ကရင်နီပြည်မှ သျှမ်းတောင် ညောင်ရွှေမြို့နယ် အင်းလေးဒေသ နမ့်ပန်ကျေးရွာအတွင်း ကရင်နီပြည်ဘက်မှ လာသည့် စစ်ရှောင်များ၊ ဧည့်သည်များကို လက်မခံရန် ရပ်ကွက်အုပ်ချုပ်ရေးမှူး လော်စပီကာဖြင့် လိုက်လံနှိုးဆော်နေကြောင်း စုံစမ်းသိရသည်။

ကရင်နီပြည် လွိုင်ကော်မြို့ပေါ်ထိ အာဏာသိမ်းစစ်ကောင်စီမှ တိုက်လေယာဉ်၊ စစ်ရဟတ်ယာဉ်နှင့် တင့်ကားများကို အသုံးပြုပြီး တိုက်ခိုက်မှုများပြုလုပ်သဖြင့် ပြည်သူများက ဘေးလွတ်ရာ သျှမ်းတောင်ဘက်သို့ အများအပြား ရွှေ့ပြောင်းလာကြသည်။

ထိုရွှေ့ပြောင်းလာကြသည့်သူများသည် အင်းလေး ဒေသအတွင်း ဆွေမျိုးများထံ သွားရောက်နေထိုင်ခွင့်မရကြောင်း၊ ကျေးရွာအုပ်ချုပ်ရေးမှူးမှ နေအိမ်တွင် တခြားဒေသမှ လာသည့် စစ်ရှောင်များအား လက်မခံရန် လော်စပီကာဖြင့် ကျေးရွာတွင် လိုက်လံ နှိုးဆော်နေကြောင်း နမ့်ပန်ဒေသခံများ ပြောပြချက်အရ သိရသည်။

“နေအိမ်မှာ စစ်ရှောင်လက်မခံဖို့ လော်နဲ့ ညပိုင်းမှာ လိုက်အော်တယ်၊ ဆွေမျိုးအရင်းတောင် လက်မခံရဘူး။ သူတို့က ကိုယ်တွေဆီ အားကိုးတကြီးနဲ့ လာကြတာ။ အုပ်ချုပ်ရေးမှူးက လက်မခံခိုင်းတော့ စိတ်မကောင်းဘူး” ဟု အင်းလေး ဒေသခံ တစ်ဦးက သျှမ်းသံတော်ဆင့်ကို ပြောသည်။

ကရင်နီပြည်မှ လာသည့် စစ်ရှောင်များကို အင်းလေးဒေသ မကျီးဆိပ်ကျေးရွာနှင့် ကြေးစားကုန်းကျေးရွာ ဘုန်းကြီးကျောင်းတွင်သာ နေရန် ပြောသည်။

အင်းလေးဒေသ နမ့်ပန်ကျေးရွာ အုပ်ချုပ်ရေးမှူးသည် တခြားနေရာဒေသမှ ပြောင်းရွှေ့လာသည့်သူဖြစ်ကြောင်း၊ အင်းလေးဒေသခံ မဟုတ်ကြောင်းလည်း သိရသည်။

ယခုရက်ပိုင်း ကရင်နီပြည် လွိုင်ကော်မြို့အနီးတွင် နေ့စဉ်ရက်ဆက် တိုက်ပွဲဖြစ်ပွားနေသဖြင့် ယနေ့ (ဇန်နဝါရီ ၉)ရက် မနက်ပိုင်းတွင် ကရင်နီပြည်သူများသည် သျှမ်းတောင်ဘက်သို့ ရွှေ့ပြောင်းတိမ်းရှောင်လာကြကြောင်း သိရသည်။