သျှမ်းပြည်မြောက်ပိုင်း တန့်ယန်းမြို့နယ်နှင့် မိုင်းရယ်မြို့နယ်ကြားရှိ လွိုင်လိန်းတောင်ပေါ် သာသနာပြုရန်အတွက် ထားရှိသည့် အလှူငွေပုံးသည် ဖျက်ဆီး ခိုးယူခြင်းခံရကြောင်း သတင်းသိရသည်။
မိုင်းဖုန်းဆရာတော်နှင့် တောင်တန်းသာသနာပြုဆရာတော် ဦးသုခမိန္ဒ (စဝ်ဆုခမ်း)တို့၏ သာသနာပြု လုပ်ငန်းဖြစ်သော သျှမ်းပြည် အမြင့်ဆုံး လွယ်လိန်းတောင်အတွက် တောင်တက်လမ်းလှေခါး၊ စေတီ ၉ ဆူ နှင့် ရေအားလျှပ်စစ်အတွက် တောင်တက်ပြည်သူများ ပါဝင်လှူဒါန်းနိုင်ရန် ထားရှိထားသည့် အလှူငွေပုံးသည် ဖေဖော်ဝါရီလ ၁ ရက်တွင် ဖျက်ဆီးခံရသည့် အနေအထားဖြင့် တွေ့ခဲ့ရကြောင်း တောင်တက်ပြည်သူများက သျှမ်းသံတော်ဆင့်ကို ပြောသည်။
“ဖေဖော်ဝါရီ ၁ ရက်နေ့ ကျနော်တို့ တောင်ပေါ်ရောက်တဲ့အချိန် အလှူငွေထည့်ဖို့ ထားတဲ့ပုံးက ပျက်စီးနေတာ တွေ့ရတယ်၊ ပြီးခဲ့တဲ့ နှစ်ကုန် (၂၀၂၁ ခုနှစ်)တုန်းက တက်လာတာ ဒီပုံးထဲ ငွေတွေရှိနေတာ တွေ့ရတယ်၊ ဒါပေမဲ့ အခု ဘယ်သူတွေ ဖျက်ဆီးလိုက်လဲတော့ မသိရပါဘူး၊ ပုံးထဲမှာ ရှိနေတဲ့ ပိုက်ဆံတွေလည်း အကုန် ပျောက်သွားပြီ” ဟု ကိုယ်တိုင်မြင်တွေ့ရသည့် တောင်တက်ပြည်သူတစ်ဦးက သျှမ်းသံတော်ဆင့်ကို ပြောသည်။
လွိုင်လိန်းတောင်ပေါ်မှ သာသနာပြုလုပ်ငန်းများအတွက် ရည်စူးထားသည့် အလှူငွေများ ပျောက်ဆုံးသွားမှုနှင့် ပတ်သက်ပြီး အလှူရှင်တစ်ဦးက သာသနာ့နယ်မြေ ဖြစ်သည့်အတွက် ယခုလို မပြုလုပ်သင့်ကြောင်း သျှမ်းသံတော်ဆင့်ကို ပြောသည်။
“ဆရာတော်နှစ်ပါးကနေ ဦးဆောင်းလုပ်နေတဲ့ သာသနာ့နယ်မြေမှာ ဒီလို ခိုးယူဖျက်ဆီးမှုတွေ မရှိသင့်ဘူးပေါ့၊ ဒီငွေတွေဆိုတာကလည်း အနယ်နယ်အရပ်ရပ်က တောင်လာတက်တဲ့ ပြည်သူတွေ ဆရာတော်တို့ရဲ့ သာသနာပြုလုပ်ငန်းစဥ်မှာ ပါဝင်ချင်လို့ လှူဒါန်းထားတာဖြစ်လို့ ပိုတောင် မလုပ်သင့်ဘူး” ဟု အထက်ပါ အလှူရှင်က ပြောသည်။
ပြီးခဲ့သည့် ရက်ပိုင်းအတွင်းတွင် လွိုင်လိန်းတောင်ပေါ် စေတီနားအထိ တအာန်းအမျိုးသားတပ်မတော် (TNLA) တပ်သားများ သွားရောက်စခန်းချမှုများရှိကြောင်းလည်း မျက်မြင်တွေ့ရသည့် ဒေသခံပြည်သူများက သျှမ်းသံတော်ဆင့်ကို ပြောသည်။
ပေ ၈၇၇၇ မြင့်သည့် လွိုင်လိန်းတောင်သည် သျှမ်းပြည်တွင် အမြင့်ဆုံးတောင်ဖြစ်သည့်အလျောက် ဆောင်းရာသီနှင့် ပွင့်လင်းရာသီ အချိန်များတွင် တောင်တက်ဝါသနာပါသည့် ပြည်သူများ၊ တောတောင် သဘာဝအလှ ခံစားလိုသူများက အပန်းဖြေခရီးစဥ်အဖြစ် လာရောက်သူများရှိကြောင်း သိရသည်။
