သျှမ်းပြည်အရှေ့ပိုင်း တာချီလိတ်မြို့တွင်နေထိုင်သည့် အမျိုးသားတစ်ဦးသည် ၁၄ ရက်အကြာ ပျောက်ဆုံးသွားပြီးနောက် ယနေ့ (ဖေဖော်ဝါရီ ၈) ရက်နေ့တွင် ရုပ်အလောင်းကို ပြန်တွေ့ရှိခဲ့ကြောင်း စုံစမ်းသိရှိရသည်။
ထိုအမျိုးသား (ဦးသက်ခိုင်ဦး)သည် ဇန်နဝါရီ ၂၆ ရက် ညအချိန်တွင် နေအိမ်မှ ထွက်ခွာသွားပြီးနောက် ပျောက်ဆုံးသွားပြီး ယနေ့ နေ့လည်ပိုင်းတွင် ရုပ်အလောင်းသာပြန်တွေ့ရှိခဲ့ရကြောင်း သိရသည်။
“ဇန်နဝါရီ ၂၆ ညတုန်းက သူဆိုင်ကယ်သွားပေးမယ်ဆိုပြီးတော့ ထွက်သွားလိုက်တာ။ အဲ့ညကတည်းက ပျောက်သွားတာ။ ပြန်မလာတော့ဘူး။ ဒီနေ့မှ သူ့ရုပ်အလောင်းကို ပြန်တွေ့တာ။ ဆိုင်ကယ်တွေကော ပြန်တွေ့တယ်။ ဘယ်သူကနေ ဒီလိုလုပ်သွားတာလဲတော့ မသိရဘူး” ဟု ဦးသက်ခိုင်ဦးနှင့် နီးစပ်သူ အမျိုးသားတစ်ဦးက ပြောသည်။
ဦးသက်ခိုင်ဦး (၄၂)နှစ်သည် ကျန်းမာရေးကောင်းမွန်သူတစ်ဦး မဟုတ်ကြောင်းလည်း သိရသည်။
“သူက နိုင်ငံရေးတွေထဲပါဝင်တဲ့သူတော့ မဟုတ်ဘူး။ အေးအေးဆေးဆေးနေထိုင်တတ်တဲ့သူဖြစ်တယ်။ ဒဏ်ရာက ဘယ်လိုရှိလဲတော့ ကောင်းကောင်းမတွေ့ရတော့ဘူး။ ဘာကြောင့် သေသွားလဲတော့ အခုချိန်ထိ မသိရသေဘူး။ ကျန်းမာရေးတော့ မကောင်းဘူး။ သွေးတိုးရှိတဲ့သူလည်းဖြစ်တယ်။ ဦးနှောက်ထဲမှာ သွေးခဲသွားတယ်လို့ သိရတယ် ” ဟု ဦးသက်ခိုင်ဦး၏ မိတ်ဆွေတစ်ဦးက ပြောသည်။
တာချီလိတ်မြို့တွင် ဆိုင်ကယ်ခိုးယူလုယက်မှုများ၊ ဓားခုတ်သတ်ဖြတ်မှုများ မကြာခဏဖြစ်ပွားလျက်ရှိသည့် ဒေသတစ်ခုဖြစ်သည်။
Leave a Comments