ကိုဗစ်ဒဏ်၊ စစ်အာဏာသိမ်းမှုဒဏ်နှင့် တရုတ်နိုင်ငံ ကုန်သွယ်ရေးလမ်းကြောင်း ပိတ်ထားမှုကြောင့် သျှမ်းမြောက် ကွမ်းလုံမြို့မှ ပဲသီးသည်များ အရှုံးပေါ်နေကြောင်း စုံစမ်းသိရသည်။
သျှမ်းမြောက် ကွမ်းလုံမြို့သည် တရုတ်နယ်စပ်မြို့ဖြစ်ပြီး ထိုဒေသမှ ပဲသီးစိုက်ပျိုးသူများသည် တရုတ်ပြည် စျေးကွက်တစ်ခုတည်းကိုသာ အားကိုးရသဖြင့် ယခုနှစ်မှာ နယ်စပ်ဂိတ်များ ပိတ်ထားမှုကြောင့် ပဲသီးစိုက်ပျိုးသူများ အရှုံးပေါ်သည့်အဆင့်ထိ ဖြစ်ပွားခဲ့ရကြောင်း သတင်းရရှိသည်။
“အကုန်ရှုံးတယ်။ တရုတ်ကလည်း လမ်းမဖွင့်ပေးတော့ မရောင်းရဘူး။ ဒီတိုင်းထားရတာ။ တချို့ဆို အပင်ပေါ်မှာဘဲ ပဲသီးတွေ သေကုန်ပြီ။ တချို့ဆို စိုက်ပြီး ပြန်ဖျက်စီးလိုက်ရတာလည်း ရှိတယ်။ အပင်ပေါ်မှာပဲ သေသွားတာကို ကြည့်နေရတော့တယ်။ ဘာမှ မရောင်းရဘူး။ အကုန်ရှုံးတယ်” ဟု ကွမ်းလုံမြို့ ပဲသီးခြံပိုင်ရှင် ပါ့ပေါင်းက ပြောသည်။
ယခုနှစ်မှ ပဲသီးကို စတင်စိုက်ပျိုးသူများသည်လည်း အရှုံးများစွာပေါ်နေကြောင်း သိရသည်။ ထို့အပြင် ပဲသီးကို စိုက်ပျိုးရာတွင်လည်း အရင်းများစွာ အသုံးပြုရကြောင်း စိုင်းယွတ်က ပြောသည်။
“ကျနော်က ဒီနှစ်မှ စပြီးစိုက်တာ။ အရင်းက သိန်း ၂၀ လောက်ရှိတယ်။ ဒါတောင် ကျနော် ၁ ဧကအပြည့်မစိုက်ဘူး။ စိုက်ပြီးတော့ အခု မရောင်းရတော့ဘူး။ ကျနော်တို့လည်း အကုန်ရှုံးတယ်။ မြို့ထဲသွားရောင်းတော့လည်း ဘယ်သူမှ မဝယ်ဘူးလေ။ အိမ်တိုင်းမှာလည်းရှိတယ်” ဟု စိုင်းယွတ်က ပြောသည်။
ယခင် တရုတ်နိုင်ငံဘက် နယ်စပ်တံတား ဖွင့်ချိန်တွင် တစ်နှစ်လျှင် ပဲသီးရောင်းရငွေ ကျပ်သိန်း (၃၀)ခန့် အမြတ် ရရှိကြောင်း သိရသည်။
သို့သော် ယခုနှစ်တွင် ကိုဗစ် – ၁၉ ကာလနှင့်အတူ နိုင်ငံရေးရှုပ်ထွေးမှုကြောင့် အမြတ်မရသည့်အပြင် အရှုံးနှင့် ရင်ဆိုင်နေရကြောင်း သိရသည်။
“အရင်နှစ်တွေကတော့ ကျမတို့ တရုတ်ငွေ ယွမ် (၃)သောင်းလောက် ရကြတယ်။ မြန်မာငွေဆို သိန်း(၃၀) လောက်ရတယ်လေ။ ဒီနှစ်တော့ ဘာမှ မရတော့ဘူး။ ပဲတွေလည်း ပျက်စီးသွားပြီ” ဟု ပါ့ပေါင်းက ပြောသည်။
မြန်မာနိုင်ငံတွင် နိုင်ငံရေး ရှုပ်ထွေးမှုနှင့် ကိုဗစ် – ၁၉ ရောဂါ ပျံ့နှံ့မှု၊ တရုတ်နိုင်ငံတွင် နယ်စပ်ဂိတ်ကို ပိတ်ထားမှုတို့ကြောင့် မြန်မာနိုင်ငံတွင်းရှိ စိုက်ပျိုးရေးသမားများ အရှုံးပေါ်လျက်ရှိကြောင်း သိရသည်။
အလားတူ ဖရဲသီးခြံပိုင်ရှင်များလည်း တရုတ်နိုင်ငံတွင်း ပို့ဆောင်မရသောကြောင့် အရှုံးပေါ်နေကြောင်း သိရသည်။
Leave a Comments