Thursday, June 20, 2024

စစ်ကောင်စီမှ ပရဟိတကားများကို ည ဂိတ်မဖြတ်ရန် တားမြစ်

Must read

သျှမ်းပြည်တောင်ပိုင်း အတွင်းရှိ စစ်ကောင်စီ စစ်ဆေးရေးဂိတ်များတွင် ပရဟိတကားများကို ည ဝင်ထွက် သွားလာမှုမပြုရန် တားမြစ်သဖြင့် လူနာတင်ပို့ရန် အခက်အခဲများစွာရှိနေကြောင်း သတင်းသိရသည်။

လူမှုရေးပရဟိတလုပ်ငန်းများ ကူညီဆောင်ရွက်ပေးနေသော သျှမ်းတောင်မှ ပရဟိတအသင်း တစ်သင်းသည် တောင်ကြီးမြို့ရှိ စဝ်စံထွန်းဆေးရုံသို့ အရေးပေါ်လူနာပို့ဆောင်ရန်အတွက် ထွက်လာစဉ် အေးသာယာ ထုံးဖိုစစ်ဆေးရေးဂိတ်၌ တားမြစ်စစ်ဆေးခံရပြီး နောက်နောင်တွင် ညအချိန် သွားလာခြင်းမပြုရန် သတိပေးခြင်းခံရကြောင်း သတင်းသိရသည်။

“ဇန်နဝါရီလ ၁ ရက်နေ့ကပါ၊ လူနာပါရင် ဂိတ်ကို ပေးဖြတ်တယ် ဆိုပေမဲ့ ကျနော်တို့ စကားပြောရတာ ကြာတာပေါ့၊ သူတို့ စစ်တာ မေးတာနဲ့ အခန့်မသင့်ရင် လူနာက အသက်မဆုံးရှုံးသင့်ဘဲ ဆုံးရှုံးသွားနိုင်တယ်” ဟု အဆိုပါ ပရဟိတအသင်းဝင်တစ်ဦးက သျှမ်းသံတော်ဆင့်ကို ပြောသည်။

တောင်ကြီး – အေးသာယာ အတက်အဆင်းလမ်း ထုံးဖိုစစ်ဆေးရေးဂိတ်တွင် စောင့်နေသည့် စစ်ကောင်စီတပ်သားများသည် ညအချိန်တွင် အရက်သောက်ပြီး ပရဟိတကားများကို မလိုအပ်သည့် မေးမြန်းမှုများ ပြုလုပ်သည့်အတွက် လူနာများအတွက် စိုးရိမ်စရာဖြစ်ကြောင်း သိရသည်။

“ညည ဗိုလ်ကြီးဆိုတဲ့ အမူးတွေ ရစ်ခံရတာ များလာရင် ပရဟိတ ကူညီကယ်ဆယ်ရေး လုပ်နေသူတွေအနေနဲ့ စိတ်ကုန်သွားနိုင်တယ် ကြောက်သွားနိုင်ပါတယ်၊ သူတို့မူးတဲ့အချိန်မှာ ဂိတ်ရောက်ရင်၊ စစ်ဆေးခံရရင် တခါတလေ လှည့်ပြန်ရတာ ဂိတ်နားအိပ်ရတာတွေ ရှိလာတယ်၊ ကျနော်တို့က ကယ်ဆယ်ရေးလုပ်နေတာ ဖြစ်တဲ့အတွက် ဒါဟာ ပြည်သူတွေအတွက် ကျနော်တို့အတွက် ထိခိုက်မှုပါပဲ” ဟု ၎င်းက ပြောသည်။

သျှမ်းပြည်အတွင်းရှိ စစ်ကောင်စီစစ်ဆေးရေးဂိတ်မှ တပ်သားများသည် ကားသမားက တိုင်းရင်းသားဖြစ်နေပါက ပိုမိုစစ်ဆေးမှု ပြုလုပ်နေသည့်အပြင် ဗမာစကားမကျွမ်းကျင်ပါက ဖမ်းမည်ဟုလည်း ခြိမ်းခြောက်ခံရကြောင်း သျှမ်းပြည်တောင်ပိုင်းအတွင်း လှုပ်ရှားနေသည့် အခြားပရဟိတအသင်းဝင်တစ်ဦးကလည်း ပြောသည်။

“ကျနော်တို့ ပရဟိတသမားတွေက နေ့ည ရွေးလို့မရဘူးလေ၊ လူနာရှိတဲ့ချိန် ကူညီဖို့ရှိလာရင် သွားရတာပဲ၊ ပြီးတော့ ကျနော်တို့တိုင်းရင်းသားတွေက ရိုးကြတယ်၊ စကားပြောမတတ်ဘူး၊ မိဘတွေတောင် နင်နဲ့ငါ ပြောကြတဲ့ ကျနော်တို့တိုင်းရင်းသားတွေအတွက် လမ်းမှာ အစစ်ခံရရင် အမြင်ကတ်ပုဒ်မနဲ့ မတရား ဖမ်းဆီးခံရမှာလို့ အပြောခံရတယ်” ဟု ၎င်းကြုံတွေ့ရသည့် အခြေအနေကို ပြောသည်။

လက်ရှိ ဖြစ်ပေါ်နေသည့် စစ်ကောင်စီစစ်ဆေးရေးဂိတ်နှင့် လူမှုကယ်ဆယ်ရေး၊ ပရဟိတသမားတို့၏ လူနာတင်ယာဥ်များအကြား ပြဿနာသည် တစ်နေ့ထက်တစ်နေ့ ပိုမိုဆိုးရွားလာပြီး ပရဟိတသမားတွေ အနေဖြင့်လည်း သွားလာရေး မလွယ်ကူတော့ကြောင်း သိရသည်။

Leave a Comments

- Advertisement -spot_img

Latest article