မြန်မာ-ထိုင်းနယ်စပ် ကရင်နီပြည်တွင် စစ်ကောင်စီတပ်နှင့် ကရင်နီတော်လှန်ရေးအင်အားစုများ တိုက်ပွဲပြင်းထန်လျက်ရှိရာ စစ်ကောင်စီဘက်မှ ပစ်ခတ်သည်ဟု ယူဆရသည့် လက်နက်ကြီးကျည် ထိုင်းဘက်ခြမ်း မယ်ဟောင်ဆောင်ခရိုင်ရှိ မုန်လာခြံထဲသို့ ကျရောက်ပေါက်ကွဲခဲ့ကြောင်း သတင်းသိရသည်။

စစ်ကောင်စီတပ် အသုံးပြုမှုများသည့် ၁၂၀ မမ လက်နက်ကြီးကျည်သည် ထိုင်းနိုင်ငံ မယ်ဟောင်ဆောင်ခရိုင် နားပါပျက်ကျေးရွာရှိ မုံလာခြံ အလယ်ထဲသို့ ၂ နေရာ ကျရောက်ခဲ့ခြင်းဖြစ်ကြောင်း ထိုင်းရဲတပ်ဖွဲ့က ပြောဆိုသည်။

ထိုင်းတာဝန်ရှိသူများမှ နယ်စပ်တလျှောက် သွားရောက်စစ်ဆေးနေစဉ် တိုက်ပွဲမှ သေနတ်သံနှင့် ပေါက်ကွဲသံများကို ကြားခဲ့ရပြီး စစ်ရေးရည်ရွယ်ချက်ဖြင့် မြန်မာစစ်တပ်က ပစ်ခတ်ခဲ့သည့် လက်နက်ကြီးကျည် ဖြစ်နိုင်ကြောင်း ယူဆကြသည်။

ထို့ကြောင့် ဒေသခံများအနေဖြင့် ကန့်သတ်နေရာများနှင့် စိုက်ပျိုးရေးခြံများသို့ သွားရောက်မည်ဆိုပါက သတိထားသွားလာရန် မယ်ဟောင်ဆောင်ခရိုင် အုပ်ချုပ်ရေးမှူးက သတိပေးထားကြောင်း ထိုင်းသတင်းမီဒီယာများတွင် ဖော်ပြသည်။

မြန်မာ-ထိုင်းနယ်စပ်တလျှောက် ကရင်နီပြည်နယ်နှင့် ထိစပ်နေသည့် နယ်ခြားမှတ်တိုင် BP-9 မှ 16 ထိ ရှိနေပြီး စစ်ကောင်စီ၏ မဆုတ်တမ်းနှင့် ခြေကုပ်စခန်းပေါင်း ၃၀ ကျော်ကို ကရင်နီတော်လှန်ရေး ပူးပေါင်းတပ်များက သိမ်းပိုက်ထားသည်။