ကရင်နီပြည် လွိုင်ကော်မြို့တွင် တစ်ပတ်အတွင်း ကုန်စည်များမရနိုင်ပါက ရိက္ခာများ ပြတ်တောက်နိုင်ချေရှိကြောင်း ဒေသခံများက ပြောဆိုလိုက်သည်။

လက်ရှိ လွိုင်ကော်မြို့အတွင်းတွင် ပြည်သူတစ်ထောင်ဝန်းကျင် ကျန်ရှိနေပြီး ကုန်စည်များလည်း ပြတ်တောက်နေ သည့်အတွက် မြို့တွင်း ကျန်ရှိနေသေးသည့် ကုန်စည်ရိက္ခာများကလည်း တစ်ပတ်အတွင်းလောက်သာ ဖူလုံမှု ရှိနိုင်ကြောင်း လွိုင်ကော်မြို့တွင်း ကျန်ရှိနေသည့် အသက် ၅၀ ခန့်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဆီဆိုင်ဘက်ကနေရော၊ ပင်လောင်းဘက်ကနေရော အဝင်အထွက်လမ်းတွေ စစ်ကောင်စီက အကုန်ပိတ်ထားတယ်၊ အဲ့ကြောင့် ကုန်စည်တွေလည်း မရောက်လာနိုင်ဘူး၊ မြို့ထဲက လက်ကျန်ကုန်စည်တွေလည်း တစ်ပတ်လောက်သာ ခံနိုင်တော့မယ်လို့ ခန့်မှန်းထားတယ်” ဟု ၎င်းက ပြောသည်။

နေ့စဥ် စားသောက်မှုများအတွက် တောင်ပေါ်ဒေသမှ လာရောက်ရောင်းချပေးသော ကုန်စိမ်းများနှင့် မြို့တွင်း ကျန် ရှိနေသေးသည့် ကုန်စည်ရိက္ခာများကိုသာ ချွေတာပြီး ဝေမျှသုံးစွဲနေရကြောင်းလည်း လွိုင်ကော်မြို့မှ ပရဟိတ လုပ်ဆောင်နေသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။

“မြို့ထဲက ကုန်စည်တွေအနေနဲ့လည်း မနက်ပိုင်းတစ်ချိန်ပဲ ရောင်းပေးတယ်၊ တစ်ယောက်ကို ဘယ်လောက်ဖိုး ရနိုင်မလဲ ဆိုတာမျိုးနဲ့၊ ဝေမျှပြီး ဝယ်ယူနေရတဲ့ သဘောပေါ့၊ ဒီကုန်တွေ ကုန်သွားရင် ဘယ်လို ဆက်လုပ်ရ မလဲဆိုတာတော့ စီစဥ်ထားတာ မရှိသေးဘူး” ဟု အဆိုပါ အမျိုးသားတစ်ဦးက ပြောသည်။

အာဏာသိမ်း စစ်ကောင်စီတို့ အကြမ်းဖက် ထိုးစစ်ဆင်နေမှုနှင့် ကုန်စည်ပို့ဆောင် စီးဆင်းမှုကိုလည်း တားမြစ် ဖြတ်တောက်နေသည့်အတွက် လွိုင်ကော်မြို့အတွင်းတွင် ကုန်စည်စီးဆင်းမှုလည်း ပြတ်တောက်နေသည့်အပြင် ဆေးဝါးဆိုင်ရာ ကုသပေးမှုများလည်း မရှိကြောင်း သတင်းသိရသည်။

“ကျနော်တို့ လွိုင်ကော်ဆေးရုံကြီးက ဆရာ/ဆရာမတွေလည်း တောင်ကြီးဘက်ကို ပြောင်းသွားကြသလို တခြား ဆေးခန်းတွေလည်း မဖွင့်တော့ဘူး၊ လွိုင်ကော်မှာ တစ်ခုခုဖြစ်လာပြီဆိုရင်တောင် ဘယ်နားမှာမှ ကုဖို့ မရှိဘူး” ဟု ၎င်းက ပြောသည်။

အာဏာသိမ်းစစ်ကောင်စီတို့သည် လမ်းမကြီးတစ်လျှောက်နှင့် ပြည်သူများကို ဒိုင်းကာလုပ်ပြီး ပြည်သူ့ကာကွယ်ရေး မဟာမိတ်တပ်ဖွဲ့ကို အကြမ်းဖက် ထိုးစစ်ဆင်နေသည့်အတွက် လွိုင်ကော်ြမို့တွင်းမှ ကျန်ရှိနေသေးသည့် ပြည်သူများ ထွက်လာခြင်း မပြုနိုင်သလို ကုန်စည်များ တင်ပို့မှုအတွက်လည်း လမ်းပိတ်ထားခြင်းခံရကြောင်း သိရသည်။