သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်တွင် စစ်ရှောင်နေရပ်ပြန်ချိန် ရှော့တိုက်မိုင်း နင်းမိသည့် စစ်ရှောင် (၅)ဦးထဲမှ (၁)ဦး ထပ်မံသေဆုံးသွားကြောင်း စုံစမ်းသိရှိရသည်။
အဆိုပါ သေဆုံးသွားသည့် စစ်ရှောင်အမျိုးသမီးသည် လွန်ခဲ့သည့် ဖေဖော်ဝါရီ ၁၉ ရက်နေ့က လားရှိုးဆေးရုံတွင် ဒဏ်ရာ ပြင်းထန် ရရှိခဲ့ပြီးနောက် သေဆုံးသွားကြောင်း သိရသည်။
“စစ်ဘေးရှောင်တွေထဲမှာ ၃ ယောက်သေပြီး ၅ ယောက် ဒဏ်ရာရရှိခဲ့တယ်။ အခုက ဒဏ်ရာရထားတဲ့ (၅)ယောက် ထဲမှာ တစ်ဦးက ထပ်သေဆုံးသွားတယ်။ သူက ဒဏ်ရာရရှိထားတာ ပြင်းထန်တော့ မခံနိုင်တော့လို့ သေဆုံးသွားတာ။ ကျန်တဲ့ (၄)ယောက်လည်း ဆေးရုံမှာ ကုသနေသေးတယ်” ဟု မိုင်းယော်တိုက်နယ်တွင် နေထိုင်သည့် အမျိုးသားတစ်ဦးက ပြောသည်။
လားရှိုးဆေးရုံတွင် ဆေးကုသနေဆဲဖြစ်သည့် စစ်ဘေးရှောင် (၄)ဦးထဲမှ (၂)ဦးမှာ ကျန်းမာရေးအခြေနေ စိုးရိမ်ရကြောင်း၊ တိုက်ပွဲကြောင့် ကလေးငယ်က စ သေဆုံးနေရပြီး ပြည်သူများလည်း ဒုက္ခရောက်ရှိနေရသဖြင့် တိုက်ပွဲကို ရပ်တန့်ပေးရန်အတွက် ဒေသခံများက တောင်းဆိုလိုက်သည်။
“ကျနော်တို့ မိုင်းယော်တိုက်နယ်ဘက်မှာဆိုရင် လုံခြုံရေးမရှိတော့ဘူး။ လက်နက်ကိုင်တပ်ဖွဲ့တွေကိုလည်း တောင်းဆိုချင်တယ်။ ကျနော်တို့ ပြည်သူတွေက လက်နက်မရှိဘူး။ ပြည်သူက သူတို့ရဲ့ ကြားထဲကနေ သေဆုံးသွားနေရတယ်။ ကျနော်တို့ ပြည်သူတွေလည်း ဒုက္ခတွေရောက်တယ်။ ဖြစ်နိုင်ရင်တော့ တိုက်ပွဲကို ရပ်တန့်ပေးစေချင်တယ်” ဟု မိုင်းယော်မြို့ ဒေသခံများက ပြောသည်။
ဖေဖော်ဝါရီ ၁၇ ရက်နေ့တွင် မိုင်းယော်စစ်ဘေးရှောင်များက နေရပ် ပြန်ချိန်တွင် လမ်းတစ်ဝက်၌ ရှော့တိုက်မိုင်းနင်းမိပြီး ကလေးတစ်ဦး အပါအဝင် (၃)ဦး သေဆုံးသွားပြီး (၅)ဦး ဒဏ်ရာရရှိခဲ့သည်။
လက်ရှိ မိုင်းယော်တိုက်နယ်အတွင်း တိုက်ပွဲဖြစ်ပွားနေသည့် အဖွဲ့များမှာ စစ်ကောင်စီတပ် နှင့် မြောက်ပိုင်းမဟာမိတ် (TNLA, MNDAA, AA ) တပ်ဖွဲ့များဖြစ်ကြောင်း သိရသည်။
