သျှမ်းပြည်တောင်ပိုင်း ပင်းတယမြို့နယ်အတွင်းတွင် CDM လုပ်ပြီး NON CDM ပြန်လုပ်သည့် ဌာနဆိုင်ရာဝန်ထမ်း တချို့ သည် လစာမရကြောင်း စုံစမ်းသိရသည်။
၂၀၂၁ ခုနစ် ဖေဖော်ဝါရီ ၁ ရက်တွင် စစ်တပ်မှ နိုင်ငံတော်အာဏာကို ပြန်လည်သိမ်းယူလိုက်သည့်အတွက် မြန်မာပြည်သူများသည် စစ်အာဏာရှင်အလိုမရှိကြောင်း ဆန့်ကျင် ဆန္ဒပြမှုတွေ ပြုလုပ်ခဲ့ပြီး အစိုးရ ဝန်ထမ်းများလည်း CDM ပြုလုပ်ခဲ့ကြကြောင်း သိရသည်။
“CDM လုပ်ပြီး အကြောင်းအမျိုးမျိုးကြောင့် NON CDM ပြန်လုပ်၊ အလုပ်ပြန်ဝင်တဲ့သူတွေက အစပိုင်းမှာ ၃ လက လစာမရဘူးပြောတယ်၊ နောက်တော့ ၄ လလည်း မရဘူး၊ ၅ လလည်းမရဘူး၊ ၆ လအထိ မရဘူး၊ CDM လုပ်တဲ့ အတွက်ကြောင့် ဆိုပြီး အထက်လူကြီးက ပြောတယ်” ဟု ပင်းတယမြို့မှ ဖြစ်စဥ်များကို သိရှိရသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ပင်းတယမြို့မှ ဌာနဆိုင်ရာတချို့၏ ဦးစီးအရာရှိများသည် ယခင်ကတည်းက လာဘ်စားခြင်း၊ ဝန်ထမ်းများ၏ လုပ်ခ လစာများကို ခေါင်းပုံဖြတ်ခြင်းများ ပြုလုပ်နေပြီး လက်ရှိ အာဏာသိမ်းပြီးနောက်ပိုင်းတွင် လာဘ်စားခြင်းများ ပိုမိုလုပ်ဆောင်လာကြောင်း သိရသည်။
“အဲ့ဌာနက ဝန်ထမ်းတွေ လုံခြုံရေးအတွက်ကြောင့် ဘယ်ဌာနလို့တော့ မပြောတော့ဘူး၊ ဒါပေမဲ့ လစာမရတာက အမှန်ပါ၊ အလုပ်စဝင်တုန်းကတော့ ပေးမှာလိုလိုနဲ့ စည်းရုံးပြောဆိုခဲ့ပြီး အလုပ်ပြန်ဝင်တော့ ဘယ်လက ပေါင်းပေးမယ် လိုလိုနဲ့ ပြောနေတာ ၆ လစာလုံးလုံးမရဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
တချို့သော ဌာနများတွင် CDM လုပ်ဆောင်သွားသည့် ဝန်ထမ်းများအစား လာဘ်ထိုးကာ နေရာဝင်ယူလိုသည့် ဝန်ထမ်းများကြောင့် ရုံးတွင်း စာရင်း အချက်အလက်များနှင့် ငွေကြေးကွာဟမှုများလည်း ရှိနေပြီး ပြဿနာများကို CDM လုပ်သွားသည့် ဝန်ထမ်းအပေါ်သာ ပုံချပြောဆိုမှုများ ရှိနေကြောင်း သတင်းသိရသည်။
“ကျမက ပြီးခဲ့တဲ့ မတ်လကုန်ကတည်းက CDM လုပ်ပြီး မိသားစုနဲ့ ရှောင်ထွက်လာလိုက်တာ၊ ကျမနေရာကို ဝင်ယူ တဲ့သူက ရုံးတွင်းစာရင်းဇယားတချို့ဖျောက်ပြီး ငွေကြေးကို အလွဲသုံးစားလုပ်ခဲ့တယ်၊ အထက်လူကြီးနဲ့ ပေါင်းပြီးလုပ်စားတာပေါ့၊ ဒါပေမဲ့ အစီရင်ခံစာမှာတော့ ပြဿနာက ကျမကိုပုံချတယ်” ဟု ပင်းတယမြို့မှ အစိုးရ ဌာနတစ်ခုတွင် ငွေကြေးစာရင်းကိုင် လုပ်ခဲ့ပြီး လက်ရှိ CDM လုပ်နေသူ အမျိုးသမီးတစ်ဦးက သျှမ်းသံတော်ဆင့် ကို ပြောသည်။
ပင်းတယမြို့သည် စစ်တပ်အခြေစိုက်လှုပ်ရှားမှုမရှိသော်လည်း စစ်တပ်ထောက်ခံသူနှင့် စစ်အာဏာသိမ်းမှုကို အခွင့်ကောင်းယူပြီး လုပ်စားသည့် ဌာနဆိုင်ရာအသီးသီးမှ လူကြီးတို့၏ အန္တရာယ်ကြောင့် အာဏာရှင် တော်လှန်ရေးအဖွဲ့များနှင့် ဝန်ထမ်းများအတွက် များစွာ အနှောင့်အယှက်ဖြစ်စေကြောင်း သိရသည်။
