သျှမ်းပြည် လားရှိုးခရိုင် မိုင်းရယ်မြို့နယ် မိုင်းဟ/မိုင်းဟိုင်း ပြည့်သူ့စစ်တပ်ဖွဲ့၏ ဆက်ဆံရေး ရုံးခန်းအသစ် ဖွင့်ပွဲ ကျင်းပပြုလုပ်ခဲ့ကြောင်း စုံစမ်းသိရသည်။
ပြီးခဲ့သည့် ဇူလိုင်လ ၁၃ ရက် မိုင်းရယ်မြို့ နှင့် မိုင် ၃၀ ဝန်းကျင် ကွာဝေးသည့် မိုင်းဟပြည့်သူ့စစ် ဌာနေ မိုင်းဟ/မိုင်းဟိုင်းမှ မန်မုံကျေးရွာတွင် ဆက်ဆံရေးရုံး အသစ် တစ်ခု ဖွင့်လှစ်ခဲ့ကြောင်း ဒေသခံများထံမှ သိရသည်။
“ဆောက်နေတာကတော့ တစ်နှစ်နီးပါး ရှိနေပြီ၊ ပြီးခဲ့တဲ့ လထဲမှာပဲ ပြီးသွားတာ၊ အစပိုင်းက ဆောက်နေတာ မြင်တုန်း ကတော့ ဘယ်သူ့အိမ်လဲပေါ့၊ အခု ဆိုင်းဘုတ်တွေ့တော့မှ ပြည်သူ့စစ်ရဲ့ ဆက်ဆံရေးရုံးဖြစ်မှန်း သိရတာ” ဟု ဒေသခံများက သျှမ်းသံတော်ဆင့်ကို ပြောသည်။
အဆိုပါ ပြည်သူ့စစ် ဆက်ဆံရေးရုံး အသစ် ဖွင့်ပွဲကို မိုင်းရယ်မြို့မှ ဌာနဆိုင်ရာ ဝာာဝန်ရှိသူများဖြစ်ကြသည့် ထွေအုပ်မှ ဝာာဝန်ရှိသူများ၊ မြို့မ ရဲစခန်းမှ တာဝန်ရှိသူများ ၊ မြို့ပေါ် ရပ်ကွက် အုပ်ချုပ်ရေး တချို့နှင့် တခြား ဝာာဝန်ရှိသူများလည်း တက်ရောက်ဖြစ်ခဲ့ကြောင်း သိရသည်။
ယင်းကဲ့သို့ မိုင်းဟပြည်သူ့စစ်မှ ဆက်ဆံရေးရုံး အသစ်ဖွင့်လှစ်ခြင်း နှင့် ပတ်သက်ပြီး ဒေသအတွင်း ထူးခြားမှု တစ်ခုဖြစ်နေကြောင်း နှင့် ယခင်ချိန်များတွင် ဒေသအတွင်းမှ ဌာနေပြည်သူ့စစ်များ ရုံးခန်းဖွင့်လှစ်ခြင်း မရှိခဲ့ဖူးကြောင်းလည်း ဒေသခံများက သျှမ်းသံတော်ဆင့်ကို ပြောသည်။
“ထူးတော့ထူးခြားတာပေါ့နော်။ တောရွာက ဆက်ဆံရေးရုံး ဆိုပေမဲ့ RC တိုက်နဲ့ ခေတ်မှီလက်မှီပုံစံပါပဲ၊ အရင် ကတည်းက ပြည်သူ့စစ်တပ်ဖွဲ့ သွားလာလှုပ်ရှားမှု ရှိတယ် ဆိုပေမဲ့ ခုလိုမျိုး ရုံးနဲ့ မမြင်ဖူးသေးဘူးလေ” ဟု ဒေသခံများက ပြောသည်။
မိုင်းဟပြည်သူ့စစ်တပ်ဖွဲ့သည် မိုင်းရယ်မြို့နယ် နှင့် တန့်ယန်းမြို့နယ် တစ်လျှောက် သွားလာလှုပ်ရှားနေသည့် တပ်ဖွဲ့ လက်နက်ကိုင် အဖွဲ့အစည်း တစ်ခု ဖြစ်သည်။
ပြီးခဲ့သည့် ၂၀၂၂ ဇန်နဝါရီလ ၂၃ ရက်နေ့တွင် မိုင်းရယ်မြို့နယ် မန်ပန်ကျေးရွာအုပ်စု ကြူကွမ်ကျေးရွာနေ အမျိုးသမီးကို မိုင်းဟ ပြည်သူ့စစ် တစ်ဦးက ရည်းစားစကားလိုက်ပြောရာမှ အဖြေ ပြန်မပေးသောကြောင့် သေနတ်ဖြင့် ပတ်ခတ်ခဲ့သည့်ဖြစ်စဥ်လည်း ဖြစ်ပွားခဲ့သည်။
