သျှမ်းပြည်အရှေ့ပိုင်း ကျိုင်းတုံမြို့နယ်တွင် နေ့စဉ်ဆက်တိုက် ကိုဗစ် – ၁၉ လူနာ တွေ့ရှိခဲ့ရာမှ ပြီးခဲ့သည့် ဇန်နဝါရီ (၁၀)ရက်နေ့တွင် ပထမဆုံးအကြိမ် ကိုဗစ် ပိုးရှိလူနာ မတွေ့ခဲ့ရကြောင်း သတင်းရရှိသည်။
“အခုတော့ ပြည်သူတွေ အိမ်ပြင်ထွက် သွားလာနေတာတွေတော့ ရှိနေပြီ။ ကျနော်တို့ ပြည်သူတွေလည်း ကျန်းမာရေး ဂရုစိုက်ကြလို့ အခုလိုမျိုး ပိုးတွေ့လူနာတွေက လျော့ကျလာတယ်လို့ ထင်ပါတယ်” ဟု ကျိုင်းတုံမြို့မှ လူငယ် အမျိုးသားတစ်ဦးက ပြောသည်။
ကျိုင်းတုံမြို့တွင် ဇွန်လမှ စပြီး ကိုဗစ် ၁၉ ကူးစက် ပြန့်ပွားခဲ့ကာ လက်ရှိ ဇန်နဝါရီလအထိ ကူးစက်သူများ ရှိနေသေးကြောင်း သိရသည်။
ထို့အပြင် လက်ရှိ ကျိုင်းတုံမြို့တွင် ကိုဗစ် ၁၉ ပိုးတွေ့လူနာများသည် နေအိမ်တွင် မိမိကိုယ်ကို ကုသနေသူများလည်း ရှိနေကြောင်း သိရသည်။
“သတင်းတွေကြည့်တာတော့ ပိုးကူးသူ မရှိတော့ဘူးလို့ ပြောတယ်။ ဖြစ်နေတဲ့သူတွေတော့ ရှိနေသေးတယ်။ ကိုယ့်အိမ်မှာပဲ ကုနေကြတာတွေ ရှိတယ်။ ဒီ ကိုဗစ်က ပျောက်သွားပြီလား ဆိုတော့ မပျောက်သေးဘူး။ အခြေအနေဆိုးရင်တော့ ဆေးရုံမှာ သွားကုကြတာပေါ့” ဟု ကျိုင်းတုံမြို့ ဒေသခံ အမျိုးသားတစ်ဦးက ပြောသည်။
အလားတူ ကျိုင်းတုံမြို့နယ် လွယ်မွေ ချယ်ရီပန်းပွဲတော်လည်း ဇန်နဝါရီ (၁၀)ရက်နေ့က ပြီးဆုံးသွားပြီ ဖြစ်သဖြင့် ကိုဗစ် ၁၉ ပိုးတွေ့လူနာများ ထပ်ရှိလာမှာကိုတော့ ဒေသခံများက စိုးရိမ်နေကြသည်။
ကျိုင်းတုံမြို့တွင် ဇန်နဝါရီ (၁၁)ရက်နေ့ထိ ကိုဗစ် ၁၉ ပိုးတွေ့လူနာ ဆေးကုသနေသူ စုစုပေါင်း (၂၆)ဦးရှိပြီး သေဆုံးသူ (၉၂)ဦး ရှိခဲ့ကြောင်း သိရသည်။
