သျှမ်းပြည်တောင်ပိုင်းသို့ ရောက်ရှိလာသော စစ်ရှောင် ကိုယ်ဝန်သည်နှင့် မွေးလူနာများအတွက် သီးသန့် ပြင်ဆင်ထားမှုများရှိထားကြောင်း အလှူရှင် ဒေသခံပြည်သူများက ပြောသည်။
ကရင်နီပြည်အတွင်း စစ်ကောင်စီတို့၏ အကြမ်းဖက် ထိုးစစ်ဆင် တိုက်ခိုက်မှုများကြောင့် နေရပ်စွန့်လာကာ စစ်ဘေးတိမ်းရှောင်နေရသည့် သူများတွင် နေ့စေ့လစေ့ ကိုယ်ဝန်သည် အမျိုးသမီးများလည်း ပါရှိသည့်အတွက် တချို့စစ်ရှောင်နေရာများတွင် မွေးခန်းအတွက် ပြင်ဆင်ထားကြောင်းလည်း သတင်းသိရသည်။
“စစ်ရှောင်တွေကို သွားကြိုတဲ့သူတွေက သူတို့မှာ မွေးခါနီးလူနာတွေ ပါလာတယ်ပေါ့၊ သူတို့အတွက် နေရာရှိထားရင် အဆင်ပြေမယ်ဆိုပြီး အကြောင်းကြားထားတယ်၊ ကျနော်တို့ဖက်ကနေလည်း စီစဥ်စရာရှိတာတွေ စီစဥ်ထားပါတယ်၊ ဆရာဝန်ရော၊ ဆေးဝါးတွေရော၊ အရပ်ထဲက လက်သည်တွေကိုလည်း အကူအညီတောင်းထားတယ်” ဟု စစ်ရှောင်များကို ကူညီပေးနေသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် တောင်ကြီးမြို့ပေါ်နှင့် မွေးလစေ့ ကိုယ်ဝန်သည်စစ်ရှောင်များရှိနေသည့် တခြားနေရာများတွင်လည်း လိုအပ်လာနိုင်သည့် အသုံးအဆောင်ပစ္စည်းများနှင့် နေရာများကို ပြင်ဆင်ထားကြောင်း စစ်ရှောင်များကို ကူညီပေးနေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မွေးလာမယ့်ကလေးအတွက် လိုအပ်မယ့် အနှီးတွေ၊ အဝတ်အစားတွေ၊ ဆေးဝါးတွေ၊ ပေါင်ဒါတွေကအစ မိခင်အတွက်ရော အလှူခံထားတယ်၊ အဆင်သင့်ဖြစ်အောင်ပေါ့၊ လိုအပ်လာရင် တခါတည်း လုပ်ပေးရအောင် တတ်နိုင်သမျှ စီစဥ်ပေးထားပါတယ်” ဟု အဆိုပါ အမျိုးသမီးက သျှမ်းသံတော်ဆင့်ကို ပြောသည်။
ပင်းတယမြို့သို့ ရောက်ရှိလာသည့် စစ်ရှောင်ကိုယ်ဝန်သည် အမျိုးသမီးတစ်ဦးသည် ကရင်နီဘက်မှ သျှမ်းပြည်တောင်ပိုင်းအတွင်း ရောက်လာသည့် မွေးလူနာများအနက် ပထမဆုံး ခွဲမွေးရသည့် မွေးလူနာ ဖြစ်ကြောင်းလည်း သိရသည်။
စစ်ကောင်စီ၏ လေကြောင်းထိုးစစ်ဆင်မှုကြောင့် ကရင်နီပြည်မှ ဒေသခံ ၂ သိန်း နီးပါး နေရပ်စွန့်ခွာ ထွက်ပြေးနေရကြာင်း သိရသည်။
