သျှမ်းပြည် အရှေ့ပိုင်း ကျိုင်းတုံမြို့မှ အခြေခံပညာအထက်တန်းကျောင်း (တပ်ကျောင်း) တို့တွင် ဗုံးဖောက်ခွဲမည့် သတင်း ထွက်ပေါ်ပြီးနောက် မြို့တွင်းလုံခြုံရေးတင်းကြပ်လာကြောင်း သတင်းသိရသည်။
ယမန်နေ့ (ဖေဖော်ဝါရီ ၃ )ရက်နေ့တွင် သျှမ်းပြည်အရှေ့ပိုင်း ကျိုင်းတုံမြို့မှ အခြေခံပညာအထက်တန်းကျောင်း အမှတ် ၁၊ အမှတ် ၄၊ အမှတ် ၅ (တပ်ကျောင်း)တို့ကို ဗုံးဖာက်ခွဲမည့် သတင်းထွက်ပေါ်လာသဖြင့် ကျောင်းသား မိဘများ ထိတ်လန့်ကာ ကျောင်းသား/သူများကို အိမ်ပြန်ခေါ်ခဲ့ကြောင်း သတင်းသိရသည်။
“မနေ့နေ့ခင်းပိုင်းမှာ ဘယ်ကစကြားလာတဲ့ စကားတော့မသိဘူး ၊ ကျောင်းကို ဗုံးခွဲမယ်ဆိုလို့ ကျောင်းသား မိဘတွေက ကိုယ့်သားသမီးတွေကို အိမ်ပြန်ခေါ်သွားကြတယ်၊ ဒါပေမဲ့ ဗုံးပေါက်ကွဲမှုတော့ မရှိဘူး” ဟု ကျိုင်းတုံမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့နောက် ကျိုင်းတုံမြို့မှ စစ်ကောင်စီတို့သည် ကျိုင်းတုံ – တာချီလိတ် လမ်းမကြီးပေါ်ရှိ နောင်နွမ်းတပ် အဝင်/ အထွက်ဂိတ်ပေါက် နေရာများနှင့် အမြောက်တပ် ၂၂၄ တပ်အနီးပတ်ဝန်းကျင်တစ်လျှောက်တွင် သံဆူး ကြိုးများဖြင့် ချထားပြီး ကားတစ်စီးစာ သွားလာဖို့အတွက်သာ နေရာပေးထားကြောင်း သိရသည်။
“သူတို့တပ်ရှေ့မှ မဟုတ်ဘူး ၊ မြို့လယ်ခေါင်ထင်ရှားတဲ့နေရာတွေမှာလည်း သံဆူးကြိုးတွေချထားပြီးတော့ အစောင့်တပ်သားတွေလည်း ပိုချထားတယ်၊ သွားရေးလာရေးကိုလည်း စစ်ဆေးတယ်၊ ပြီးတော့ သူတို့ သံဆူး ကြောင့် ယာဥ်ပိတ်တာပေါ့” ဟု ကျိုင်းတုံမြို့မှ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယနေ့တွင်လည်း စစ်ကောင်စီတပ်သားတို့သည် ကျိုင်းတုံမြို့တွင်းနှင့် စစ်တပ်နှင့် နီးသော စာသင်ကျောင်းနေရာ များတွင် CCTV များ တပ်ထားကြောင်းလည်း ဒေသခံများက ပြောသည်။
လက်ရှိတွင် ကျိုင်းတုံမြို့အတွင်းမှ ကျောင်းသားမိဘများသည် ကလေးများ စာမေးပွဲပြီးသည်အထိ ငြိမ်းငြိမ်းချမ်းချမ်း ဖြစ်စေလိုကြောင်းလည်း သတင်းသိရသည်။
Leave a Comments