သျှမ်းပြည်မြောက်ပိုင်း နမ့်ခမ်းမြို့ စခန်းသစ်အနီး ယနေ့ (ဖေဖော်ဝါရီ ၁)ရက် စစ်တပ်မှ အာဏာသိမ်း (၁)နှစ် ပြည့်သည့်နေ့တွင် လက်နက်ကြီးသံကြားရသဖြင့် ဒေသခံ စျေးသည်များ စျေးဆိုင်ပိတ်သိမ်းလိုက်ကြောင်း စုံစမ်းသိရှိရသည်။
ယနေ့ မနက် (၈)နာရီဝန်းကျင်က နမ့်ခမ်း စခန်းသစ် ဘက်က လက်နက်ကြီးသံကြားရသဖြင့် ဒေသခံပြည်သူများလည်း စိုးရိမ်နေကြကြောင်း စျေးသည်ဆိုင်ရှင် အမျိုးသမီးတစ်ဦးက ပြောသည်။
“လက်နက်ကြီးသံ (၁၀)ချက်ထက်မနည်း ကြားရတယ်။ (၁၅) မိနစ်လောက်ပဲ ဖြစ်တယ်။ စျေးသည်တွေတော့ အသံကြားရတာနဲ့ ဆိုင်တွေအကုန်ပိတ်သိမ်းပြန်ကြတယ်” ဟု နမ့်ခမ်းဒေသခံ စျေးသည် အမျိုးသမီး တစ်ဦးက ပြောသည်။
ယနေ့ ဖေဖော်ဝါရီ (၁)ရက်နေ့သည် စစ်အာဏာရှင်မှ နိုင်ငံတော် အာဏာသိမ်းခြင်း (၁)နှစ်ပြည့်နေ့မှာ စျေးဆိုင်များ ပိတ်သိမ်းခြင်း၊ အပြင်မထွက်ခြင်းများ မပြုလုပ်ရန် စစ်အာဏာရှင်တွေက စျေးသည်များကို ကတိလက်မှတ်လိုက်ထိုးခိုင်းခဲ့သည်။
ထို့ကြောင့် စျေးသည်တချို့က စိုးရိမ်စိတ်ကြောင့် စျေးဆိုင်သွားရောက်ဖွင့်လှစ်ရကြောင်း သိရသည်။
“ဒီနေ့တော့ နမ့်ခမ်းမှာ စျေးသည်တွေ အများစု ဆိုင်မဖွင့်ကြဘူး။ တချို့လည်း စိုးရိမ်မှုကြောင့် ဖွင့်ရတာ။ အပြင်လည်း သိပ်မထွက်ကြတော့ဘူး။ စောစောစီးစီး လက်နက်ကြီးသံ ကြားနေရတာလည်း ပါမယ်” ဟု နမ့်ခမ်းဒေသခံ အမျိုးသား တစ်ဦးက ပြောသည်။
နမ့်ခမ်းမြို့သည် စစ်ကောင်စီနှင့် တိုင်းရင်းသားလက်နက်ကိုင်များ မကြာခဏ တိုက်ပွဲဖြစ်ပွားမှုများရှိပြီး လက်နက်ကိုင် ပေါင်းစုံ လှုပ်ရှားရာနယ်မြေလည်း ဖြစ်သည်။
Leave a Comments