သျှမ်းပြည်ကိုယ်စားပြုနိုင်ငံရေး စုဖွဲ့ တရပ်ပေါ်ထွန်းလာရေး အတွက် သျှမ်းပြည် ညီလာခံ ဖြစ်မြောက်ရေး တွေ့ဆုံဆွေးနွေးပွဲ ပထမအဆင့် ကို သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) မှ ကမကထ ပြုလုပ်ခဲ့ကြောင်း စုံစမ်းသိရသည်။

ထို ပထမအဆင့် တွေ့ဆုံဆွေးနွေးပွဲမှာ ဖေဖော်ဝါရီ (၃) ရက်မှ (၇) ရက်နေ့ထိ (၅) ရက်တာ ကျင်းပခဲ့ပြီး သျှမ်းပြည်တွင်း နှင့် ပြည်ပရှိ သံဃာတော်များ၊ အရပ်ဖက် အဖွဲ့အစည်းများ ၊ မြို့နယ်များမှ တက်ရောက်သူများ နှင့် သျှမ်းပြည်ပြန်လည်ထူထောင်ရေးကောင်စီမှ အဖွဲ့ဝင်များ စုစုပေါင်း (၉၃) ဦး ပါဝင်တက်ရောက်ခဲ့ကြောင်း စုံစမ်းသိရှိရသည်။

“သျှမ်းပြည်တွင်း ပြည်သူတွေ စည်းလုံးညီညွတ်ဖို့။ အဖက်ဖက်က လက်ခံနိုင်တဲ့ သျှမ်းပြည်ဖွဲ့စည်းပုံအခြေခံဉပဒေပေါ်ထွန်းလာရေး၊ သျှမ်းပြည် ကိုယ်စားပြုနိုင်ငံရေးစုဖွဲ့မှု တစ်ရပ် ပေါ်ထွန်းလာစေဖို့ ဖြစ်တယ်။ ခုက ဘာမူမှ သဘောတူညီချမှတ်တာ မရှိသေးဘူး။ ပြည်သူတွေရဲ့အမြင်သဘောထားတွေကိုသာ ဆွေးနွေးစုစည်းခြင်းဖြစ်တယ်။ RCSS ကနေ သီးခြားလုပ်သွားတာ မဟုတ်ဘူး။ အဖက်ဖက်ကလည်း ပါဝင်ပါတယ်။ RCSS က ကမကထ ပြုလုပ်သွားတာပဲဖြစ်ပါတယ်” ဟု သျှမ်းပြည်ညီလာခံ ဖြစ်မြောက်ရေးတွေ့ဆုံဆွေးနွေးပွဲ (ပထမအဆင့်) အတွင်းရေးမှူး စိုင်းလျှန်း က သျှမ်းသံတော်ဆင့် ကိုပြောသည်။

သျှမ်းပြည်ညီလာခံ ဖြစ်မြောက်လာစေရန်အတွက် အဆင့်ဆင့် ဆွေးနွေးသွားမည်ဖြစ်ပြီး ပထမအဆင့်မှာ သျှမ်းတိုင်းရင်းသားထဲက လူမှုအဖွဲ့အစည်းများ၊ ဒုတိယအဆင့်အနေဖြင့် သျှမ်းပြည်တွင်းရှိ တိုင်းရင်းသား လူမှုအဖွဲ့အစည်းများ၊ တတိယအဆင့်အနေဖြင့် သျှမ်းပြည်တွင်းရှိ နိုင်ငံရေးပါတီများ နှင့် စတုတ္တအဆင့်မှ သျှမ်းပြည်ညီလာခံ ဖြစ်မြောက်လာမည်ဖြစ်ကြောင်း စိုင်းလျှန်း က သျှမ်းသံတော်ဆင့် ကိုပြောသည်။

“တတိယအဆင့်အနေဖြင့် သျှမ်းပြည်တွင်းရှိ နိုင်ငံရေးပါတီများနဲ့ တိုင်းရင်းသားလက်နက်ကိုင်တော်လှန်ရေးအဖွဲ့အစည်းများနဲ့ တွေ့ဆုံဆွေးနွေးပြီး တူညီတဲ့ဘုံသဘောထားများချမှတ်နိုင်ကပြီဆိုမှသာ စတုတ္ထအဆင့်ဖြစ်တဲ့သျှမ်းပြည်ညီလာခံကို ကျင်းပနိုင်မှာဖြစ်ပါတယ်။” ဟု စိုင်းလျှန်း ကပြောသည်။

အလားတူ သျှမ်းပြည်ညီညွှတ်ရေးကော်မတီ (CSSU) သည်လည်း ဖက်ဒရယ်ကို အခြေခံသည့် တန်းတူညီမျှရေး သျှမ်းပြည်ဖွဲ့စည်းအုပ်ချုပ်ပုံ အခြေခံ ဥပဒေ ပေါ်ပေါက်ရေးမူကြမ်းကို အတည်ပြုထားပြီး သျှမ်းပြည်တွင်းရှိ လက်နက်ကိုင်များ၊ နိုင်ငံရေးပါတီများ၊ CSO များထံ (CSSU) က ချပြသွားရန် ရှိကြောင်း သိရှိရသည်။

“တချိန်ကျရင်တော့ CSSU မှာ ကြိုးစားလုပ်ဆောင်နေတာတွေနဲ့ထပ်တူ ဖြစ်လာမှာပါ ” ဟု စိုင်းလျှန်း က ထပ်လောင်းပြောသည်။

၎င်းတွေ့ဆုံဆွေးနွေးပွဲသည် သျှမ်းပြည်ညီလာခံ ဖြစ်မြောက်ရေးအတွက် ကနဦးစတင်သည့်အဆင့် ဖြစ်ပြီး၊ သျှမ်းပြည်ရှိ တိုင်းရင်းသားလူမျိုးပေါင်းစုံ၊ အလွှာအဆင့်အသီးသီး၊ အဖွဲ့အစည်းများ စုံလင်စွာ ပါဝင်ဆွေးနွေးနိုင်သည်အထိ အဆင့်ဆင့် ဆက်လက်ဖော်ဆောင်သွားမည်ဖြစ်ကြောင်း သိရှိရသည်။