သျှမ်းပြည် တောင်ပိုင်း ပင်လောင်းမြို့နယ်အတွင်းသို့ ကရင်နီပြည်မှ ထွက်ပြေးတိမ်းရှောင်လာသည့် ပြည်သူများထဲမှ စစ်ရှောင် ၂၀၀၀ ကျော် နေရပ်ပြန်သွားပြီဖြစ်ကြောင်း သတင်းသိရသည်။
ယခုလ ဖေဖော်ဝါရီ ပထမပတ်ကစပြီး ကရင်နီပြည်အတွင်း တိုက်ပွဲငြိမ်သက်နေသည့် နေရာတွင် နေထိုင်သူ တချို့ နေရပ်ပြန်သွားခဲ့ကြောင်း သိရသည်။
“တိုက်ပွဲ ငြိမ်တဲ့ နေရာမှာ နေတဲ့သူတွေ ပြန်သွားကြတယ်။ သိပ်ပြီး မငြိမ်းချမ်းသေးတဲ့ နေရာကတော့ မပြန်ရဲကြသေးဘူး။ ပြန်သွားတဲ့သူတွေလည်း စိတ်ချလက်ချ မနေရဲကြသေးဘူး။ ကျန်နေတဲ့ စစ်ရှောင်တွေက ဒီလထဲ အခြေနေ စောင့်ကြည့်ဦးမယ်လို့တော့ ပြောကြတယ်” ဟု ပင်လောင်းရောက် စစ်ရှောင်များကို ကူညီနေသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပင်လောင်းမြို့နယ်တွင် ကရင်နီပြည်မှ ရောက်ရှိလာသည့် စစ်ရှောင် (၇၀၀၀)ဝန်းကျင် ရှိခဲ့ပြီး ယနေ့အချိန်ထိ စစ်ရှောင် (၅၀၀၀)ဝန်းကျင် ကျန်ရှိနေဆဲဖြစ်ကြောင်း ၄င်းက ပြောသည်။
ထိုစစ်ရှောင်များသည် ဘုန်းကြီးကျောင်း၊ ဓမ္မာရုံ၊ ဇရပ်၊ ဆွေမျိုးအိမ်များနှင့် ရပ်ကွက်ကျေးရွာအတွင်း အိမ်ငှားနေထိုင်လျက်ရှိပြီး စားနပ်ရိက္ခာ ခက်ခဲ့သည့်နေရာများလည်း ရှိနေကြောင်း ဒေသခံများထံမှ သိရသည်။
“စစ်ရှောင်တွေက ဘုန်းကြီးကျောင်းတွေ ဓမ္မာရုံတွေမှာလည်း ရှိတယ်။ ဆွေမျိုးအိမ်နဲ့ အိမ်ငှားနေတဲ့သူတွေလည်း များတယ်။ အလှူရှင်တွေ လာလှူထားတာတွေလည်း ရှိပါတယ်။ ဒါပေမယ့် တချို့နေရာမှာကတော့ စားနပ်ရိက္ခာခက်ခဲတာတွေ ဖြစ်နေသေးတယ်” ဟု အထက်ပါ အမျိုးသမီးက ပြောသည်။
ပြီးခဲ့သည့် ဇန်နဝါရီလအတွင်းက ကရင်နီပြည် လွိုင်ကော်မြို့နယ်နှင့် အခြားမြို့နယ်တချို့အတွင်း စစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲပြင်းထန်ခဲ့ကြသည်။
ထိုတိုက်ပွဲကြောင့် ဒေသခံပြည်သူများသည် သျှမ်းပြည်တောင်ပိုင်း ဆီဆိုင်၊ တောင်ကြီး၊ ညောင်ရွှေ၊ ပင်းတယ၊ ပင်လောင်းမြို့နယ်များအထိ ထွက်ပြေးတိမ်းရှောင်ခဲ့ရသည်မှာ တစ်လဝန်းကျင် ကြာမြင့်နေပြီဖြစ်သည်။
