သျှမ်းပြည် လားရှိုးမြို့အဝင် လွယ်လွမ့်ကျေးရွာရှိ “ခိုင်”သစ်သီးပွဲရုံ မီးလောင်ကျွမ်းခဲ့ပြီး ပျက်စီးဆုံးရှုံးမှု များပြားကြောင်း စုံစမ်းသိရသည်။
ယနေ့ (မေလ ၂၇ ရက်) နေ့လယ် ၁ နာရီခန့်မှ စတင်ပြီး လားရှိုးမြို့အဝင်ရှိ ကိုးကန့်တပ်ဖွဲ့ MNDAA ထိန်းချုပ် လွယ်လွမ့်ကျေးရွာတွင် ဖွင့်လှစ်ထားသည့် “ခိုင်” သစ်သီးပွဲရုံရှိ ဂိုထောင်တစ်ခု မီးလောင်ကျွမ်းခဲ့ပြီး အနီးပတ်ဝန်းကျင်ရှိ ပြည်သူများမှ ဝိုင်းဝန်း မီးငြိမ်းသတ်ခဲ့ရကြောင်း ဒေသခံများက ပြောသည်။
“၁ နာရီကတည်းက မီးစလောင်တာကို ၂ နာရီလောက်အထိ မီးပြင်းနေတုန်း ဘယ်သူမှ အနားမကပ်ရဲဘူး။ အဲ့ဂိုထောင်ထဲမှာ ဆိုင်ကယ်အသစ်တွေလည်း ရှိတယ်ပြောတယ်။ ဘယ်လိုကြောင့် မီးလောင်တာလဲ မသိသေးဘူး၊ မီးသတ်ကားလည်း လာကူပေမယ့် မနိုင်တော့လို့ ပြန်သွားပြီ။ အဲ့နားက ရွာသားတွေပဲ မီးငြိမ်းကူပြီး ပစ္စည်းတွေ သယ်ထုတ်ပေးနေတာ” ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့နယ် လွယ်လွမ့်ကျေးရွာရှိ ဂိုထောင်မီးလောင်ကျွမ်းမှုတွင် မီးငြိမ်းသတ်ရန် မီးသတ်ကား မလုံလောက်သော်လည်း ညနေ (၄) နာရီခန့်တွင် ဒေသခံများမှ ဝိုင်းဝန်းငြိမ်းသတ်နိုင်ခဲ့ပြီး ပျက်စီးဆုံးရှုံးမှုတန်ဖိုး များပြားနိုင်ကြောင်း အဆိုပါ ဒေသခံအမျိုးသားက ဆက်ပြောသည်။
အလားတူ မေလ ၁၆ ရက်တွင် လားရှိုးမြို့ ရပ်ကွက်(၂)၊ နယ်မြေ(၄)ရှိ ကုန်စုံဆိုင်တစ်ခုတွင် လျှပ်စစ်ဝါယာရှော့ခ်ကြောင့် မီးလောင်ကျွမ်းမှု ဖြစ်ပွားခဲ့ရာ ကားနှစ်စီးနှင့် ဆိုင်ကယ်နှစ်စီး မီးလောင်ဆုံးရှုံးခဲ့ပြီး မေလ ၉ ရက်ကလည်း ဆိုလာပြား မီးလောင်ခြင်းကြောင့် ကုန်စုံဆိုင်များ မီးကူးစက်လောင်ကျွမ်းခဲ့ကြောင်း ဒေသခံများထံမှ သိရသည်။
မီးဘေးအန္တရာယ် ကြိုတင်ကာကွယ်ရန် နေအိမ် သို့မဟုတ် ဆိုင်ခန်းများမှ မထွက်ခွာမီ လျှပ်စစ်မီးကြိုးများ၊ ပလပ်များ၊ ဖုန်းအားသွင်းကြိုးများ စသည့် လျှပ်စစ်ဝါယာကြိုး အမျိုးမျိုးကို သေချာစွာ ဖြုတ်သိမ်းရန် လိုအပ်ကြောင်း လားရှိုးမြို့နေ ကုန်စုံဆိုင် ရောင်းချသူများမှ သတိပေး ပြောဆိုထားသည်။
Leave a Comments