ကရင်နီပြည် လွိုင်ကော်မြို့ပေါ်အထိ အာဏာသိမ်း စစ်ကောင်စီနှင့် ဒေသခံ ပြည်သူ့ကာကွယ်ရေးတပ်ဖွဲ့တို့တိုက်ပွဲများဆက်တိုက်ဖြစ်ပွားမှုကြောင့် ပြည်သူများသည် သျှမ်းတောင် အောင်ပန်း၊ ကလောနှင့် တောင်ကြီးမြို့ပေါ်များအထိ စစ်ဘေးရှောင်လာရကြောင်း သတင်းသိရသည်။

စစ်ဘေးရှောင်ရောက်ရှိလာသည့် ပြည်သူများသည် နေထိုင်တည်းခိုရန်အတွက် အိမ်များ၊ အခန်းများ ငှားရမ်းရာတွင် တချို့ နေအိမ်ပိုင်ရှင်များသည် ဈေးနှုန်းအဆမတန် တောင်းဆိုခြင်းများရှိသည့်အတွက် စစ်ဘေးရှောင်များအတွက် များစွာ အခက်ခဲရှိနေကြောင်း သတင်းသိရသည်။

“ဒီမနက်စောစော မြို့ထဲမှာ အိမ်ငှားပတ်ရှာတာ စစ်ဘေးရှောင်တွေ အတွက်ပါ ဆိုလည်း ဈေးတွေက သိန်းဂဏန်း တွေချည်းပဲ၊ လိုင်းပေါ်တင်ပြီး အကူညီတောင်းတော့မှ ကူညီတဲ့သူတွေပေါ်လာတယ်၊ အောင်ပန်း၊ ကလော၊ ပင်းတယတွေဘက်မှာလည်း ကူညီမယ်လို့ ပြောလာကြတာ များတယ်၊ အစောပိုင်းက ဈေးနှူန်းမြင့်တဲ့သူတွေလည်း ပြန်လျှော့ပေးကြတယ် ” ဟု စစ်ဘေးရှောင်များအတွက် အိမ်ငှားများ လိုက်လံရှာဖွေပေးသူတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတို့သည် ကရင်နီပြည် လွိုင်ကော်မြို့ပေါ်ထိ ရဟတ်ယာဥ်နှင့် တိုက်လေယာဥ်များအပြင် တပ်သားအင်အားများစွာဖြင့် တင့်ကားများ အသုံးပြုကာ ဒေသခံ ပြည်သူ့ကာကွယ်ရေးတပ်များကို တိုက်ခိုက်သည့်အတွက် ပြည်သူများ၏ အိုးအိမ် ပစ္စည်းများ ပျက်စီးကာ ဘေးကင်းရာသို့ ထွက်ပြေး တိမ်းရှောင်ရကြောင်း စစ်ဘေးရှောင်များကို အကူအညီပေးနေသူတစ်ဦးက သျှမ်းသံတော်ဆင့်ကို ပြောသည်။

“တိုက်ပွဲတွေက မြို့ထဲအထိ ပြင်းထန်လာတော့ နေလို့မရတော့ဘူးလေ၊ ဒီဖက်ကို အများကြီးပြောင်းလာတယ်၊ မနေ့ညကလည်း လာတဲ့သူရှိတယ်၊ ဒီနေ့ကတော့ အများဆုံးလာကြတယ်၊ ဒီဖက်က ကားတွေနဲ့ သွားကြိုပေးလို့ရတဲ့ နေရာဖြစ်ရင် သွားကြိုပေးတယ်” ဟု တောင်ကြီးမြို့မှ စစ်ဘေးရှောင်များကို ကူညီပေးနေသူတစ်ဦးက သျှမ်းသံတော်ဆင့်ကို ပြောသည်။

လက်ရှိ သျှမ်းပြည် တောင်ပိုင်းမှ မြို့နယ်များတချို့တွင် ရောက်ရှိလာသော ကယားပြည်ဘက်မှ စစ်ဘေးရှောင်များ ဆက်လက်ရှိနေသည့်အတွက် ၎င်းတို့ နားခိုရန်အတွက် အဆောက်အအုံများနှင့် အစားအသောက်များလည်း ဆက်လက် လိုအပ်နေသေးကြောင်း အထက်ပါ ပုဂ္ဂိုလ်က ပြောသည်။

တိုက်ပွဲများပြင်းထန်နေသည့် လွိုင်ကော်မြို့တွင် မြို့အ၀င်အထွက်နှင့် လွိုင်ကော်-ဆီဆိုင်-တောင်ကြီး အသွားလမ်း တစ်လျှောက် စစ်ကောင်စီတပ်သားများက နေရာယူထားပြီး တချို့သော ခရီးသည်ကားများကို စစ်ကောင်စီတို့က ပစ်ခတ်သဖြင့် စစ်ရှောင်လာသော တချို့ပြည်သူများသည် စစ်မြေပြင်တွင် ကျန်ရှိနေသေးကြောင်း သတင်းသိရသည်။