သျှမ်းပြည်မြောက်ပိုင်း မိုင်းယော်တိုက်နယ် ပန်သပြေကျေးရွာအုပ်စု နှင့် လွိုင်စန့်ကျေးရွာ အုပ်စုတွင်းရှိ ဒေသခံများ တိုက်ပွဲကြောင့် ထွက်ပြေးတိမ်းရှောင် နေရကြောင်း စုံစမ်းသိရသည်။
ယမန်နေ့ (ဖေဖော်ဝါရီ ၁၃ ရက်)နေ့တွင် မြောက်ပိုင်းမဟာမိတ် နှင့် စစ်ကောင်စီတို့တိုက်ပွဲကြောင့် ယနေ့ ဖေဖော်ဝါရီ ၁၄ ရက်တွင် ဒေသခံများ မိုင်းယော်တိုက်နယ် နှင့် လားရှိုးမြို့နယ်တွင်းသို့ ထွက်ပြေးတိမ်းရှောင်နေရကြောင်း မိုင်းယော် တိုက်နယ်မှ အသက် ၄၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲက မနေ့ည ၈ နာရီ ကနေ ၁ နာရီထိဖြစ်တယ်။ စစ်ကောင်စီက လေယာဉ် ၂ စီးလောက်နဲ့ ပန်သပြေဘက်မှာ လာတိုက်တာ။ ဒီနေ့တော့ ပန်သပြေနဲ့ လွိုင်စန့်က ဒေသခံတွေက ဆက်တိုက် ထွက်ပြေးလာနေပြီ။ တချို့ကတော့ လားရှိုးမြို့နယ်ထဲ ထွက်ပြေးသွားနေကြပြီ၊ မိုင်းယော်မှာတော့ ၅၀၀ ကျော်လောက်ရှိမယ်” ဟု အသက် ၄၀ ကျော် အမျိုးသား က ဆိုသည်။
တိုက်ပွဲကြား ထွက်ပြေးတိမ်းရှောင်လာသူများသည် အများစုက အသက်ကြီးသူများ၊ အမျိုးသမီးများ၊ ကလေးသူငယ်များနှင့် ကိုယ်ဝန်သည်များဖြစ်ပြီး လက်ရှိအချိန်ထိ ဒေသခံများ ဆက်လက်ထွက်ပြေးနေရကြောင်း သိရသည်။
“အခုလည်း ပြည်သူတွေ ထွက်ပြေးတိမ်းရှောင်လာနေတယ်။ တချို့က ကိုယ်ပိုင် ဆိုင်ကယ်၊ ကားတွေနဲ့ စီးပြီး ထွက်ပြေးလာနေပြီ။ အမျိုးသမီး၊ အသက်ကြီးသူတွေ အရင်ထွက်ပြေးလာကြတာ။ အိမ်မှာတော့ လူငယ်ပိုင်း၊ လူကြီးပိုင်းတွေဘဲ ကျန်တော့တယ်” ဟု အထက်ပါ စစ်ရှောင်များကို ကူညီပေးနေသည့် အမျိုးသားက ပြောသည်။
ယမန်နေ့ ည မြောက်ပိုင်းမဟာမိတ်နှင့် တိုက်ပွဲဖြစ်ပွားခဲ့သည့် စစ်ကောင်စီတပ်သည် တပ်မ ၉၉ ဖြစ်ပြီး လက်ရှိတွင်လည်း စစ်အင်အားဖြည့်တင်းနေလျက်ရှိကြောင်း သိရသည်။
မိုင်းယော်တိုက်နယ်အတွင်း သွားလာလှုပ်ရှားနေသည့် တိုင်းရင်းသားလက်နက်ကိုင်များသည် ကချင်လွတ်မြောက်ရေး တပ်မတော် KIA၊ ကိုးကန့်တပ်မတော် MNDAA၊ တအာင်းအမျိုးသားလွတ်မြောက်ရေးတပ်မတော် TNLA နှင့် ရှမ်းပြည်တိုးတက်ရေးပါတီ SSPP/SSA တို့ ဖြစ်ကြောင်း သိရသည်။
