စစ်ကောင်စီ အာဏာသိမ်းပြီးနောက် ကျောက်မဲ မူးယစ်ပြဿနာ ပိုဆိုးလာ

0

သျှမ်းမြောက် ကျောက်မဲမြို့နယ်အတွင်း မူးယစ်ဆေးဝါးပြဿနာသည် စစ်ကောင်စီ အာဏာသိမ်းပြီးနောက်ပိုင်း ပိုမိုဆိုးရွားလာကြောင်း စုံစမ်းသိရသည်။

“အာဏာမသိမ်းခင်ကာလကတည်းက မူးယစ်ဆေးသုံးစွဲတာတွေ များတယ်၊ အာဏာလည်း သိမ်းပြီးရော မူးယစ်ဆေးပြဿနာက ပိုဆိုးသွားတယ်၊ ရဲတွေလည်း လုံခြုံရေးမလုပ်နိုင်တော့ဘူး၊ မြို့ပတ်ချာလည်တောင် ကင်းမလှည့်နိုင်တော့ဘူး၊ သူတို့လုံခြုံရေးအတွက် အကာအရံတွေ လုပ်နေရတယ်၊ ဒါလည်း အားလုံးအသိပဲ၊ အဲ့တော့ မူးယစ်ဆေး သယ်တာတွေ၊ ရောင်းဝယ်တာတွေက အရမ်းကို များလာတယ်” ဟု ကျောက်မဲခရိုင် မာနာအသင်း ဥက္ကဌ ဦးတင်မောင်သိန်းက သျှမ်းသံတော်ဆင့်ကို ပြောသည်။

ကျောက်မဲမြို့နယ်တွင် မူးယစ်ဆေးဝါး သုံးစွဲသူ၊ ရောင်းဝယ်သူများထဲတွင် အသက် ၁၀ နှစ်ဝန်းကျင် ကလေးငယ်များလည်း ပါဝင်ပြီး အမျိုးသမီးများလည်း ပိုမိုသုံးစွဲလာကြောင်း သိရသည်။

“ကျနော်တို့ မြို့မှာက ကလေးတွေ လူမမယ်လေးတွေ မူးယစ်ဆေးသုံးတာများလာတယ်၊ မိန်းကလေးတွေ ပျက်စီးတာ များလာတယ်၊ ကျနော်တို့ တွေ့နေရတာက အသက် ၁၀ နှစ် ၁၂ နှစ်ဝန်းကျင်တွေလည်း ပါတယ်၊ အသက် အငယ်ဆုံးလို့ ပြောလို့ရတဲ့ ၈ နှစ်အရွယ်ဝန်းကျင် ကလေးတွေတောင် တွေ့နေရတယ်၊ အမျိုးသမီးကြီးတွေလည်း ပါတာပဲ” ဟု ဦးတင်မောင်သိန်းက ဆက်ပြောသည်။

စစ်ကောင်စီ အာဏာသိမ်းပြီး နောက်ပိုင်း ကျောက်မဲမြို့ ရပ်ကွက်(၉) နှင့် တောင်နောက်ကြားရှိ လယ်ကွင်း (ဒေသအခေါ် သဖန်းဆိပ်)တွင် မူးယစ်ဆေးဝါးကို ပေါ်ပေါ်ထင်ထင် သုံးစွဲလာကြောင်း သိရသည်။

ထိုသဖန်းဆိပ်နေရာတွင် မူးယစ်ဆေးဝါးသုံးစွဲသူ၊ ဝင်ထွက်သွားလာနေသူ နေ့စဉ် ရာနှင့်ချီရှိနေကြောင်း ဒေသခံများက ပြောသည်။

“အရင်ကတော့ ဒီ အင်ကျင်းတောင်ဘက်တွေမှာ များတယ်၊ တိုက်ပွဲတွေဖြစ်တော့ မြို့ပေါ်ကို ပြောင်းလာတဲ့သူများတယ်၊ အိမ်သစ်တွေလာဆောက်တယ်၊ အဲ့တောင်ပေါ်မှာ နေရာလွတ်သိပ်မရှိတော့ဘူး၊ ခုက တောင်နောက်ဘက်မှာ သွားစုနေကြတာ၊ ပြီးတော့ သင်္ဂြိုင်းကုန်းအဟောင်းဘက်တွေမှာ များတယ်၊ ကျနော်တို့မြို့ကတော့ မူးယစ်ဆေးဝါးက အခြေနေ အရမ်းကို ဆိုးနေပြီ” ဟု ရပ်ကွက် (၈)နေ လူငယ်အမျိုးသားတစ်ဦးက ပြောသည်။

ပြီးခဲ့သည့် ၂၀၂၁ ခုနှစ်အတွင်း ကျောက်မဲမြို့နယ်တွင် တိုင်းရင်းသားလက်နက်ကိုင်တိုက်ပွဲကြောင့် စစ်ရှောင်လာရသည့် ပြည်သူ ထောင်ချီရှိခဲ့ပြီး ယနေ့အချိန်ထိ နေရပ်မပြန်နိုင်သေးသူ ရာချီကျန်ရှိနေဆဲဖြစ်သည်။

ထို့အပြင် ကျောက်မဲမြို့တွင် အိမ်ရာမဲ့များလည်း ပိုမိုများပြားလာပြီး ပစ္စည်းခိုးယူခံရမှုလည်း များပြားလာ ကြောင်း ဒေသခံများထံမှ သိရသည်။

Leave a Comments