သျှမ်းပြည် ဆီဆိုင်မြို့နယ် တွေပူးကျေးရွာမှ ရွာသူကြီးတစ်ဦးသည် ပြီးခဲ့သည့် ရက်ပိုင်းအတွင်း ပအိုဝ်းပြည်သူ့စစ် PNO တပ်ဖွဲ့၏ ဖမ်းဆီးခြင်းခံခဲ့ရပြီး ပြန်လည်လွတ်မြောက်လာရန် ပိုက်ဆံအများအပြားနှင့် ပြန်ရွေးရကြောင်း ဒေသခံတစ်ဦးက ပြောသည်။

ဒီဇင်ဘာလ ၇ ရက် ည ၁၁ နာရီခန့်အချိန်တွင် စစ်ကောင်စီလက်အောက်ခံ ပအိုဝ်းပြည်သူ့စစ် PNO တပ်ဖွဲ့သည် ဆီဆိုင်မြို့နယ် တွေပူးကျေးရွာမှ ရွာသူကြီး ဖြားဒုံးကျော်ကို ၎င်း၏နေအိမ်ပေါ်သို့ ဝင်ရောက်ဖမ်းဆီးခဲ့ခြင်း ဖြစ်သည်။

ထိုသို့ ဖမ်းဆီးသွားပြီးနောက် ဒီဇင်ဘာလ ၁၁ ရက် ညတွင် ပြန်လည်လွတ်ပေးလာခဲ့ကြောင်း ဆိုက်ခေါင်ကျေးရွာ ဒေသခံတစ်ဦးက ပြောသည်။

“တွေပူးရွာသူကြီးတော့ ပြန်လွှတ်ပြီ။ သိန်း ၆၀၀ နဲ့ ပြန်ရွေးရတယ်ပြောတယ်။ အဓိကတော့ ပိုက်ဆံလိုချင် ဖမ်းသွားပေါ့ကွာ” ဟု ၎င်းကပြောသည်။

အဆိုပါကိစ္စနှင့် ပတ်သက်၍ ပအိုဝ်းပြည်သူ့စစ် PNO ၏ ဗိုလ်မှူး ခွန်သန်းကြွယ်ကို သျှမ်းသံတော်ဆင့်မှ ဖုန်းဆက်သွယ် မေးမြန်းခဲ့သော်လည်း ဖုန်းလက်ခံဖြေကြားခြင်းမရှိပေ။

သို့သော် တွေးပူကျေးရွာ ရွာသူကြီး ဖြားဒုံးကျော်ကို အကြောင်းအရင်းတစ်ခုခုရှိသောကြောင့် ပအိုဝ်းပြည်သူ့စစ် PNO မှ ဖမ်းဆီးရခြင်းဖြစ်ကြောင်း ဗိုလ်မှူး ခွန်သန်းကြွယ်က ပြီးခဲ့သည့် ဒီဇင်ဘာလ ၉ ရက်နေ့က သျှမ်းသံတော်ဆင့်ကို ပြောသည်။

ပြန်လွတ်လာသည့် ရွာသူကြီး ဖြားဒုံးကျော်၏ အခြေအနေနှင့် ပတ်သက်၍ တွေပူးကျေးရွာမှ ဒေသခံကို ဖုန်းဆက်သွယ်ခဲ့သော်လည်း ဖုန်းလိုင်းအခြေအနေနှင့် ဆက်သွယ်၍မရပေ။

ဆိုက်ခေါင်ကျေးရွာ ဒေသခံလူငယ်တစ်ဦးကတော့ “လူစုဆောင်းတဲ့ ကိစ္စလို့ပဲ ထင်တယ်။ အရင်က အဲ့ဖက်မှာ စစ်တွေမဖြစ်ခင်ကတည်းက အဲ့ဒေသမှာ PNLA တွေကလှုပ်ရှားတယ်။ အခု PNO အလှည့်ကျတော့ ပြည်သူတွေက သူတို့ကိုကြောက်ကြတယ်လေ။ ဘယ်သူ့မှ သူတို့အဖွဲ့ထဲမဝင်ချင်ဘူး။ အဲ့ကြောင့် သူတို့ကို လူမခေါ်ပေးနိုင်ရကောင်းလားဆိုပြီး ရွာသူကြီးကိုဖမ်းတာ” ဟု ပြောသည်။

ထို့အပြင် ပအိုဝ်းပြည်သူ့စစ် PNO သည် မူးယစ်ဆေးဝါးသုံးတိုက်ဖျက်ရေး အကြောင်းပြပြီး မူးယစ်ဆေး သုံးစွဲသူကို မဖမ်းဆီးကာ ပိုက်ဆံဖြင့် ပြန်ရွေးခိုင်းခြင်း၊ ရပ်ရွာနှင့် ပြည်သူများ၏ လုံခြုံရေးအတွက်ဆိုကာ ပိုက်ဆံကောက်ခံခြင်း စသဖြင့် မကြာခဏပြုလုပ်နေလျက်ရှိကြောင်း ဆိုသည်။