သျှမ်းပြည်တောင်ပိုင်း ဆီဆိုင်မြို့နယ် ထီစုံကျေးရွာတွင် စစ်ကောင်စီတပ်မှ မီးလောင်ဗုံးဖြင့် ဗုံးကြဲတိုက်ခိုက်မှုကြောင့် နေအိမ်ပျက်စီးမှုရှိကြောင်း သိရသည်။

ပြီးခဲ့သည့် (ဇန်နဝါရီလ ၆)ရက်နေ့ မနက် ၉ နာရီအချိန်တွင် စစ်ကောင်စီတပ်သည် ပအိုဝ်းလူမျိုးများနေထိုင်သည့် ထီစုံကျေးရွာကို မီးလောင်ဗုံးဖြင့် နှစ်ကြိမ် တိုက်ခိုက်ခဲ့ရာ ပြည်သူနေအိမ် ၂ အိမ် မီးလောင်ပျက်စီးခဲ့ကြောင်း PNLA ပြောရေးဆိုခွင့်ရှိသူ ခွန်ရိန်းယံက သျှမ်းသံတော်ဆင့်ကို ပြောသည်။

စစ်ကောင်စီလက်အောက်ခံနှင့် ပအိုဝ်းပြည်သူစစ် PNO တပ်ဖွဲ့သည် တပ်စွဲထားသည့် လွယ်ထွဲကျေးရွာကနေ နေ့တိုင်းလိုလို ထီစုံကျေးရွာကို ဒရုန်းဖြင့် လှန်းပစ်နေတာကြောင်း ၂၀၂၄ ခုနစ် ဇန်နဝါရီ မှ စပြီး ယခုနှစ် (၂၀၂၅ ဇန်နဝါရီ ၆)ရက်ထိ ပြည်သူနေအိမ်စုစုပေါင်း ၂၄လုံး ထိ ပျက်စီးနေပြီဟု ခွန်ရိန်းယံက ဆက်ပြောသည်။

“လွယ်ထွဲကျေးရွာကနေ တပ်စွဲထားတဲ့ စစ်တပ်နဲ့ PNOက နေ့စဉ်လိုလို လှန်းပစ်တယ်။ ဇန်နဝါရီ ၆ရက်နေ့က နေအိမ် ၂လုံးပျက်စီးခဲ့တယ်။ မနေ့ဖြစ်စဉ်မှာတော့ ပြည်သူကို ထိခိုက်တာတော့ မရှိဘူး။ စစ်ကောင်စီက တမင်သက်သက် ပအိုဝ်းကျေးရွာတွေကို ပျက်စီးနေတာ။ ရွာကဒေသခံတွေတော့ ထွက်ပြေးကုန်တယ် မနေရဲကြဘူး” ဟု ၎င်းက ပြောသည်။

ပြီးခဲ့သည့် (ဒီဇင်ဘာလ ၂ ရက်)နေ့ နံနက်ပိုင်း ၁၀ နာရီဝန်းကျင်တွင် နောင်ရင်းကျေးရွာတွင်နေထိုင်သည့် မိသားစု ၃ဦးသည့် ပြောင်းခြံသို့ ပြောင်းချိုးနေစဉ် စစ်ကောင်စီလက်အောက်ခံနှင့် ပအိုဝ်းပြည်သူစစ် PNO က ဒရုန်းဖြင့် ဗုံးကြဲတိုက်ခိုက်ခဲ့ပြီး မိခင်နှင့် ကလေးငယ်ဖြစ်သူ ပွဲချင် သေဆုံးသွားကြောင်း သိရသည်။

ဆီဆိုင်မြို့တွင် ပြီးခဲ့သည့် ၂၀၂၄ ခုနှစ် ဇန်နဝါရီလတွင် PNLA နှင့်စစ်ကောင်စီပူပေါင်းတပ် PNOတပ်များ တိုက်ပွဲစတင်ဖြစ်ပွားရာ တစ်နှစ်ခန့်ရှိလာပြီဖြစ်ကြောင်း သိရသည်။

လက်ရှိ စစ်ကောင်စီတပ်နှင့် ၎င်းလက်အောက်ခံ PNO တပ်ဖွဲ့သည် ဖယ်ခုံ၊လွိုင်ကော်၊မိုးဗြဲ နှင့် ဖယ်ခုံဒေသကို ပြည်လည် ထိန်းချုပ်နိုင်ရန် စစ်အင်အား အလုံးအရင်းဖြင့် တိုးချဲ့အင်အားဖြည့်တင်းပြီးနောက် ကရင်နီတော်လှန်ရေးတပ်ပေါင်းစုတို့နှင့် တင်မာမှုများရှိနေကြောင်း သိရသည်။

ီဆအလုပ်သင် သတင်းထောက် နန်းဆိုင်ခမ်း ရေးသားသည်။