သျှမ်းပြည်တောင်ပိုင်းအတွင်းရှိ စစ်ကောင်စီတပ်ဖွဲ့ဝင်၏ ဇနီးများ အခြေခံ စစ်ပညာသင်တန်းများကို သင်ယူလေ့ကျင့်နေရကြောင်း စုံစမ်းသိရသည်။
သျှမ်းတောင် မြို့နယ်များဖြစ်သည့် အောင်ပန်း၊ ကလော၊ ညောင်ရွှေနှင့် တောင်လေးလုံးမှ စစ်ကောင်စီ တပ်ဖွဲ့ဝင် စစ်သားနှင့် ရဲတို့၏ ဇနီးများသည် အခြေခံ စစ်ပညာသင်တန်းကို တက်ရောက်နေရကြောင်း ဒေသခံများက ပြောသည်။
“ဒီဇင်ဘာ ၁၂ ရက် ကတည်းက သင်တန်းပေးနေတာတွေ့ရတယ်၊ အဓိက ကတော့ သူတို့ (ရဲ)ရဲ့ အမျိုးသမီးတွေပေါ့၊ အမျိုးသမီးက အသက်ကြီးနေရင်လည်း အရွယ်ရောက်တဲ့ သူတို့ သမီးတွေက တက်ရတာ တွေ့ရတယ်၊ အောင်ပန်း ရဲစခန်း ကွင်းပြင်ထဲမှာ လေ့ကျင်နေတာ” ဟု အောင်ပန်းမြို့နေ ပြည်သူတစ်ဦးက သျှမ်းသံတော်ဆင့်ကို ပြောသည်။
သျှမ်းပြည်တောင်ပိုင်းရှိ ကလောမြို့နှင့် အောင်ပန်းမြို့တို့မှ ရဲနှင့် စစ်သားတို့၏ ဇနီးများနှင့် အသက် ၁၈ နှစ်ပြည့် အရွယ်ရောက်ပြီး သမီးများကို စစ်ပညာအခြေခံ သင်တန်း၊ သေနတ်နှင့် ပတ်သက်သည့် အခြေခံများ သင်ကြားပေးနေကြောင်း ရဲစခန်းနှင့် နီးစပ်သူများက သျှမ်းသံတော်ဆင့်ကို ပြောသည်။
ထို့အပြင် ညောင်ရွှေမြို့နယ်နှင့် တောင်လေးလုံးကျေးရွာတို့မှ ရဲမိသားစုဝင်များကလည်း စစ်သင်တန်း တက်ရောက်ရန် စေခိုင်းညွှန်ကြားမှုများရှိနေသဖြင့် တချို့က ဝန်ထမ်းအိမ်ရာမှ အမျိုးအိမ်များသို့ ပြောင်းရွှေ့နေထိုင်ရကြောင်း ဒေသခံများက သျှမ်းသံတော်ဆင့်ကို ပြောသည်။
“ပြီးခဲ့တဲ့ တစ်ပတ်လောက်က ရွှေညောင်ဈေးထဲမှာ ဘွတ်ဖိနပ်တွေကို လာဝယ်နေတာတွေ့လို့ ဘာလုပ်ဖို့လည်း မေးတော့ သေနတ်ပစ်သင်တန်းကို တစ်လလောက် တက်ရမှာ၊ သူတို့ စိတ်မဝင်စားပေမဲ့ အထက်က အမိန့်ကျလို့ဆိုပြီး ပြောတယ်၊ တချို့လည်း အမျိုးတွေဆီ သွားလည်သလိုနဲ့ ရှောင်ထွက်သွားတယ်” ဟု ရွှေညောင်မြို့မှ ရဲများနှင့် နှီးစပ်သူတစ်ဦးက သျှမ်းသံတော်ဆင့်ကို ပြောသည်။
ဒီဇင်ဘာလ ၁၀ ရက်နေ့တွင်ကျရောက်ခဲ့သည့် ကမ္ဘာလုံးဆိုင်ရာ လူ့အခွင့်အရေးနေ့ အထိမ်းအမှတ်အဖြစ် မြန်မာနိုင်ငံမှ စစ်အာဏာသိမ်းမှုကို ဆန့်ကျင်သည့်အနေဖြင့် Silent Strike ဆန္ဒပြမှု ပြုလုပ်ပြီးနောက်ပိုင်းတွင် စစ်ကောင်စီလက်အောက်ခံ တပ်နှင့် ရဲစခန်းတို့မှ အမျိုးသမီးများ စစ်သင်တန်းတက်ရောက်ရသည့် သတင်းများလည်း ပျံ့နှံ့လာသည်။
Leave a Comments