သျှမ်းပြည် မိုင်းရယ်မြို့နယ် လားရှိုး-မိုင်းရှူးလမ်းမကြီးပေါ်ရှိ စစ်ကောင်စီ ယာယီစစ်ဆေးရေး ဂိတ်တွင် ကြမ်းတမ်းစွာ စစ်‌ဆေးမှုများ ပြုလုပ်နေပြီး ငွေညှစ်တောင်းခံနေကြောင်း သတင်းရရှိသည်။

မိုင်းရယ်မြို့နယ်အတွင်း မန်ပုံရွာအနီးရှိ ကျေးသီးလမ်းခွဲ စစ်ဆေးရေးဂိတ်နှင့် နမ့်ဟ တံတားရှိ စစ်ကောင်စီ စစ်ဆေးရေးဂိတ် (၂) ခုတို့သည် မေလ နောက်ဆုံးပတ်မှ စတင်၍ ကြမ်းတမ်းစွာ စစ်‌ဆေးမှုများ ပြုလုပ်နေပြီး ခရီးသွားများထံမှ ငွေညှစ်တောင်းခံမှုများ ပြုလုပ်နေကြာင်း အသက် ၄၀ ဝန်းကျင် မိုင်းရယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့က ဆန်တွေ ပစ္စည်းတွေ တင်လာရင်လည်း စစ်တယ်။ ကျနော်တို့ ပြည်သူတွေ ဆန်တစ်အိတ် စားဖို့ပါလည်း ပိုက်ဆံတောင်းတယ်။ တချို့မပေးနိုင်တော့ ပစ္စည်းထားခဲ့ရတာ ရှိတယ်။ ဆိုင်ကယ်တွေနဲ့ ကားကြီး၊ ကားသေးတွေကို ကြည့်ပြီး ကောက်တာပေါ့။ ပိုက်ဆံတောင်းလို့ ငါးထောင်လျော့ရင်တောင် ပေးမဖြတ်ဘူး။ မပေးနိုင်ရင်လည်း နာရီပိုင်း ဖမ်းထားတာပေါ့”ဟု မိုင်းရယ်မြို့နယ်မှ အသက် ၄၀ ဝန်းကျင် ဒေသခံအမျိုးသားတစ်ဦးက ပြောသည်။

မိုင်းရယ်မြို့နယ်အတွင်းရှိ လားရှိုး-မိုင်းရှူး လမ်မကြီးပေါ်တွင် စစ်ကောင်စီတပ်မှ စစ်ဆေးရေးဂိတ်ကို ပြီးခဲ့သည့် မေလ နောက်ဆုံးပတ်မှ စတင်ပြုလုပ်ခဲ့ကာ ယခုအချိန်ထိ စစ်ဆေး မှု ကြမ်းတမ်းပြီး ငွေတောင်းခံမှုများ ပြုလုပ်နေသေးကြောင်း ဒေသခံများက ပြောသည်။

မိုင်းရယ်မြို့နယ်တွင် စစ်ကောင်စီတပ် ခြေမြန်တပ်ရင်း ခမရ- ၃၂၅၊ ခြေလျင်တပ်ရင်း ခလရ ၆၇ နှင့် ခြေလျင်တပ်ရင်း ခလရ-၂၂ တို့ အခြေစိုက်ထားကြောင်း သိရသည်။

စစ်အာဏာသိမ်းပြီးနောက် သျှမ်းပြည်အတွင်းရှိ စစ်ကောင်စီ စစ်ဆေးရေးဂိတ်များတွင် ခရီးသည်များကို အတင်းအဓမ္မ ငွေကြေးတောင်းခံ ကောက်ယူမှုများ ပိုမိုများပြားလာကြောင်း ခရီးသွားယာဉ်မောင်းများထံမှ သိရသည်။

ပြီးခဲ့သည့် ဇွန်လ ၁၉ ရက်တွင် လားရှိုးမြို့နယ်မှ မူးယစ်ဆေးစွဲ လက္ခဏာရှိသူ ၁၀၅ယောက်ကို လားရှိုးရဲတပ်ဖွဲ့က ဖမ်းဆီးပြီး ၁၂ ဘီးကားနှင့် ၆ ဘီးကား နှစ်စီးဖြင့် မိုင်းရယ်မြို့နယ် မန်ပုံရွာအနီးသို့ လာရောက်ပို့ဆောင် ချထားခဲ့ကြောင်း မိုင်းရယ်ဒေသခံများက ပြောဆိုသည်။

မိုင်းရယ်မြို့နယ် မန်ပုံကျေးရွာအနီးတွင် ယခုကဲ့သို့ မူးယစ်ဆေးစွဲသည့် လက္ခဏာရှိသူ အများအပြားကို လားရှိုးစစ်ကောင်စီ လက်အောက်ခံ ရဲတပ်ဖွဲ့မှ (၃) ကြိမ်တိုင်တိုင် ရုတ်တရက် လာရောက်ပို့ဆောင်သွားခြင်းကြောင့် ပြည်သူများမှာ လုံခြုံရေး စိုးရိမ်ထိတ်လန့်နေရကြောင်း ဒေသခံများထံမှ သိရသည်။