သျှမ်းပြည်တောင်ပိုင်း ရွာငံမြို့ ရွာမရပ်ကွက်တွင်ရှိသည့် အရပ်သား နေအိမ်တစ်အိမ်ကို စစ်ကောင်စီ တပ်သားများက လက်နက်အပြည့်အစုံဖြင့် လာရောက်ရှာဖွေစစ်ဆေးခဲ့ကြောင်း သတင်းသိရသည်။
ယမန်နေ့ (ဇန်နဝါရီ ၅ ) မွန်းလွဲပိုင်း ၂ နာရီခွဲမှ ၂ နာရီ ၄၅ မိနစ်အထိ လက်နက်အပြည့်အစုံ ကိုင်ဆောင်ထားသည့် အင်အား ၂၀ ခန့် စစ်ကောင်စီတပ်သားများသည် ရွာမရပ်ကွက်ရှိ နေအိမ်တစ်အိမ်ကို ဒုတိယအကြိမ်မြောက် လာရောက်ရှာဖွေခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“အရင်တစ်ခေါက်တုန်းကလည်း သူတို့ (စကစ)တွေ တစ်ခေါက်လာတယ်၊ အဲ့ချိန်ကတော့ ညသန်းခေါင်အချိန်မှာ လာကြတာ၊ ဒီနေ့တော့ နေ့ခင်းပိုင်းလာကြတာ၊ အဲ့အိမ်က လူငယ်(ယောက်ျားလေး)ကို လာရှာတာတဲ့၊ ထုတ်ပေးပါတဲ့၊ ဒါပေမဲ့ အဲ့လူငယ်က အိမ်မှာမရှိတာ ကြာပါပြီ” ဟု ရွာမရပ်ကွက်မှ ပြည်သူတစ်ဦးက သျှမ်းသံတော်ဆင့်ကို ပြောသည်။
အဆိုပါ နေအိမ်မှ အမျိုးသားလူငယ်သည် စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် တခြားနယ်သို့ စီးပွားရေးလုပ်မည်ဟု ဆိုကာ နေအိမ်မှ ထွက်ခွာသွားသည်မှာ ကြာပြီဖြစ်ကြောင်း ဒေသခံများက ပြောသည်။
ယမန်နေ့ ရောက်လာသော စစ်ကောင်စီတပ်သားများဖြစ်သည့် ရဲ နှင့် စစ်သားတို့သည် အိမ်သားများကို သေနတ်ပြ ခြိမ်းခြောက်ပြီး တချို့ အိမ်တွင်းပစ္စည်းများကို ရိုက်ချိုးဖျက်စီးခြင်းများလည်း ရှိကြောင်း သတင်းသိရသည်။
“ပစ္စည်းရိုက်ခွဲသံတွေ မှန်ကွဲသံတွေ ကြားရပါတယ်၊ သူတို့ (စကစ)တွေ ထွက်သွားပေမယ့်လည်း အဲ့အိမ်ကို မသွားရဲဘူး၊ စောင့်ကြည့်နေမှာကြောက်လို့လေ၊ အိမ်သားတွေ အခြေအနေလည်း မသိရသေးဘူး” ဟု အထက်ပါ ပုဂ္ဂိုလ်က ပြောသည်။
ပြီးခဲ့သည့် ရက်ပိုင်းတွင် ရွာငံမြို့နယ်အတွင်း စစ်ကောင်စီတို့သည် ပြည်သူ့နေအိမ်များအား ဝင်မွှေခြင်း၊ ရွာသားအချို့အား ဖမ်းဆီးခြင်း၊ ညဘက် သေနတ်ပစ်ဖောက်ခြောက်လန့်ခြင်း စသည်တို့ကို ပြုလုပ်ခဲ့သလို စစ်တပ်သတင်းပေး ဒလန်ဟု နာမည်ထွက်နေသူများလည်း တရားခံမသိ သတ်ဖြတ်ခံမှုများရှိခဲ့ကြောင်း သိရသည်။
