သျှမ်းပြည်တောင်ပိုင်း မိုင်းရှူးမြို့နယ် ဝမ်ဆော့ကျေးရွာအုပ်စု ဝမ်စန်းကျေးရွာ ဒေသခံ (၁၀)ဦးကျော်ကို ရှမ်းပြည်တိုးတက်ရေးပါတီ SSPP/SSA က ဖမ်းဆီးသွားကြောင်း စုံစမ်းသိရှိရသည်။
ထိုဒေသခံ (၁၀)ဦးကျော်ကို SSPP က စစ်ကောက်ရန်အတွက် လာခေါ်စဉ် မလိုက်သွားသောကြောင့် အတင်းလာရောက် ဖမ်းဆီးခေါ်ဆောင်သွားကြောင်း ဒေသခံများ ပြောပြချက်အရ သိရသည်။
“လာဖမ်းခေါ်သွားတာ (၁၀)ကျော်တယ်။ (၂၀)နီးပါးလောက်တောင် ရှိမယ်ထင်တယ်။ သူတို့ စစ်လာကောက်တာ။ မလိုက်သွားတော့ အတင်းဖမ်းခေါ်သွားတာ။ SSPP ရဲ့ တပ်မဟာ (၁)က လာဖမ်းသွားတာ” ဟု ဝမ်စန်းကျေးရွာ ဒေသခံ အမျိုးသားတစ်ဦးက ပြောသည်။
ထို့အပြင် လာရောက်ဖမ်းဆီးခေါ်ဆောင်သွားသည့် အချိန်တွင် ရိုက်နှက်မှုများလည်းရှိကြောင်း ဝမ်စန်းကျေးရွာ ဒေသခံ အမျိုးသားက ပြောသည်။
SSPP ဘက်မှ မကြာခဏ စစ်သားလာကောက်သဖြင့် လက်ရှိတွင် ဒေသခံ တချို့ က ထွက်ပြေးတိမ်းရှောင်
နေလျက်ရှိကြောင်း သတင်းရရှိသည်။
“သူတို့ လာဖမ်းသွားတုန်းက ရိုက်နှက်တာတွေရှိတယ်။ မလိုက်လို့ဆိုပြီး ရိုက်တာ။ ပြီးတော့ အသက် (၁၈) မပြည့်သေးတဲ့ ကလေးတွေကိုလည်း ခေါ်သွားတယ်။ အခုဆို ရွာမှာ ဘယ်သူမှ သိပ်မရှိတော့ဘူး။ ကျနော်လည်း အခုဆို ထွက်ပြေးနေတာ။ ရွာ မနေရဲဘူး။ တခြားနေရာမှာ ထွက်ပြေးလာလိုက်ပြီ” ဟု ၎င်းအမျိုးသားက ဆိုသည်။
အဆိုပါ ကိစ္စနှင့် ပတ်သက်ပြီး ရှမ်းပြည်တိုးတက်ရေးပါတီ SSPP/SSA ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်က “ကျနော်တို့ မသိထားရဘူး။ ကျနော်ပြန်မေးပေးကြည့်မယ်။ အဲလိုမျိုးလုပ်တာတော့ ကျနော်တို့ မကြားရဘူး” ဟု သျှမ်းသံတော်ဆင့် ကို ပြောသည်။
ဝမ်စန်းကျေးရွာသည် အိမ်ခြေ (၄၅)အိမ်ခန့်သာရှိပြီး အများစုမှာ တအာင်းလူမျိုးများ နေထိုင်လျက်ရှိကြောင်း သိရသည်။
သျှမ်းပြည်တောင်ပိုင်းတွင် တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှုကြောင့် တိုင်းရင်းသားလက်နက်ကိုင်များမှ အရပ်သားပြည်သူများကို စစ်သားသစ်ကောက်ယူမှု ယခင်ကထက် များလာကြောင်းလည်း ဒေသခံများ ပြောပြချက်အရ သိရသည်။
ထိုစစ်သားကောက်ယူမှုနှင့် ပတ်သက်ပြီး လက်နက်ကိုင်တပ်ဖွဲ့တိုင်းတွင် တနှစ်တကြိမ်ကောက်ယူရန် ပေါ်လစီရှိထားကြောင်း သိရသည်။
Leave a Comments