သျှမ်းပြည်မြောက်ပိုင်း နမ့်ခမ်းမြို့အနီး စစ်ကောင်စီ နှင့် TNLA တို့ တိုက်ပွဲဖြစ်ပွားပြီး ၁ နှစ်အရွယ်ကလေး အပါအဝင် အရပ်သား (၆) ဦး ထိခိုက်ဒဏ်ရာရရှိခဲ့ကြောင်း စုံစမ်းသိရှိရသည်။
ယနေ့ ဇန်နဝါရီ (၅)ရက် မနက် (၁၀)နာရီခွဲမှစပြီး လက်ရှိ သတင်းရေးသားချိန်ထိ နမ့်ခမ်းမြို့အနီး လက်နက်ကြီး လက်နက်ငယ်ပစ်ခတ်သံများ ကြားနေရကြောင်း နမ့်ခမ်းဒေသခံများက ပြောဆိုကြသည်။
“ဟိုနားကျေးရွာက နေအိမ်တွေ လက်နက်ကြီးကျည် ထိမှန်ပြီးတော့ အရပ်သား (၆)ဦး ထိခိုက်ဒဏ်ရာ ရခဲ့တယ်။ နေအိမ် ဘယ်နှအိမ် ထိသွားလဲတော့ သေချာမသိရသေးဘူး။ ခုချိန်ထိ လက်နက်ကြီးသံတွေ ကြားနေရတုန်းပဲ” ဟု နမ့်ခမ်းဒေသခံ အမျိုးသား တစ်ဦးက ပြောသည်။
နမ့်ခမ်းမြို့ အနီး နောင်စန့်ကုန်း ဘောလုံးကွင်းနားတဝိုက်၊ ဟိုနားကျေးရွာနှင့် ကောင်းပိန်းကျေးရွာအနီးတို့တွင် တိုက်ပွဲဖြစ်ပွားပြီး နမ့်ခမ်းမြို့နှင့် (၁)မိုင်သာ ကွာဝေးကြောင်း သိရှိရသည်။
ထို ထိခိုက်ဒဏ်ရာရသူများအနက် အသက် (၁)နှစ် မပြည့်သေးသည့် ကလေးတဦး အပါအဝင် အသက် (၆၆) နှစ်အရွယ် သက်ကြီးလည်း ပါဝင်ပြီး လက်ရှိတွင် နမ့်ခမ်းပြည်သူ့ဆေးရုံမှာ ဆေးကုသမှုခံယူနေကြောင်း သတင်းရရှိသည်။
“တစ်နှစ်အောက် ကလေး တစ်ယောက်လည်း ထိခိုက်တယ်လို့ သိရတယ်။ ကလေးတွေက ရင်ဘတ်ထိတယ်လို့ ပြောတယ်” ဟု နမ့်ခမ်းဒေသခံ အမျိုးသား တစ်ဦးက ပြောသည်။
ယမန်နေ့ (ဇန်နဝါရီ ၄) တွင် နမ့်ခမ်းမြို့မစျေးအတွင်း TNLA တပ်ဖွဲ့မှ ဆက်ကြေးလာကောက်နေချိန် ပစ်ခတ်မှုဖြစ်ပွားခဲ့ပြီး (၂) ဦး သေဆုံးသွားကြောင်း၊ ယနေ့ပစ်ခတ်မှုသည် ၄င်းနှင့် ဆက်စပ်မှုရှိနိုင်ကြောင်း ဒေသခံများက သုံးသပ်ပြောဆိုကြသည်။
“မနေ့က ကိစ္စနဲ့ ပတ်သက်ပြီး ဆက်စပ်မှုရှိမယ်ထင်တယ်။ ဒီနေ့မနက် TNLA ဘက်က မြို့အနီး ဝတ်စုံအပြည့်နဲ့ အင်အားပြတဲ့သဘော သွားနေတော့ စစ်ကောင်စီဘက်က ပြန်ပစ်လိုက်တာထင်တယ်” ဟု နမ့်ခမ်းဒေသခံ တစ်ဦးက ပြောသည်။
TNLA ၏ ပြန်ကြားရေးတာဝန်ခံ ဒုဗိုလ်မှူး မိုင်းအိုက်ကျော် ကို သျှမ်းသံတော်ဆင့် သတင်းဌာနမှ ဆက်သွယ်မေးမြန်းသော်လည်း ဖုန်းစက်ပိတ်ထားသည်။
နမ့်ခမ်းမြို့တွင် TNLA တပ်ဖွဲ့မှ မြို့မစျေးအတွင်း စျေးရောင်းသည့် စျေးသည်များထံ ဆက်ကြေးကောက်မှုများ ပြုလုပ်လာသဖြင့် ဒေသခံများ စျေးပိတ်ပြီး ဆန္ဒပြခဲ့ကြောင်းလည်း သိရသည်။
နမ့်ခမ်းမြို့သည် တိုင်းရင်းသားလက်နက်ကိုင် ပေါင်းစုံရှိသည့် ဒေသဖြစ်ပြီး မကြာခဏ ပေါက်ကွဲမှု ဖြစ်ပွားခြင်း၊ အရပ်သားများ ပစ်ခတ်ခံရကာ သေဆုံးမှုများလည်း မကြာခဏ ဖြစ်ပွားသည့် ဒေသတခုဖြစ်သည်။
Leave a Comments