သျှမ်းပြည်မြောက်ပိုင်း မူဆယ်မြို့နယ် ပန်ခမ်းကျေးရွာတွင် တရုတ်နှစ်သစ်ကူးကြိုဆိုပွဲ ပြုလုပ်နေသည့် အိမ်ဝန်းထဲသို့ သေနတ်ကျည်ဆံ ကျရောက်လာကြောင်း သတင်းသိရသည်။
ယမန်နေ့ (ဇန်နဝါရီလ ၃၁)ရက်နေ့ ည ၁၀ နာရီခွဲဝန်းကျင်အချိန် ပန်ခမ်းကျေးရွာ အိမ်တစ်အိမ်တွင် တရုတ် နှစ်သစ်ကူးကြိုဆိုပွဲ ဗြောက်အိုးများဖောက်ပြီးနောက်ပိုင်းတွင် မည်သည့်အရပ်မှ ပစ်လိုက်မှန်းမသိရသည့် ကျည်ဆံ အိမ်ဝန်းထဲသို့ ရောက်ရှိလာကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“မနေ့ညမှာ တရုတ်နှစ်သစ်ကူးကို ကြိုတဲ့အနေနဲ့ ဗြောက်အိုးတွေ ဖောက်ပြီးတဲ့နောက် တရုတ်စံတော်ချိန် ၁၂ နာရီနဲ့ မြန်မာစံတော်ချိန် ၁၀ နာရီ ခွဲလောက်မှာ အိမ်ဝိုင်းထဲကို သေနတ်ကျည်ဆံရောက်လာတယ်၊ ဘယ်ကပစ်လိုက်မှန်းတော့ မသိရဘူး၊ အသံကလည်း တော်တော်ကျယ်တယ်၊ လူထိခိုက်မှုတော့မရှိဘူး” ဟု အနီးပတ်ဝန်းကျင်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ အနီးပတ်ဝန်းကျင်တွင် လောင်းကစားရုံများရှိသည့်နေရာဖြစ်ပြီး တရုတ်နှစ်သစ်ကူးပွဲတော်လည်း ရှိသည့်အတွက် မည်သူလာရောက်ပစ်ခတ်သွားသည်ကို မသိရှိကြောင်း ဒေသခံများက ပြောသည်။
ယမန်နေ့ မွန်းလွဲပိုင်း အချိန်တွင်လည်း မူဆယ်မြို့ ဈေးအနီးတွင် သေနတ်ဖြင့် ပစ်သတ်ခံရသည့် လူသတ်မှု ဖြစ်ပွားခဲ့ပါသည်။
