စစ်ကောင်စီသိမ်းပြီးနောက် သျှမ်းပြည်တောင်ပိုင်း မိုးနဲမြို့နယ်အတွင်း လောင်းကစားဝိုင်းများကို ပေါ်တင်ဖွင့်လှစ်နေသည့်အတွက် ပြည်သူများ စိတ်လုံခြုံမှုဖြစ်နေကြောင်း စုံစမ်းသိရသည်။

မိုးနဲမြို့နယ်အတွင်းတွင် အမည်မသိ အဖွဲ့တစ်ခုမှ ဦးဆောင်ပြီး လောင်းကစားဝိုင်းကို ဖွင့်လှစ်ခဲ့သည်မှာ တစ်လ နီးပါး ကြာမြင့်လာပြီဖြစ်ကြောင်း ဒေသခံများက ပြောသည်။

“မိုးနဲမြို့နယ် ဆိုင်းဖယ်ဝမ်မိုင်ရွာဘက်မှာ လုပ်တာပါ၊ တော်တော်ကြာနေပြီ လောင်းကစားဝိုင်းတွေ ဖွင့်တာ။ သွားဆော့တဲ့သူကတော့ ရှိတယ်။ အိမ်နဲ့နီးတော့ စိတ်တော့မလုံခြုံဘူး” ဟု မိုးနဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လောင်းကစားဝိုင်းများ ဖွင့်လှစ်ဆော့ကစားမှုကြောင့် ခိုးယူလုယက်မှု၊ မိသားစုတွင်း ပြဿနာများနှင့် တခြားသော လုံခြုံရေးပြဿနာများလည်း ရှိလာနိုင်ကြောင်း ဒေသခံများက ဝေဖန်ပြောဆိုနေကြသည်။

ထို့အတူပင် သျှမ်းပြည်မြောက်ပိုင်း သိန္နီမြို့ အမှတ် (၃)ရပ်ကွက် ဘုန်းကြီးကျောင်း အနီးရှိ ကွင်းပြင်ထဲတွင် မိုင်းလီပြည်သူ့စစ်တပ်ဖွဲ့ ဦးဆောင်ပြီး ဖွင့်လှစ်နေသည့် လောင်းကစားဝိုင်းများသည် ဖေဖော်ဝါရီလ ၂၂ ရက် နောက်ဆုံး ည ဖြစ်ကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလ ၁၆ ရက်နေ့မှ စတင်ဖွင့်လှစ်ခဲ့သည့် အဆိုပါလောင်းကစားဝိုင်းကြောင့် အနီးပတ် ဝန်းကျင်တွင်နေထိုင်သည့် ပြည်သူများ အိပ်ကောင်းခြင်းမအိပ်ရနှင့် များစွာအနှောင့်အယှက်ဖြစ်ရကြောင်း သျှမ်းသံတော်ဆင့်ကို ပြောသည်။

“သူတို့စဖွင့်ကတည်းက လာဆော့တဲ့သူတွေက နေ့တိုင်းရှိတယ်၊ မူးရူးကြတဲ့သူတွေလည်း အများကြီးပဲ၊ ကျနော်တို့လို ဘေးပတ်ဝန်းကျင်မှာ နေထိုင်တဲ့သူတွေအတွက်လည်း အရမ်းကို စိတ်အနှောင့်အယှက် ဖြစ်ရပါတယ်” ဟု သိန္နီမြို့ ရပ်ကွက် (၃)အတွင်း နေထိုင်သည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်အာဏာသိမ်းပြီးနောက် ရှုပ်ထွေးနေသည့် နိုင်ငံရေးအခြေအနေကြားမှာ လောင်းကစားဝိုင်းများ ဖွင့်လှစ်နေခြင်းသည် လုံခြုံရေးအပြင် ကိုဗစ်-၁၉ ကူးစက်ပျံ့နှံ့မှုလည်း စိုးရိမ်ကြရကြောင်း ဒေသခံများက ပြောဆိုနေကြသည်။

“ကျမတို့ ပြည်သူတွေ အနေနဲ့ကတော့ ဒါက မသင့်လျော်ဘူးလို့ ထင်မိပါတယ်၊ ဒီလို နိုင်ငံရေး မကောင်းတဲ့အချိန် လောင်းကစား ထပ်လုပ်လာတော့ အဓိကက ခိုးယူလုယက်မှုတွေက ပိုများလာမှာအမှန်ပဲ၊ နောက်တစ်ခုက ရောဂါကူးစက် ပျံ့နှံ့လာမယ်” ဟု သိန္နီမြို့ တွင် နေထိုင်သည့် အသက် ၃၀ ကျော် အမျိုးသမီး တစ်ဦးက ဆိုသည်။

စစ်တပ်မှ အာဏာသိမ်းပြီးနောက်ပိုင်းတွင် တရားဥပဒေစိုးမိုးရေးနှင့် ဒေသတွင်းလုံခြုံရေးများ မရှိသလောက် ဖြစ်နေပြီး တိုင်းရင်းသားလက်နက်ကိုင် ပြဿနာများလည်း ရှုပ်ထွေးနေချိန် အာဏာပိုင်များက အခကြေးငွေယူပြီး လောင်းကစားဖွင့်လှစ်ခိုင်းခြင်းဖြစ်ကြောင်းလည်း ဒေသခံများက ပြောဆိုနေကြသည်။