သျှမ်းပြည်တောင်ပိုင်း ကလောမြို့နယ် ရေယားစစ်ဆေးရေးဂိတ်တွင် ယာဉ်မောင်း အမျိုးသားတစ်ဦးကို စစ်ကောင်စီ က ပစ်သတ်ပြီး အလောင်းပြန်မပေးကြောင်း သတင်းသိရသည်။
ပြီးခဲ့သည့် ဇန်နဝါရီလ ၄ ရက်နေ့ ညသန်းခေါင် ၁ နာရီကျော်အချိန် ကလောမြို့ ရေယားစစ်ဆေးရေးဂိတ်အနီးတွင် ကားတစ်စီးကို စစ်ဆေးမှုမပြီးခင် မောင်းထွက်သွားသည့် အကြောင်းပြချက်ဖြင့် သေနတ်ဖြင့်ပစ်လိုက်ရာ ကားမောင်းသူ သေဆုံးသွားပြီး ယာဥ်နောက်လိုက်တစ်ဦးက ထွက်ပြေးလွတ်မြောက်သွားကြောင်း သိရသည်။
“ကားမောင်းသူကလည်း ဝက်ဖြူကျေးရွာကပါပဲ၊ ယာဥ်နောက်လိုက်ကတော့ ကားပေါ်ကနေ ခုန်ဆင်းပြီး အမှောင်ထဲပြေးသွားလို့ လွတ်လာတယ်၊ ကျည်ရှပ်ထိရာ နှစ်ချက်ရှိတယ် ပုခုံးနားမှာ၊ ကားမောင်းသူကတော့ သေဆုံးသွားတယ်” ဟု ဖြစ်စဥ်များကို သိရှိရသည့် အမည်မဖော်လိုသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီတို့ ပစ်သတ်ပြီး သေဆုံးသွားသည့် ကားသမားသည် ကလောမြို့နယ် ဝက်ဖြူကျေးရွာနေ ကိုရွှေထူး အသက် ၄၈ နှစ်ဖြစ်ပြီး ရုပ်အလောင်းကိုလည်း မိသားစုထံ ပြန်မပေးဘဲ ဇန်နဝါရီလ ၅ ရက်နေ့ ညနေပိုင်းအချိန် ကလောမြို့ မြို့မသုဿန်တွင် မီးသင်္ဂြိုဟ်လိုက်ကြောင်း သိရသည်။
“အလောင်းကို ပြန်မပေးဘူး၊ မိသားစုဝင်တွေသွားတောင်းတဲ့အချိန်မှာ အထက်အမိန့်ကို စောင့်ရအုံးမယ်ဆိုပြီး ပြောလွှတ်လိုက်တယ်၊ ညနေရောက်တော့ ရုပ်အလောင်းကို ကလောသုဿန်မှာ သူတို့ (စကစ)က မီးသင်္ဂြိုဟ်လိုက်ပြီ ဆိုပြီး ဖုန်းဆက်အကြောင်းကြားလာတာ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် စစ်ကောင်စီတပ်သားတို့၏ မတရားသတ်ဖြတ်မှုများ တစ်နေ့တစ်ခြားများပြားလာပြီး သျှမ်းပြည်တောင်ပိုင်းအတွင်းတွင် စစ်ကောင်စီမှ ပစ်သတ်ပြီး အလောင်းပြန်မရသည့် ကားသမား နှစ်ဦးရှိကြောင်း သိရသည်။
Leave a Comments