ရမှာ၊ ပြီးတော့ ဆေးစစ်ခ ပေးရမယ်၊ မပေးရင် ကိုယ်တိုင် Test Kit ယူလာပြီး အဖြေထွက်တဲ့အထိ စစ်ရမယ်၊ အားလုံး နမ့်ပန်စစ်ဆေးရေး ဂိတ်မှာ စစ်ဆေးမှုပြုပြီးမှ ဆက်သွား ခွင့်ပြုမယ်ပြောတယ်” ဟု အမည်မဖော်လိုသည့် ကျန်းမာရေးဌာနမှ ဝန်ထမ်းတစ်ဦးက သျှမ်းသံတော်ဆင့်ကို ပြောသည်။

အဆိုပါ ကလောမြို့နယ် နမ့်ပန်တက် ကိုဗစ် စစ်ဆေးရေးဂိတ်ကို မနက်ဖြန် (ဖေဖော်ဝါရီလ ၂၄)ရက်တွင် စတင်ဖွင့်လှစ်သွားမည်ဖြစ် ပြီး Test Kit ဖြင့် ကိုယ်တိုင်စစ်ဆေးလိုသည့် ကားသမားများအနေဖြင့် Test Kit များ အဆင်သင့် ဆောင်ထားရန် လိုအပ်ကြောင်း ၎င်းက ဆက်ပြောသည်။

စစ်ကောင်စီမှ နိုင်ငံတော်အာဏာ သိမ်းယူပြီးနောက် အဆိုပါ နမ့်ပန်တက် ကိုဗစ် ၁၉ စစ်ဆေးရေးဂိတ် အပါအဝင် သျှမ်းပြည်အတွင်းရှိ ကျန်းမာရေးစစ်ဆေးရေးဂိတ်များ၊ Quarantine Center များကို ပိတ်သိမ်းထားခဲ့ရခြင်းဖြစ်သည်။