သျှမ်းပြည်အရှေ့ပိုင်း ကျိုင်းတုံမြို့နယ်တွင် ပြုလုပ်မည့် လွိုင်မွေ ချယ်ရီပွဲတော်ကြောင့် ကိုဗစ် – ၁၉ ပိုးတွေ့လူနာ ထပ်တိုးလာမည်ကို ဒေသခံများက စိုးရိမ်နေကြောင်း စုံစမ်းသိရှိရသည်။

ကျိုင်းတုံမြို့ လွိုင်မွေ ချယ်ရီပွဲတော်ကို ယနေ့ ဇန်နဝါရီ (၆) ရက်နေ့မှ (၁၀) ရက်နေ့အထိ ပြုလုပ်သွားမည်ဖြစ်ကြောင်း၊ ပွဲတော်လာမည့်သူများပြားပါက ကိုဗစ် ၁၉ ထပ်တိုးလာနိုင်ကြောင်း၊ လက်ရှိမှာလည်း ကျိုင်းတုံမြို့တွင် ကိုဗစ် ၁၉ ပိုးတွေ့လူနာများရှိနေသေးကြောင်း ကျိုင်းတုံမှ သံဃာတော်တစ်ပါးက သျှမ်းသံတော်ဆင့်ကို မိန့်သည်။

“ကျိုင်းတုံမှာကတော့ ပိုးတွေ့လူနာတွေ ရှိနေသေးတယ်။ ပွဲလုပ်တာက အဓိကတော့ မဟုတ်ပါဘူး။ ဒါပေမဲ့ မြို့ထဲမှာလည်း ပိုးတွေ့လူနာတွေက ရှိနေသေးတော့ ပွဲလုပ်လိုက်ရင် ပိုးတွေ့လူနာတွေ အရင်ကထပ် များလာမှာကိုတော့ စိုးရိမ်တာပေါ့” ဟု ကျိုင်းတုံမြို့မှ သံဃာတော်တစ်ပါးက မိန့်သည်။

ထိုလွိုင်မွေတောင်ကို ဒီဇင်ဘာလကုန်ကစပြီး တခြားမြို့နယ် ဒေသခံအများအပြားက သွားရောက်လည်ပတ် လျက်ရှိကြောင်း သိရသည်။

ထိုသို့ လွိုင်မွေတောင်ကို လာလည်သူများအနေဖြင့် Mask (နှာခေါင်းစည်)ကို အမြဲတပ်ဆင်ထားရန်၊ လက်ကို မကြာခဏဆေးရန်၊ ကျန်းမာရေးအရ ဆောက်ရွက်ပေးကြရန်လည်း ကျိုင်းတုံ ဒေသခံများက တောင်းဆိုလိုက်သည်။

“ပွဲမလုပ်လည်း သူများကတော့ ဒီဇင်ဘာ လကုန် ကတည်းက လာလည်ကြတယ်။ သူက ချယ်ရီတွေပွင့်ပြီးလှတော့ လာလည်တဲ့သူတွေ များတယ်။ လာလည်တယ်ဆိုပေမဲ့ တချို့က (Mask) မတပ်ကြဘူးလေ။ ဒါကြောင့် ကျနော်တို့ကတော့ လာတဲ့သူတိုင်းကို mask တပ်စေချင်တယ်။ ရောဂါ မပြန့်ပွားအောင် ထိန်းချုပ်စေချင်တယ်” ဟု ကျိုင်းတုံမြို့‌ ဒေသခံ အမျိုးသားတစ်ဦးက ပြောသည်။

လွိုင်မွေတောင် ချယ်ရီပွဲတော်ကို အာဏာသိမ်းစစ်ကောင်စီ လက်အောက်ခံ ဟိုတယ်နှင့် ခရီးသွားလာရေးဝန်းကြီးဌာနက ကျင်းပရန် စီစဉ်ထားကြောင်း သိရသည်။

လွိုင်မွေတောင်သည် ဆောင်းရာသီကာလ၌ ချယ်ရီပန်းများပွင့်ဖူးကာ လှပနေပြီး ပြည်သူအများစု သွားရောက်လည်ပတ်လေ့ရှိသည့် နေရာဒေသတစ်ခုဖြစ်သည်။