စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် သျှမ်းပြည် အပါအဝင် နိုင်ငံတဝှမ်းလုံး၌ လျှပ်စစ်မီး ပုံမှန်ပျက်နေသည့်အတွက် ပြည်သူများက ဒုက္ခများကြုံနေကြရကြောင်း သတင်းသိရသည်။
သျှမ်းပြည်မြို့တော် တောင်ကြီးမြို့တွင် ပြီးခဲ့သည့် ၂၀၂၁ ခုနှစ် နှောင်းပိုင်းမှစတင်ကာ လက်ရှိအထိ သုံးလတာ ကာလအတွင်းတွင် လျှပ်စစ်မီးသည် တစ်နေ့လျှင် အနည်းဆုံး ၃ ကြိမ်မှ ၄ ကြိမ်အထိ ပုံမှန်ပျက်နေလေ့ရှိသည့် အတွက် များစွာ အခက်အခဲကြုံတွေ့နေရကြောင်း တောင်ကြီးမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
“လျှပ်စစ်မီးကို အသုံးပြုပြီး လုပ်ရတဲ့အလုပ်တွေ ဘာတစ်ခုမှ အဆင်မပြေဘူး၊ ဘာဖြစ်လို့လဲဆိုရင် အဲ့မီးက တစ်နေ့ကို အနည်းဆုံး ၃ ကြိမ်ကနေ ၄ ကြိမ်လောက် ပုံမှန်ပျက်နေတာ နေ့တိုင်းပဲ၊ တခါတလေ ထမင်းအိုး ဟင်းအိုးတည်နေရင်းတန်းလန်းနဲ့ မီးက ဖြတ်ချသွားတာ၊ ပြည်သူတွေကို တမင်သက်သက် ဒုက္ခပေးနေသလားပဲ” ဟု ၎င်းက ပြောသည်။
လက်ရှိတွင် မြန်မာပြည်မှ လျှပ်စစ်မီးရရှိမှု အခြေအနေသည် နေ့လည်ခင်းနှင့် ညသန်းခေါင်ကဲ့သို့ ပြည်သူများ အိပ်ချိန်နှင့် အလုပ်ပါးသော အချိန်များတွင်ဖြစ်နေပြီး စစ်အာဏာသိမ်းပြီးနောက်ပိုင်း လျှပ်စစ်ရုံးမှ တာဝန်ရှိသူ များအနေဖြင့်လည်း လျှပ်စစ်မီးဖြတ်တောက်ခြင်းများနှင့် ပတ်သက်ပြီး ကြိုတင် အသိပေးမှုများ မရှိကြောင်း သိရသည်။
“အရင်တုန်းကဆို မီးက ၂၄ နာရီလုံး လာတယ်လေ၊ ဆိုတော့ ဘာအခက်အခဲမှ မရှိဘူး၊ အခုက ထမင်းဟင်းချက်ဖို့ မိုးမလင်းခင် ၃ နာရီ ၄ နာရီကတည်းက ထရတယ်၊ ညဆိုလည်း ထင်းမွေးပြီး ချက်ရတယ်၊ အရင်ခေတ်ကို ပြန်ရောက်သွားသလိုပေ့ါ” ဟု ကျောက်မဲမြို့မှ အမျိုးသမီး တစ်ဦးက ၎င်းအခက်အခဲကို ပြောပြထားသည်။
ထို့အပြင် မီးပျက်တောက်မည့်အကြောင်းကို ကြိုတင်အကြောင်းကြားချက် မရှိသည့်အတွက် ကြိုတင်ပြင်ဆင်မှု မရှိဘဲ မီးပျက်သွားသည့်အခါတွင် ထမင်းအိုး တစ်ခုလုံး သွန်ပြစ်လိုက်ရသည့် အခါများလည်း ရှိနေကြောင်း ၄င်းအမျိုးသမီးက ပြောပြထားသည်။
နေ့စဉ် လျှပ်စစ်မီးပုံမှန် မလာသောကြောင့် ဒေသခံတချို့က စားဝတ်နေရေး အတွက် ယခင်ထက် ပိုခက်ခဲလာကြောင်း လဲချားမြို့ ဒေသခံ အမျိုးသားတစ်ဦးက ပြောသည်။
“မီးက ပုံမှန်မလာတော့ အလုပ်လုပ်ရတာ အဆင်မပြေဘူး။ ကိုယ်တွေအလုပ်ကလည်း မီးကို အဓိကထားသုံးပြီးတော့ အလုပ်လုပ်ရတယ်ဆိုတော့ သိပ်အဆင်မပြေဘူး။ မီးမလာတော့ စားဝတ်နေရေးအတွက်လည်း အများကြီး ထိခိုက်လာတာ ရှိတယ်” ဟု လဲချားမြို့ မုန့်လုပ်ငန်းဆိုင်ရှင် အမျိုးသားတစ်ဦးက ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် စစ်အာဏာသိမ်းမှုကို ဆန့်ကျင်သည့် အနေဖြင့် လျှပ်စစ် မီတာခ ပေးဆောင်ရန် ငြင်းဆိုကြသော်လည်း စစ်ကောင်စီမှ လျှပ်စစ်မီတာခ မဆောင်သည့် ပြည်သူများကို ဖမ်းဆီးခြင်းများ ပြုလုပ်လာသည့်အတွက် အများစုက ပြန်လည်ပေးဆောင်ကြသော်လည်း လျှပ်စစ်မီးက အရင်လို ပုံမှန်ရရှိခြင်းမရှိကြောင်း လားရှိုးမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“စစ်အာဏာသိမ်းပြီးတဲ့နောက် မီတာခမဆောင်တဲ့သူများလို့ မီးဖြတ်တာ လက်ခံတယ်၊ ဒါပေမဲ့ မီတာခကို အပြည့်အဝနဲ့ လတိုင်းပေးဆောင်နေလည်း မီးက ပုံမှန်မရနိုင်တာတော့ ဆောင်တဲ့သူတွေ နစ်နာတာပေါ့” ဟု လားရှိုးမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် လျှပ်စစ်မီးပုံမှန်ပျက်နေခြင်းနှင့် လိုအပ်သည့် အချိန်များတွင် လျှပ်စစ်မီး မရရှိခြင်းတို့ကြောင့် လျှပ်စစ်သုံးစွဲသည့် လုပ်ငန်းရှင်များအနေဖြင့် စီးပွားရေး များစွာထိခိုက်ရကြောင်းလည်း သိရသည်။
