စစ်ဘေးရှောင်များကို ကူညီထောက်ပံ့ရန် အလှူငွေနှင့် ပစ္စည်းများ လက်ခံနေသည့် သျှမ်းပြည်တောင်ပိုင်း အောင်ပန်းမြို့မှ လူငယ်များကို စစ်ကောင်စီ တပ်ဖွဲ့ဝင်များက အရပ်ဝတ်ဖြင့် ရှာဖွေဖမ်းဆီးနေကြောင်း သတင်းသိရသည်။
“ပြီးခဲ့တဲ့ လပြည့်ည ဗုံးကွဲပြီးကတည်းက စစ်ကောင်စီတပ်သားတွေ အရပ်ဝတ်နဲ့ ရပ်ကွက်ထဲဝင်ပြီး လူငယ်တွေကို လာဖမ်းတာရှိပါတယ်၊ ဒီနောက်ပိုင်း သူတို့လာဖမ်းတဲ့သူတွေက ပရဟိတလုပ်တဲ့ လူငယ်တွေချည်းပဲ” ဟု အောင်ပန်းမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
အောင်ပန်းမြို့ရှိ မြို့ဟောင်း ရပ်ကွက်တွင် ၂ ဦး၊ လှည်းရိုးရပ်ကွက်တွင် ၂ ဦးနှင့် အမှတ် ၃ ရပ်ကွက်မှ စားသောက်ဆိုင်တစ်ခုတွင် အလုပ်လုပ်နေသည့် ဝန်ထမ်းတစ်ဦးဖြစ်သည့် မောင်ဝေလင်းထွန်း အပါအဝင် လူငယ်စုစုပေါင်း ၁၇ ဦး ဖမ်းဆီး ခံနေရကြောင်း အောင်းပန်ဒေသခံများ ပြောပြချက်အရသိရသည်။
ပြီးခဲ့သည့် ဒီဇင်ဘာလ ၁၅ ရက်နေ့ ည (လပြည့်ည)တွင် အောင်ပန်းမြို့၌ ဗုံးနှစ်လုံးပေါက်ကွဲမှု ဖြစ်ပွားပြီးနောက် စစ်ကောင်စီတပ်သားတို့သည် ဒေသခံ ပအိုဝ်း (PNO) ပြည်သူ့စစ်တို့နှင့် ပူးပေါင်းပြီး ရပ်ကွက်ထဲရှိ လူငယ်များကို မသင်္ကာမှုနှင့် ဖမ်းဆီးနေသည်။
“အဲ့ လပြည့်ညမှာ အလိုင်းရင့်ရှေ့မှာတစ်လုံး၊ ပင်စိမ်းလက်ဖက်ရည်ဆိုင်ရှေ့မှာတစ်လုံး ရှေ့ဆင့်နောက်ဆင့် ဗုံးနှစ်လုံး ပေါက်ကွဲတယ်၊ အဲ့နောက်တော့ အရပ်ဝတ် စကစတွေက PNO နဲ့ ပေါင်းပြီး လူငယ်တွေကို လိုက်ဖမ်းတော့တာပဲ၊ သူတို့က ယူနီဖောင်းမဝတ်ဘဲ လာဖမ်းတော့ ဇဝေဇဝါနဲ့မို့ ပြေးချိန်ဘယ်ရမလဲ” ဟု အောင်ပန်းမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
အောင်ပန်းမြို့တွင်း လက်ရှိအခြေအနေသည် ယူနီဖောင်းဝတ် စစ်ကောင်စီတပ်သားတို့အပြင် အရပ်ဝတ်နှင့် စစ်ကောင်စီတပ်သားများသည် နေရာအနံ့ကင်းပုန်းချထားပြီး လူငယ်များ အပြင်မထွက်ရဲအောင် ပြုလုပ်နေကြောင်း သိရသည်။
“စစ်ကောင်စီတွေက နေ့ဘက်မှာဆို လမ်းသွားလမ်းလာတွေကို စစ်တယ်၊ တခါတလေ အရပ်ဝတ်နဲ့ ယာဥ်တွေကို တားပြီး စစ်တာလည်းရှိတယ်၊ ညဘက်မှာကျတော့ ဝင်ဖမ်းတာ၊ ဘယ်လို အချိတ်အဆက်တွေကြောင့် ဖမ်းသလဲ မသိဘူး၊ နေရာအတိအကျနဲ့ လာဖမ်းတာ” ဟု အထက်ပါ ပုဂ္ဂိုလ်က ပြောသည်။
လက်ရှိတွင် အောင်ပန်းမြို့ပေါ်နှင့် အနီးတစ်ဝိုက်ရှိ ကျေးရွာများအထိ စစ်ကောင်စီတို့က လုံခြုံရေးချထားသည့်အပြင် ၎င်းတို့၏ ကင်းလှည့်ကားများဖြင့်လည်း လှည့်လည်စစ်ဆေးနေကြောင်း ဒေသခံများ၏ ပြောကြားချက်အရ သိရသည်။
Leave a Comments