သျှမ်းပြည်မြောက်ပိုင်း မိုင်းရယ်မြို့နယ် ဟိုယကျးရွာအုပ်စုတွင် တူးဖော်နေသည့် ခဲ နှင့် ငွေ သတ္တုတွင်း အနီးတွင် စစ်ကောင်စီတပ်ဖွဲ့မှ လုံခြုံရေးယူထားပေးနေကြောင်း သတင်းရရှိသည်။
အဆိုပါ ငွေ၊ သတ္တုတွင်းတူးဖော်နေသည့် နေရာသည် တန့်ယန်းမြို့နယ် နှင့် မိုင်းရယ်မြို့ နယ်စပ်ရှိ မိုင်းရယ် ဘက်ခြမ်း လွိုင်လိန်းတောင်ခြေ ဟိုယကျေးရွာအုပ်စု၏ ရေထွက်ဦး နေရာဖြစ်ကြောင်း သိရသည်။
“ဦးဆောင်ပြီး လုပ်တာကတော့ မန်ပန်ပြည်သူ့စစ်တွေ ဖြစ်တယ်လို့ ကျနော်တို့ သိရတယ်၊ အခုဆို ဘူဒိုဇာကား နဲ့ ဘက်ဖိုးကားတွေက မန်အွယ်ရွာကနေ ဟိုလောင်းရွာ – ကုန်းနားမွန်းရွာတွေဘက်ကို ရောက်လာပြီ၊ စစ်သား အင်အား ၄၀ လောက်က အဲ့နားတစ်ဝိုက်ကင်းလှည့် လုံခြုံရေးယူထားပေးတယ်” ဟု ဟိုယကျေးရွာအုပ်စုမှ ရွာခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ သတ္တုတူးရန်အတွက် ဦးဆောင်ပြုလုပ်နေသူသည် မန်ပန်ပြည်သူ့စစ်တပ်ဖွဲ့မှ အရာရှိတစ်ဦးဖြစ်နေပြီး ပြီးခဲ့သည့် စက်တင်ဘာလတွင် မန်အွယ်ရွာမှ တံတားကို ဖျက်ကာ လမ်းကြောင်းများ စတင်ဖောက်လုပ်ခဲ့ကြောင်း ဒေသခံများထံမှ သိရသည်။
လက်ရှိတွင် လွယ်လိန်းတောင်ခြေ မန်အွယ်ရွာကို ကျော်ပြီး ဟိုလောင်းရွာ၊ ကုန်းနားမွန်းရွာ၊ မန်အွယ်ရွာ၊ မန်ပန်ရွာ တို့ဘက်တွင် ဘူဒိုဇာ နှင့် ဘက်ဖိုးကားများ ရောက်နေကြောင်း ရွာခံအမျိုးသား က ထပ်လောင်း ပြောသည်။
“တစ်ရွာ နဲ့ တစ်ရွာက ၇/၈ မိုင်လောက်ရှိတယ်၊ အခုဆို လွယ်လိန်းတောင်ခြေကို ကျော်ပြီး လွယ်ပန် (ဒေသအခေါ် လွယ်ပန်ဖလား) တောင်ခြေအောက်ရောက်နေပြီ၊ သူတို့တူးဖို့ ပြင်နေတာက ခဲ နဲ့ ငွေဖြစ်တယ်လို့ သိရတယ်၊ အခု ထိတော့ လမ်းတွေဖောက်နေတာနဲ့ တူးတဲ့နေရာလည်း တူးနေပြီ” ဟု ၎င်းက ပြောသည်။
လက်ရှိ အဆိုပါ ခဲသတ္တုတူးဖော်မှု ကန့်ကွက်ကြောင်းကို သက်ဆိုင်ရာများနှင့် မြို့နယ်ထွေအုပ်ထံသို့ ရွာသားများက စုပေါင်း စာတင်ထားသော်လည်း အကြောင်းပြန်မှုမရှိကြောင်း သိရသည်။
“စစ်သားတွေရှိတယ်ဆိုတော့ ရွာသားတွေလည်း သူတို့ (သတ္တုတူးရာ) အနားကို မကပ်ရဲဘူး၊ ဒါကြောင့် အသေးစိတ် အချက်အလက်တွေတော့ မသိရဘူးပေါ့၊ ဒါပေမဲ့ အကြောင်းအရာတွေကို မြို့နယ် ထွေအုပ်ဆီ စာတင်ထားပြီ၊ အခုထိ ဘာအကြောင်းမှ မထူးသေးဘူး” ဟု ဟိုယကျေးရွာအုပ်စုမှ တာဝန်ရှိသူ တစ်ဦးက ဆက်ပြောသည်။
ဟိုယကျေးရွာအုပ်စုသည် ကျေးရွာပေါင်း ၂၀ ကျော်ရှိနေပြီး အဆိုပါ သတ္တုတူးဖော်မှု လုပ်ဆောင်ဖြစ်ပါက ဟိုယကျေးရွာအုပ်စုအတွင်းမှ လယ်ယာများ ရေမရရှိနိုင်သည့်အတွက် လယ်ဆုံးရှုံးနိုင်ကြောင်း ဒေသခံများ က ပြောဆို သုံးသပ်ကြသည်။
