ကရင်နီ (ကယားပြည်) တွင် ယမန်နေ့ (ဇန်နဝါရီ ၉)ရက်တွင် အာာဏာသိမ်း စစ်ကောင်စီ မှ လေကြောင်းဖြင့် တိုက်ခိုက်ကာ ဒီးမော့ဆိုမြို့နယ် နမ့်မယ်ခုံကျေးရွာတွင် ပြည်သူပိုင် အဆောက်အအုံများစွာ ထိခိုက်ပျက်စီးပြီး အသက် ၅၅ နှစ် အရွယ်ရှိ အမျိုးသမီး သေဆုံးသွားကြောင်း သတင်းသိရသည်။
ယမန်နေ့ ဇန်နဝါရီလ ၉ ရက်နေ့ မနက်ပိုင်းတွင် စစ်ကောင်စီတို့သည် ဒီးမော့ဆိုမြို့နယ်အတွင်းကို ရဟတ်ယာဉ်ဖြင့် (၃) ကြိမ် လာရောက်ပစ်ခတ်တိုက်ခိုက်ခဲ့သည့်အပြင် ညအချိန်တွင်လည်း လေကြောင်း တိုက်ခိုက်မှုများ ထပ်မံပြုလုပ်ခဲ့ကြောင်း မြေပြင်ဖြစ်စဥ်များကို သိရှိသည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနက်ကလည်း ၁၀ ခေါက်ကျော် လေယာဥ်နဲ့ လာပစ်သွားပြီးပြီ၊ နောက် ညဘက်မှာလည်း လေယာဥ်နဲ့ ပြန်လာပစ်တယ်၊ လွိုင်ကော် အမြှောက်တပ်ကနေ ဒီးမော့ဆိုထဲကို လက်နက်ကြီးနဲ့ ထပ်ပစ်တယ်၊ မနေ့ညက ပစ်တဲ့အသံကြောင့် အမျိုးသမီးကြီး တစ်ဦးက ထိတ်လန့်ပြီး နှလုံးရပ်ပြီးတော့ သေဆုံးသွားရတယ်” ဟု ၎င်း က ပြောသည်။
ယင်းပစ်ခတ်မှုများကြောင့် အသက် ၅၅ နှစ်အရွယ်ရှိ အမျိုးသမီးကြီးတစ်ဦးသည် ပုန်းခိုနေရာမှ လက်နက်ကြီး သံများ အဆက်မပြတ်ကြားနေရသည့်အတွက်ကြောင့် ထိတ်လန့်ပြီး အသက်ရှုရပ်ကာ သေဆုံးသွားရကြောင်း သိရသည်။
“သူ့အိမ်ပေါ်ကိုလည်း လက်နက်ကြီးကျတယ်၊ အဲ့ကြောင့် စိတ်ထိခိုက်တာလည်းပါမယ်၊ ပြီးတော့ လက်နက်ကြီးတွေက အဆက်မပြတ်ပစ်နေတော့ မခံနိုင်တာလည်း ပါမယ်၊ အသက်ကြီးနေပြီဆိုတော့လေ၊ သူသေဆုံးတဲ့အချိန် သူ့သားက ဘေးနားမှာ ရှိနေပါတယ်” ဟု ဒီးမော့ဆိုမြို့နယ် အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယနေ့(ဇန်နဝါရီ ၁၀)ရက် လက်ရှိအချိန်ထိ အာဏာသိမ်းစစ်ကောင်စီတပ်သည့် ကရင်နီပြည်အတွင်း ရမ်းသမ်းပစ်ခတ်မှု၊ ရဟတ်ယာဉ်အသုံးပြု တိုက်ခိုက်မှုကြောင့် ပြည်သူများသည် သျှမ်းပြည်တောင်ပိုင်းသို့ ထွက်ပြေးတိမ်းရှောင်လာကြပြီး ၎င်းတို့အတွက် အကူအညီများစွာ လိုအပ်နေကြောင်း သိရသည်။
