သျှမ်းပြည် ကျောက်မဲမြို့နယ်တွင် မိုးသည်းထန်ရွာ ရွာသွန်းမှုကြောင့် ရေကြီးရေလျှံ ဖြစ်ပွားပြီးနောက် ရေစီးထဲ မျှောပါလာသည့် အလောင်းနှစ်လောင်း တွေ့ရှိထားကြောင်း သတင်းရရှိသည်။
ယနေ့ (သြဂုတ် ၇ ရက်) နံနက်ပိုင်းတွင် ကျောက်မဲမြို့နယ် ပုံဝိုးတိုက်နယ်အတွင်း ရေစီးနှင့် မျှောပါလာသည့် ပိုင်ရှင်မဲ့ အမျိုးသားတစ်ဦးကို နောင်ကွမ်ရွာနှင့် ကောင်းလန်းရွာကြားတွင် အလောင်းတွေ့ရှိထားကြောင်း ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ပုံဝိုးဘက်မှာလည်း ရေကြီးတော့ မနေ့က ရေစီးနဲ့ မျှောလာတာ။ ဒီနေ့မှ ရေကျတော့ အလောင်းကို တွေ့တာ။ ဘယ်သူ့ ဆွေမျိုးလဲ မသိဘူး။ နာမည်ဘာလဲဆိုတာ လိုက်ရှာမေးနေကြတုန်း မသိရသေးဘူး။ နောင်ကွမ်ဘက်မှာ အလောင်းပြန်တွေ့ထားကြတာ”ဟု ကျောက်မဲမြို့နယ် ပုံဝိုးဒေသခံ ၎င်းအမျိုးသားက ပြောသည်။
အလားတူ ယနေ့ (ဩဂုတ်လ ၇ ရက်) နံနက်ပိုင်းတွင် ကျောက်မဲမြို့နယ်အတွင်း ရေပြန်ကျပြီးနောက် နမ့်ဟူးကျေးရွာအကျော်ရှိ ရေမြောင်းတစ်ခုအနီး ဝါးရုံကြားတွင် ကြားညှပ်သေဆုံးနေသည့် နောင်ချိုစစ်ဘေးရှောင် အမျိုးသားတစ်ဦး၏ ရုပ်အလောင်းကို နောင်ပိန်တိုက်နယ် ကမ်းလင့်လက်များ လူမှုကူညီရေးအသင်းမှ ပြန်လည်တွေ့ရှိခဲ့သည်။
ထိုသေဆုံးသွားသည့် အမျိုးသားသည် ကျောက်မဲမြို့နယ် နောင်ပိန်ရွာတွင် စစ်ဘေးတိမ်းရှောင်ပြီး နောင်ချိုမြို့သို့ နေရပ်ပြန်နေစဉ် ရေစီးထဲ ဆိုင်ကယ်နှင့်အတူ မျှောပါသေဆုံးခဲ့သော အသက်(၅၁) နှစ်အရွယ် ဦးဒီးယား ဆိုသူဖြစ်ကြောင်း သိရသည်။
ယမန်နေ့ (ဩဂုတ်လ ၆ ရက်)တွင် ကျောက်မဲမြို့နယ်အတွင်း မိုးသည်းထန်စွာ ရွာသွန်းခဲ့ပြီး နောင်ပိန်ကျေးရွာအနီး လုပ်ပါရေကန် ကျိုးပေါက်ခြင်းကြောင့် (၅) ရပ်ကွက်ရှိ နောင်ပိန်-ပုံဝိုးလမ်းမကြီးတွင် ရေကြီးရေလျှံဖြစ်ပွားခဲ့ပြီး ရေစီးနှင့်အတူ မျှောပါသွားသူ နှစ်ဦးအား ဒေသခံများနှင့် လူမှုကူညီရေးအသင်းမှ ဝိုင်းဝန်းကူညီ ရှာဖွေမှုကြောင့် ညတွင်းချင်း အသက်ရှင်လျက် ပြန်လည်ရှာဖွေတွေ့ရှိခဲ့ကြောင်း ဒေသခံများထံမှ သိရသည်။
အလားတူ ကျောက်မဲမြို့ပေါ်တွင်လည်း မိုးသည်းထန်စွာ ရွာသွန်းမှုကြောင့် တောင်ကျရေများ လူနေရပ်ကွက်အတွင်းသို့ ဝင်ရောက်နေကြောင်း ဒေသခံများထံမှ သိရသည်။
Leave a Comments