သျှမ်းပြည်မြောက်ပိုင်း နမ့်ခမ်းမြို့ရှိ မြို့လယ်ဘုရားကျောင်း အနောက်ဘက် ပင်လုံထိပ်ထားတည်းခိုခန်းအနီး ယနေ့ (ဒီဇင်ဘာ ၁၄)ရက် ည ၆ နာရီခွဲ ဝန်းကျင်တွင် ပေါက်ကွဲမှုတစ်ခု ဖြစ်ပွားကြောင်း စုံစမ်းသိရသည်။
ထိုပေါက်ကွဲမှု ဖြစ်ပွားပြီးနောက် စစ်ကောင်စီ လက်အောက်ခံတပ်၊ ပြည်သူ့စစ်အုပ်စု ရောက်လာပြီး လူငယ် (၂)ဦးဖမ်းခံရကြောင်းသိရသည်။
“ပေါက်ကွဲမှု ဖြစ်ပြီးတော့ စစ်ကောင်စီလက်အောက်ခံ တပ်တွေ၊ ပြည်သူ့စစ်တွေ ရောက်လာကြတယ်။ ဗုံးပေါက်ကွဲတာ (၁၅)မိနစ်လောက်အကြာမှာ ဆိုင်ကယ်စီးလာတဲ့ လူငယ်အမျိုးသား နှစ်ဦးကို ဖမ်းသွားတယ်” ဟု နမ့်ခမ်းဒေသခံ အမည်မဖော်လိုသူ အမျိုးသား တစ်ဦးက ပြောသည်။
ပေါက်ကွဲမှုဖြစ်ပွားပြီးနောက် ပန်ပွဲညစျေးတန်းက ပြည်သူများ အလန့်တကြားဖြစ်ပွားခဲ့ကြောင်း သိရှိရသည်။
“ညစျေးက လူတွေလည်း အလန့်တကြား ဖြစ်ကုန်ကြတယ်။ အဲ့တည်းခိုခန်းနားမှာပဲ ပြီးခဲ့တဲ့ အပတ်တုန်းက အမျိုးသား တစ်ဦး သေနတ်ပစ်ခံရတယ်” ဟု နမ့်ခမ်းဒေသခံ တစ်ဦးက ပြောသည်။
ပြီးခဲ့သည့် ဒီဇင်ဘာ (၉)ရက်က ပင်လုံထိပ်ထားတည်းခိုခန်း အနီးတွင် ဆိုင်ကယ် ကယ်ရီ အမျိုးသားတစ်ဦး သေနတ်ပစ်ခံရကြောင်း သိရှိရသည်။
နမ့်ခမ်းမြို့ပေါ်တွင် ယခုရက်ပိုင်း (TNLA) တပ်ဖွဲ့မှ ဆက်ကြေးကောက်ခံမှုများ ရှိနေသည့်အတွက် ဒေသခံ နမ့်ခမ်းစျေးသူစျေးသားများ ဆန္ဒပြသည့်အနေဖြင့် မြို့မစျေးကို (၅)ရက် ပိတ်ထားကြောင်း သိရှိရသည်။
Leave a Comments