သျှမ်းပြည်မြောက်ပိုင်း လားရှိုးမြို့နယ်အတွင်း ရှိဆေးခန်းတခုအား ဆက်ကြေးပေးဆောင်ရန် SSPP/SSA ဖုန်းဆက်ဆင့်ခေါ် မှု ပြုသည်ဟု လားရှိုး ရမခတိုင်းက စွပ်စွဲပြောဆိုကာ ထိုသို့ ထပ်မံပြုလုပ်ပါက ဆက်ဆံရေးရုံး ပိတ်ပင်ခြင်းခံရမည်ဟု SSPP/SSA ဆက်ဆံရေးတာဝန်ခံအား စစ်တိုင်းရုံးက ဆင့်ခေါ်ပြောကြားသည်ဟု သိရသည်။
၂၀၁၈ သြဂုတ်လ ၅ ရက်နေ့ ည ၈ နာရီ ၅ မိနစ် အချိန် SSPP/SSA ထံ ပိုက်ဆံလာသွင်းရန် လားရှိုးမြို့ ရပ် ကွက် ၃ အတွင်းရှိ ဆေးခန်းတခုအား 092*****241 နံပါတ်ဖြင့် ဖုန်းဆက်ပြောကြားသည်ဟုဆိုကာ လားရှိုးမြို့ အခြေစိုက် အရှေ့မြောက်ပိုင်းတိုင်းစစ်ဌာနချုပ် စစ်ဆင်ရေး G1 စစ်ဦးစီးအရာရှိပထမတန်း ဒုတိယ ဗိုလ်မှူးကြီး ဗညားဝင်းက SSPP/SSA ၏လားရှိုးဆက်ဆံရေးရုံးတာဝန်ခံ ဗိုလ်မှူးအောင်လတ် အား – အဆိုပါ ကိစ္စမျိုးထပ်မံကြားသိ တွေ့ရှိပါက ဆက်ဆံရေးရုံးပိတ်ခြင်းခံရမည် – ဟု ခေါ်ယူပြောဆိုခဲ့ကြောင်း ကြားသိရသည်။
အဆိုပါကိစ္စနှင့်ပတ်သက်၍ သျှမ်းပြည်တပ်မတော် SSPP/SSA ပြောရေးဆိုခွင့် ဗိုလ်မှူးစိုင်းသန်းအောင် က – “ကျနော်တို့မှ စည်းမဲ့ကမ်းမဲ့ ဟိုကြေးဒီကြေးလိုက်ကောက်တာမရှိဘူး။ လက်အောက်ငယ်သားတွေလဲ လုပ်ခွင့် ပေးမထားဘူး၊ အောင်ဆေးခန်းကို ဖုန်းဆက်ပိုက်ဆံတောင်းတယ်ဆိုတာလဲ ကျနော်တို့ မဟုတ်ဘူး။ မလိုလား တဲ့အဖွဲ့က ကျနော်တို့ကို နာမည်ဖျက်တာဘဲ ”- ဟု သျှမ်းသံတော်ဆင့်သို့ပြောသည်။
အဆိုပါကိစ္စနှင့် ပတ်သက်၍ SSPP/SSA ၏ ၀မ့်ဟိုင်းဌာနချုပ် အရာရှိကြီးတဦးက- သျှမ်းပြည်တပ်မတော် အနေ ဖြင့် လမ်းပိတ်ပိုက်ဆံတောင်းခံခြင်း၊ ဆိုင်အတွင်း နေအိမ်အတွင်း ပစ်စာချ ပိုက်ဆံကောက်ခံခြင်း လုပ်စရာ မလိုအပ်ကြောင်း၊ သျှမ်းပြည်တပ်မတော် ဖြစ်သည့်အားလျော်စွာ သျှမ်းပြည်တွင်းနေ မိဘပြည်သူများ စီးပွားရေးလုပ်ငန်းရှင်များက စေတနာဆန္ဒအလျောက် ကိုယ်တိုင်ကိုယ်ကျ ရံပုံငွေလာရောက် ထောက်ပံ့ကြောင်း- ပြောသည်။
သျှမ်းပြည်တပ်မတော် SSPP/SSA သည် ၀ တပ်ဖွဲ့ ဦးဆောင်သည့်မြောက်ပိုင်းမဟာမိတ်တပ်ဖွဲ့တွင်ပါ၀င်ပြီး တနိုင်ငံ လုံး အပစ်အခတ်ရပ်စဲရေးစာချုပ် NCA ချုပ်ဆိုခြင်း မရှိသေးသည့် သျှမ်းလက်နက်ကိုင်တပ်ဖွဲ့ တဖွဲ့ဖြစ်သည်။ သို့သော် ပြည်နယ်အဆင့်ပြည်ထောင်စုအဆင့်အား ၂၀၁၂ ခုနှစ်ဦးပိုင်းက ဦးသိန်းစိန်အစိုးရနှင့် လက်မှတ်ရေး ထိုးထားသောကြောင့် လားရှိုးမြို့၊ ခိုလမ်မြို့၊ မူစယ်မြို့ တို့တွင် ဆက်ဆံရေးရုံးဖွင့်လှစ်ထားသည်။
