သျှမ်းပြည်တောင်ပိုင်း တောင်ကြီးမြို့နယ်မှ ပင်လောင်းမြို့၊ ဆီဆိုင်မြို့၊ ဟိုပုံးမြို့၊ အောင်ပန်းမြို့ နှင့် တခြားမြို့ များရှိ စစ်ရှောင်များအတွက် ပစ္စည်းများပို့ရန် ကားများ ရှာရခက်နေကြောင်း သတင်းသိရသည်။

“လမ်းမှာ စစ်ကောင်စီတပ်သားတွေက အရမ်းစစ်ပါတယ်၊ စစ်ရှောင်ကို ကူညီဖို့သွားတာ အစစ်ခံရပြီဆိုရင် တချို့ဂိတ်တွေမှာက ကျားအဝတ်ထုပ်တွေဆို ပေးမသယ်စေချင်တာမျိုး၊ မသယ်ခိုင်းတာမျိုးတွေ ကြုံရလွန်းလို့လေ” ဟု စစ်ရှောင်များအတွက် အလှူကောက်ခံပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတို့၏ စစ်ဆေးရေးဂိတ်များကြောင့် တချို့သော ကားသမားများ မလိုက်ရဲကြသလို တချို့ ကားသမားများကလည်း အခကြေးငွေများစွာ တောင်းခံခြင်းများရှိနေကြောင်း စစ်ရှောင်များကို ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

“စစ်ဘေးရှောင်တွေဆီကို သွားတဲ့ကား ဆိုရင် ကားနံပါတ်တွေ မှတ်ရတယ်ဆိုတော့ တချို့က မလိုက်ချင်ဘူး၊ နောက်ထပ် သွားရေးလာရေးတွေအတွက် မလွတ်လပ်တော့ဘူးပေါ့“ ဟု အထက်ပါ ပုဂ္ဂိုလ်က ပြောသည်။

လက်ရှိတွင် စစ်ဘေးရှောင်များအတွက် ပစ္စည်းများနှင့် စားနပ်ရိက္ခာများသွားရောက်ထောက်ပံ့ရန်အတွက် ကြက်ခြေနီ အသင်းမှ ယာဥ်များနှင့်အတူ လိုက်ပါမှသာ အဆင်ပြေကြောင်းလည်း သိရသည်။

ထို့အပြင် တခြားနယ်များမှ ပို့လာသော စစ်ဘေးရှောင်များအတွက် ပစ္စည်းများနှင့် ရိက္ခာများကိုလည်း တချို့ကားဂိတ်များက လက်မခံနိုင်ကြောင်း သိရသည်။

“ကားဂိတ်ကနေ တင်ရတဲ့ အခါတွေမှာဆို ဂိတ်တွေက သိပ်လက်မခံချင်ဘူး၊ စစ်ဘေးရှောင်တွေအတွက် ပစ္စည်းပါလို့ စစ်ဆေးရေးဂိတ်မှာ ပြောရရင် အသေးစိပ် စစ်လွန်းလို့ ခရီးက မလိုအပ်ပဲ အရမ်းကြာသွားရတယ်တဲ့” ဟု ကြုံတွေ့ရသူတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် စစ်ကောင်စီတို့ အကြမ်းဖက် ထိုးစစ်ဆင်မှုကြောင့် သျှမ်းပြည်တောင်ပိုင်းအတွင်းသို့ ထွက်ပြေးတိမ်းရှောင်လာသော ကရင်နီစစ်ဘေးရှောင်များ သုံးသောင်း ဝန်းကျင်ခန့်ရှိနေပြီး အဝတ်အထည်နှင့် စားနပ်ရိက္ခာများ အရေးကြီး လိုအပ်နေပါသည်။