စစ်ရှောင်များကို ကူညီလက်ခံပေးမှုအပေါ် ဖိအားပေးမှုရှိလာပါက တုံ့ပြန်မှုပြုမည်ဟု PNLO ပြော

ကရင်နီမှ စစ်ဘေးရှောင်ပြည်သူများကို ကူညီလက်ခံပေးမှုအပေါ် ဖိအားပေးမှုများရှိပါက တတ်နိုင်သည့်ဘက်မှ လက်တုန့်ပြန်မှုများ ပြုမှုဖြစ်ကြောင်း PNLO တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ကရင်နီဘက်က ပြည်သူတွေက ကျနော်တို့ရဲ့ အနီးစပ်ဆုံးမိတ်ဆွေ၊ ပြီးတော့ ညီအစ်ကိုတိုင်းရင်းသားအချင်းချင်း ပေါ့၊ ကျနော်တို့ရဲ့ အမျိုးအဆွေတွေကို ဒီလို ကူညီပေး လုပ်ပေးတဲ့အပေါ်မှာ ဖိအားပေးမှုတွေ ရှိလာရင်တော့ ကျနော်တို့က တတ်နိုင်တဲ့ နည်းလမ်းနဲ့ တုံ့ပြန်သွားဖို့ ရှိပါတယ်” ဟု PNLO မှ ခွန်သိန်းနီက သျှမ်းသံတော်ဆင့်ကို ပြောသည်။

လက်ရှိတွင် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) နယ်မြေအတွင်း ကရင်နီဘက်မှ စစ်ရှောင် လာသည့် ပြည်သူ (၂၀၀၀ မှ ၃၀၀၀) ကြား ရှိနေပြီး စစ်ရှောင်များကို လူသားချင်းစာနာထောက်ထားမှုနှင့် ညီအစ်ကို တိုင်းရင်းသားအချင်းချင်း ကူညီထောက်ပံ့မှုများ ပေးနေကြောင်း PNLO က ပြောသည်။

“လက်ရှိ PNLO/PNLA နယ်မြေထဲမှာ စစ်ရှောင် ၂၀၀၀ ကနေ ၃၀၀၀ အထိရှိလာတယ်၊ ဆိုင်ကယ်နဲ့လာနေတဲ့ သူတွေလည်း အများကြီးရှိလို့ ဦးရေထပ်တိုးနိုင်တဲ့ အခြေအနေရှိပါတယ်၊ ဘယ်လိုပဲဖြစ်ဖြစ် ကျနော်တို့မှာ ရှိနေတဲ့ စွမ်းအင်နဲ့ တတ်နိုင်သမျှ ကူညီပေးသွားပါမယ်” ဟု ခွန်သိန်းနီက ပြောသည်။

ပြီးခဲ့သည့် တစ်ပတ်အတွင်းမှ စတင်ကာ လွိုင်ကော်မြို့ပေါ်တွင် တိုက်ပွဲများ တောက်လျှောက်ဖြစ်ပေါ်ခဲ့ပြီး လွိုင်ကော်မြို့မှ ပြည်သူများ စစ်ဘေးရှောင်သည့် အနေဖြင့် သျှမ်းပြည်တောင်ပိုင်းကို ရောက်လာခဲ့ကြရာ PNLO/PNLA နယ်မြေအတွင်း ရောက်လာသည့် စစ်ရှောင်များကို ယမန်နေ့ ဇန်နဝါရီလ ၁၁ ရက်နေ့မှ စတင်ကာ ကူညီမှုများ ပေးသွားမည်ဖြစ်ကြောင်း သိရသည်။

ထို့အပြင် လက်ရှိ ဖြစ်ပွားနေသည့် စစ်ကောင်စီဘက်မှ အကြမ်းဖက်လုပ်ရပ်များနှင့် တိုင်းရင်းသားဒေသအတွင်း အင်အားသုံး ထိုးစစ်ဆင်နေမှုများကို ရပ်တန်းကမရပ်နိုင်ပါက အခြေအနေများ ပိုမိုရှုပ်ထွေးလာနိုင်ကြောင်းလည်း ခွန်သိန်းနီက ဆက်လက်ပြောသည်။

“စစ်သလင်းဖြစ်သွားတဲ့ လွိုင်ကော်မြို့က ပြည်နယ်တစ်ခုရဲ့ မြို့တော်ပါ၊ အခုဖြစ်နေတာက တိုင်းရင်းသားတပ် ကနေ စစ်တပ်ကို သွားပြီး စ ပစ်နေတာ မဟုတ်ဘူး၊ စစ်တပ်တွေကသာ တိုင်းရင်းသားနယ်မြေကို လာပြီး ပစ်ခတ်နေလို့ ခုခံကာကွယ်တာက လုပ်ကို လုပ်ရမှာပဲလေ၊ တိုင်းရင်းသားတွေ ခုခံကာကွယ်တာကို စစ်တပ်တွေက အတင်းအဓ္ဓမ အနိုင်ကျင့် ဖိနှိပ်စော်ကားတာတွေ ရပ်တန်းကရပ်ဖို့လိုအပ်ပြီ၊ မရပ်ဘူးဆိုရင်တော့ မခံနိုင်တဲ့အခါမျိုးမှာ အခြေအနေတွေက တအားကို ရှုပ်ထွေးလာနိုင်တယ်” ဟု ခွန်သိန်းနီက ဆိုသည်။

ယမန်နေ့ ဇန်နဝါရီ ၁၁ ရက်နေ့တွင် ဆီဆိုင်မြို့နယ်အတွင်း စစ်ဘေးရှောင်လာသော ကရင်နီမှ ပြည်သူများကို PNLO/PNLA တို့က ဆန်၊ ဆီ၊ ဆား နှင့် လူသုံးကုန်ပစ္စည်းတချို့ ကူညီပေးခဲ့ကြောင်းလည်း သိရသည်။

PNLO တွင် ဗိုလ်မှူးကြီး ခွန်ဥက္ကာ ၊ ခွန်သူရိန် နှင့် ခွန်မြင့်ထွန်းတို့ ဦးဆောင်ပြီး ၂၀၁၅ ခုနှစ် အောက်တိုဘာ ၁၅ ရက်တွင် တနိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူ စာချုပ် (NCA)၌ ပါဝင်လက်မှတ် ရေးထိုးခဲ့သည့် တိုင်းရင်းသားလက်နက်ကိုင် တပ်ဖွဲ့တစ်ခုလည်း ဖြစ်သည်။