သျှမ်းပြည် အရှေ့ပိုင်း မိုင်းဖြတ်နှင့် မိုင်းတုံမြို့မှ ပြည်သူများသည် စစ်တပ်ထောက်ခံပွဲ၌ ပါဝင်ပေးရန် ဖိအားပေး စေခိုင်းခံရကြောင်း သတင်းသိရသည်။
ယနေ့ (ဇန်နဝါရီ ၃၁)ရက်တွင် မိုင်းတုံမြို့မှ ပြည်သူများသည် စစ်တပ်မှ နိုင်ငံတော် အာဏာသိမ်းမှု တစ်နှစ်ပြည့် အထိမ်းအမှတ်အနေဖြင့် တပ်မတော်ထောက်ခံပွဲ ပါဝင်ရန် ဖိအားပေးစေခိုင်းခံရကြောင်း ဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။
“သက်ဆိုင်ရာ ရပ်ကျေးအုပ်ချုပ်ရေးမှူးတွေကို မလွန်ဆန်နိုင်လို့ လာရတာပါ၊ ကျနော်တို့ တစ်အိမ်ကို တစ်ယောက်လာရတယ်၊ ဒီနေ့အတွက် လူဉီးရေ ၁၀၀၀ ပြည့်ရမယ်ဆိုပြီးတော့ အမိန့်ကျလာလို့ ရပ်ကျေးအုပ်ချုပ်ရေးမှူးကလည်း ရွာသားတွေကို ပြန်ပြီး ဖိအားပေးတာ၊ မလာမနေရဆိုပြီးတော့” ဟု စစ်တပ်ထောက်ခံပွဲကို အလိုမတူပဲ တက်ရောက်ရသည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။
ယနေ့ ဇန်နဝါရီလ ၃၁ ရက်နေ့တွင် ကျင်းပသည့် မိုင်းတုံမြို့မှ စစ်တပ်ထောက်ခံပွဲသို့ ပါဝင်ရသည့် ပြည်သူများသည် ပိုက်ဆံလည်း မရသလို၊ ထမင်းလည်း ကိုယ့်ပိုက်ဆံဖြင့်ကိုယ်ဝယ်စားရကြောင်း သတင်းသိရသည်။
မိုင်းတုံမြို့တွင်းကျင်းပသည့် စစ်တပ်ထောက်ခံပွဲသို့ ပါဝင်ရသည့် ပြည်သူအများစုသည် လားဟူ၊ လီဆူးနှင့် သျှမ်းတိုင်းရင်းသားများ ဖြစ်ကြပြီး စစ်တပ်ထဲမှ လူများက ဉီးဆောင်လုပ်သွားကြောင်း သတင်းသိရသည်။
“အများစုကတော့ တိုင်းရင်းသားတွေပေါ့၊ စစ်တပ်ထဲကလူတွေက ဉီးဆောင်ပြီး လုပ်သွားတာ၊ ကျနော်တို့ ပြည်သူအများစုကတော့ သူတို့ (တပ်ထဲကလူ) တွေနဲ့ ပြီးတဲ့အထိ မသွားဘူး၊ လမ်းတစ်ဝက်ရောက်တော့ အားလုံးလိုလို ရပ်လိုက်တာ၊ သူတို့တပ်ထဲကလူတွေပဲ ကျန်တယ်” ဟု မိုင်းတုံမြို့မှ အမျိုးသာတစ်ဉီးက သျှမ်းသံတော်ဆင့်ကို ပြောသည်။
ထို့အတူပင် မိုင်းဖြတ်မြို့ တပ်ထဲနေ စစ်တပ် အမျိုးများကလည်း စုပေါင်းပြီး စစ်အာဏာသိမ်းမှု တစ်နှစ်ပြည့် ထောက်ခံခြင်း အထိမ်းအမှတ်ပြုလုပ်ကြောင်း သတင်းသိရသည်။
“ဒီနေ့ မိုင်းဖြတ်မြို့မှာလည်း စစ်အာဏာသိမ်းမှု ထောက်ခံပွဲ ပြုလုပ်ပါတယ်၊ ဒါပေမဲ့ တပ်ထဲက လူတွေပဲ ပြုလုပ်တာပါ၊ ပြီးတော့ မနက်ဖြန် ဖေဖော်ဝါရီလ ၁ ရက်နေ့မှာ ဆိုင်ပိတ်ရင် ဖမ်းမယ်လို့လည်း စစ်တပ်ကလူတွေ ပြောသွားတယ်” ဟု မိုင်းဖြတ်မြို့မှ ပြည်သူတစ်ဉီးက သျှမ်းသံတော်ဆင့်ကို ပြောသည်။
ယင်းကဲ့သို့ စစ်တပ်အာဏာသိမ်းမှု တစ်နှစ်ပြည့် ထောက်ခံပွဲကို သျှမ်းပြည်ထဲမှ မိုင်းတုံ၊ မိုင်းဖြတ်၊ လွိုင်လင်နှင့် တခြားသော မြို့ကြီးများတွင်လည်း ပြုလုပ်ခဲ့ကြောင်း သတင်းသိရသည်။
