သျှမ်းပြည်တောင်ပိုင်း ဆီဆိုင်မြို့နယ် နားသံကျေးရွာတွင် နေလည်ပိုင်းအချိန်အတွင်း နေအိမ် ဖောက်ထွင်းခိုးယူမှု ဖြစ်ပွားခဲ့ကြောင်း စုံစမ်းသိရှိရသည်။
ယမန်နေ့ (ဒီဇင်ဘာ ၁၃) နေ့လည်ပိုင်းက နားသံကျေးရွာမှာ အိမ်ရှင်များအလုပ်သွားနေသည့်အချိန်တွင် နေအိမ် ဖောက်ထွင်းခိုးယူခံရသောကြောင့် ငွေကြေး သိန်း (၃၀) နှင့်အတူ ရွှေ (၂)ကျပ်သား ခိုးယူခံခဲ့ရကြောင်း သိရသည်။
“အိမ်ထဲမှာရှိတဲ့ ပိုက်ဆံတွေ အကုန်ခိုးသွားတာ။ ပိုက်ဆံက သိန်း (၃၀)ကျော်တယ်။ ရွှေက ၂ ကျပ်သား ခိုးသွားတာ။ အိမ်ရဲ့ တံခါးတွေ၊ သော့တွေ ဖြတ်ပြီးတော့ ဝင်ခိုးသွားတာ။ ကျမတို့ အလုပ်သွားနေတာ။ သူဘယ်ချိန်လာခိုးသွားလဲ မသိဘူး။ ကျမတို့ အိမ်ပြန်ရောက်တာနဲ့ ပစ္စည်းတွေက အကုန်ပျောက်သွားပြီ” ဟု ခိုးယူခံရသည့် အိမ်ရှင်နှင့် နီးစပ်သူ အမျိုးသမီးတစ်ဦးက ပြောသည်။
ယခုကာလ ကိုဗစ် ၁၉ နှင့် နိုင်ငံရေးအခြေနေ မတည်ငြိမ်မှုကြောင့် စားဝတ်နေရေးခက်ခဲနေချိန်တွင် ခိုးယူခံရသည့်အတွက် ယခင်ထက် ပိုမိုခက်ခဲလာကြောင်း သိရသည်။
“အဲပိုက်ဆံက သူရှိနေတာ အကုန်ဘဲ။ အခုက ကိုဗစ်နဲ့ လုပ်စားရတာခက်တယ်။ အခိုးခံလိုက်ရတော့ ငိုနေတာ။ အဲဒီ ပိုက်ဆံနဲ့ဘဲ ချွေတာ သုံးနေကြတာ။ အခုက ဘာမှ မရှိတော့ဘူး။ အကုန်လုံးပါသွားတော့ ရှေ့ဆက် ဘယ်လို စားသောက်ရမလဲ မသိဘူးဖြစ်နေတာ” ဟု အထက်ပါ အမျိုးသမီးက ပြောသည်။
စစ်အာဏာသိမ်းယူပြီးနောက်ပိုင်းတွင် စီးပွားရေး ယခင်ထက်ပိုမိုကြပ်တည်းလာသောကြောင့် တစ်နေ့ထက် တစ်နေ့ အခြေခံပြည်သူများအတွက် စားဝတ်နေရေး ပိုမိုခက်ခဲလာကြောင်း သိရသည်။
ထို့အပြင် ဒီဇင်ဘာ ၁ ရက်နေ့က ထုတ်ပြန်တဲ့ ကုလသမ္မဂဖွံ့ဖြိုးရေးအစီစဉ် UNDP အစီရင်ခံစာတွင်လည်း ကိုဗစ် ရောဂါနှင့် နိုင်ငံရေးပြဿနာတွေကြောင့် မြန်မာနိုင်ငံ တစ်နိုင်ငံလုံး ဆင်းရဲငတ်မွတ်မှုသည် လာမည့်နှစ်မှာ ၃ ဆ မြင့်တက်လာနိုင်ကြောင်း သတိပေးထားသည်။
