သျှမ်းပြည်တောင်ပိုင်း လွိုင်လင်မြို့နယ်၊ ပင်လုံမြို့ ဆနင်းကျေးရွာအုပ်စုတွင် မြောက်ပိုင်းမဟာမိတ်များ ရောက်ရှိလာသည့် သတင်းကြောင့် ဒေသခံများထိတ်လန့်ပြီး ကျေးရွာမှ ထွက်ပြေးနေကြကြောင်း စုံစမ်းသိရှိရသည်။
ဇန်နဝါရီလ နှောင်းပိုင်းတွင် မြောက်ပိုင်းမဟာမိတ်များသည် ပင်လုံမြို့ဘက်သို့ ရောက်ရှိနေသည်ဟု လူမှုကွန်ရက်ပေါ်တွင် သတင်းပျံ့နှံ့ခဲ့သဖြင့် ဒေသခံများက စိုးရိမ်ပြီး ထွက်ပြေးနေလျက်ရှိကြောင်း သိရသည်။
“မြောက်ပိုင်းကလာတယ်ဆိုတာက သတင်းအမှားဖြစ်တယ်။ သတင်းအတုဖြစ်တာ။ အခုက အေးဆေးပါပဲ။ သတင်းမှားကြောင့် ပြည်သူတွေ ထွက်ပြေးနေတာ။ တကယ် ထွက်ပြေးနေပါတယ်။ မြောက်ပိုင်းက လာတယ်ဆိုတဲ့ သတင်းကြောင့် ပြည်သူတွေစိုးရိမ်နေတာပါ” ဟု ဆနင်းကျေးရွာတွင် နေထိုင်သည့် လူငယ်အမျိုးသားတဦးက ပြောသည်။
ထို့အပြင် ပြည်သူများသည် စစ်ကောင်စီ ကားများနှင့် UWSA ကားတို့က ပင်လုံမြို့တွင်းသို့ ရောက်ရှိလာသည့် သတင်းများကြောင့်လည်း ထွက်ပြေးတိမ်းရှောင်နေကြကြောင်း သိရသည်။
သို့သော် ပင်လုံမြို့ အနီးတစ်ဝိုက်တွင် တိုက်ပွဲဖြစ်ပွားမှု မရှိကြောင်း၊ ပြည်သူများက သတင်းမှားကြောင့် စိုးရိမ်နေကြောင်း သိရသည်။
“တိုက်ပွဲမဖြစ်ဘူး။ သတင်းအတု အမှားကြောင့်ပဲ ထွက်ပြေးကြတာ။ သူတို့ကြားနေတာက ဝ ကော၊ စစ်ကောင်စီကားတွေကော အကုန်ရောက်လာတာ။ ဘယ်ကားမှ ကျနော်တို့ရွာဘက် မရောက်လာဘူး။ စစ်ကောင်စီကားက ပင်လုံမြို့ ပန်မုန်ဘက်မှာ ပတ်သွားတာပဲ ရှိတယ်” ဟု ပင်လုံဒေသခံ အမျိုးသားတစ်ဦးက ပြောသည်။
ပင်လုံမြို့ တစ်ကြောရှိ ကျေးရွာဒေသခံများတချို့သည် ပင်လုံမြို့ပေါ်သို့ ပြောင်းရွှေ့ထွက်ပြေးလာလျက်ရှိကြောင်း သိရသည်။
“ရွာကလူတွေ အခုထွက်ပြေးလာတာတွေ့တယ်။ ကျမတို့ဘေးကအိမ်ဆို ဆနင်းကလူပဲလေ။ သူတို့ အခု ရွာကနေ ပြန်လာနေကြတာ။ စစ်ပွဲဖြစ်တော့မယ်ပြောလို့ ထွက်ပြေးလာကြတာတဲ့” ဟု ပင်လုံမြို့ ဒေသခံ လူငယ် အမျိုးသမီး တဦးက သျှမ်းသံတော်ဆင့်ကို ပြောသည်။
ပင်လုံမြို့ ဆနင်းတောင်ပေါ်တွင် သျှမ်းပြည်ပြန်လည်ထူထောင်ရေးကောင်စီ (RCSS/SSA) တပ်ရှိထားသည့် နေရာဒေသတခုဖြစ်သည်။
Leave a Comments